དགོ་དམར་ནི་རང་རྒྱལ་ལ་དམིགས་བསལ་དུ་ཡོད་པའི་རྨིག་ཐོགས་སྲོག་ཆགས་དཀོན་པོ་ཞིག་ཡིན་ལ། མཚོ་སྔོན་པོའི་མཐའ་འཁོར་གྱི་རྩྭ་ཐང་དང་བྱེ་ཐང་དུ་ཁྱབ་ཡོད། མིག་སྔར་དགོ་དམར་གྱི་རིགས་ཁྱུ་ཆེ་ཤོས་དེ་ཡང་དཔལ་དགེ་རྩྭ་ཐང་དུ་འཚོ། 1989ལོར་རང་རྒྱལ་གྱིས་དགོ་དམར་ནི་རྒྱལ་ཁབ་ཀྱི་རིམ་པ་དང་པོའི་སྲོག་ཆགས་སུ་བཀོད་ཅིང་། 1996ལོར། རྒྱལ་སྤྱིའི་རང་བྱུང་སྲུང་སྐྱོབ་མནའ་འབྲེལ་གྱིས“འཛམ་གླིང་གི་འཇིག་ཉེན་ཤིན་ཏུ་ཆེ་བའི་དངོས་རིགས”སུ་བདམས། དུས་མཚུངས་སུ《གོ་ལ་ཡོངས་ཀྱི་དགོ་གཙོད་སྲུང་སྐྱོབ་འཆར་གཞིར》བཀོད་པའི་འཇིག་ཉེན་ཆེ་བའི་དགོ་རིགས་ལས་ཨང་རིམ་དང་པོར་གྱུར། དེ་ལ“རྩྭ་ཐང་དུ་མཆོང་རྒྱུག་བྱེད་པའི་དོམ་ཁྲ”ཡི་མཚན་སྙན་ཡང་ཐོབ།
དགོ་དམར་ལ་ལྡེམ་མྱུར་ལྡན་ཞིང་སྤྱང་གྲུང་འཛོམས། གཟུགས་པོའི་རིང་ཚད་ལ་ལི་སྨི100དང་མཐོ་ཚད་ལ་ལི་སྨི50ཡོད། ཧ་ལམ་དགོ་བའི་ལྗིད་ཚད་ལ་སྤྱི་རྒྱ27དང་དགོ་མའི་ལྗིད་ཚད་ལ་སྤྱི་རྒྱ23ཡོད། དགོ་བ་ལ་རྭ་ནག་ཆ་གཅིག་ཐོགས་ཤིང་རྭ་རྩེ་ནང་དུ་གུག་ལ། རིང་ཚད་ལི་སྨི30ཡོད་པས། དེ་ལ“ཀྲུང་ཧྭའི་དགོ་བ་རྭ་ཆ”ཡང་འབོད། དགོ་དམར་བང་རྒྱུག་གི་སྐབས་སུ་འཕོངས་མགོའི་དཀར་ཆ་དེ་ཤིན་ཏུ་གསལ་བས་ངོས་འཛིན་སླ། མཚོ་སྐོར་ལྕགས་རྟ་འགྲན་སྡུར་གྱི་མཚོན་རྟགས་ཀྱང་དགོ་དམར་ཡིན་ལ་མིང་ལ་རྡོ་རྗེ་ཞེས་འབོད། “རྭ་ཆ་དང་འཕོངས་དཀར”ནི་དགོ་དམར་གྱི་ཆེས་སྙིང་དུ་སྡུག་པའི་ཁྱད་ཆོས་དེ་ཡིན།
2008ལོ་ནས་བཟུང་། རྐང་ཚ་རྫོང་གིས་མཚོ་སྔོན་པོའི་དགོ་དམར་དམིགས་བསལ་སྲུང་སྐྱོབ་ཁུལ་དང་དགོ་དམར་སྲུང་སྐྱོབ་ས་ཚིགས་འཛུགས་མགོ་བརྩམས། དགོ་དམར་སྲུང་སྐྱོབ་ལ་ཤུགས་བརྒྱབ་པ་དང་བསྟུན་ནས། འཛམ་གླིང་གི་འཇིག་ཉེན་ཤིན་ཏུ་ཆེ་བའི་དངོས་རིགས་སུ་གཏོགས་པའི་དགོ་དམར་གྱི་གྲངས་ཀའང་ཆེས་ཆེར་འཕར་ཏེ། དུས་རབས་གོང་མའི་ལོ་རབས90པའི300ལྷག་ནས་ད་ལྟའི3000ལྷག་ལ་འཕེལ། 2017ལོར་མཚོ་བྱང་ཁུལ་ལ་ཀྲུང་གོའི་རི་སྐྱེས་སྲོག་ཆགས་སྲུང་སྐྱོབ་མཐུན་ཚོགས་ཀྱིས“ཀྲུང་གོའི་དགོ་དམར་གྱི་ཕ་ས”ཞེས་པའི་མིང་བསྩལ།