སྐབས་བདུན་པའི་ཚངས་དབྱངས་རྒྱ་མཚོའི་མགུར་གླུ་ཆེད་བསྒྲིགས་སྤྲོ་ཚོགས་ཆེན་མོ།

རྒྱལ་དབང་སྐུ་ཕྲེང་དྲུག་པ་ཚངས་དབྱངས་རྒྱ་མཚོ་མཆོག་ནི། རབ་བྱུང་བཅུ་གཅིག་པའི་ཆུ་ཕག(1683)ལོར་མོན་ལ་འོག་ཡུལ་གསུམ་དུ་སྐུ་འཁྲུངས། དགུང་ལོ་བཅོ་ལྔ་པ་རབ་བྱུང་བཅུ་གཉིས་པའི་མེ་གླང(1697)ལོར་རྒྱལ་བའི་གསེར་ཁྲིར་མངའ་གསོལ་མཛད། མཚོ་སྔོན་པོའི་བྱང་བརྒྱུད་ཀྱི་ཡུལ་རྐང་ཚའི་འབྲོག་པ་མང་ཚོགས་ཀྱི་ངག་རྒྱུན་ལྟར་ན།ཚངས་དབྱངས་རྒྱ་མཚོ་ཁོང་ཉིད་ད་ལྟའི་རྐང་ཚའི་མངའ་ཁོངས་ཀྱི་མཚོ་སྔོན་པོའི་ཉེ་འགྲམ་གྱི་ཁེ་རམ་ཐང་དུ་དགོང་པ་ཆོས་དབྱིངས་སུ་འཐིམས་སོང་སྐད།　དེ་རིང་ཚངས་དབྱངས་རྒྱ་མཚོའི་མགུར་གླུ་ཆེད་བསྒྲིགས་སྤྲོ་ཚོགས་གནས་འདི་ནས་བསྡུ་བ་ཡང་རྒྱུ་རྐྱེན་རྟེན་འབྲེལ་དེ་འདྲ་ཞིག་ལ་དམིགས་པ་ཡིན། ཡུལ་འདིའི་མི་དམངས་མང་ཚོགས་ཀྱིས་ཁོང་ཉིད་ལ་རྗེས་དྲན་བྱེད་ཆེད་དུ། ལོ་རེ་ ལུགས་རྙིང་གི་དབྱར་ཟླ་དྲུག་པའི་ནང་དུ་ཚངས་དབྱངས་རྒྱ་མཚོའི་མགུར་གླུ་ཆེད་བསྒྲིགས་སྤྲོ་ཚོགས་ཆེན་མོ་ཟེར་བ་ཞིག་བསྡུ་བཞིན་ཡོད།　 འདི་ལ་བོད་ཁུལ་གྱི་གླུ་བ་གླུ་མ་མིང་གྲགས་ཅན་དང་སྙན་ངག་གྱེར་འདོན་པ་གང་མང་གདན་འདྲེན་ཞུས་པ་བརྒྱུད་ཉམས་རྒུད་དུ་འགྲོ་བཞིན་པའི་བོད་ཀྱི་ལོ་རྒྱུས་རིག་གནས་ཤུལ་བཞག་མྱུར་སྐྱོབ་བྱེད་པ་དང་།　 སྲོལ་རྒྱུན་རིག་གནས་ཁྱབ་སྤེལ་དུ་གཏོང་བ།　 ཐུན་མོང་མ་ཡིན་པའི་རྐང་ཚའི་ཡུལ་སྐོར་ཐོན་ལས་སྔོག་འདོན་བྱེད་པ།　 ས་གནས་སྤྱི་ཚོགས་དཔལ་འབྱོར་མཐུན་སྦྱོར་ངང་འཕེལ་རྒྱས་ཡོང་པར་ཡར་སྐུལ་བྱེད་པ།  ས་གནས་མང་ཚོགས་ཀྱི་རིག་གནས་སྤྲོ་གསེང་འཚོ་བ་ཕུན་སུམ་ཇེ་ཚོགས་སུ་གཏོང་བ་བཅས་ཀྱི་ཆེད་དུ། བོད་མི་རིགས་ཀྱི་སྲོལ་རྒྱུན་གླུ་གར་གྱི་ཁྱད་ཆོས་གནས་འདི་ན་མངོན་པར་བྱས་ཡོད།