སྐྱེ་ཁམས་ལ་བརྟེན་ནས་སུམ་མདོར་འགྱུར་ལྡོག་གསར་པ་བྱུང་ཡོད།

“གཞིས་ཀའི་ས་གྱང་དེ་སོ་ཕག་གི་གྱང་དུ་གྱུར་པ་དང་། ཤིང་སྒོ་ལྕགས་སྒོར་བརྗེས་ལ། སྒོ་ཁའི་ས་ལམ་ཡང་སྲ་བསྒྱུར་བྱས་ཡོད། འདི་དག་ཚང་མ་ཏང་དང་སྲིད་གཞུང་གིས་ང་ཚོར་ཕན་བཏགས་པའི་བཟང་ཆ་རེད”ཅེས་ལྷ་སྲུང་ཆོས་རྒྱལ་གྱི་བབ་ཆགས་པའི་སྐད་ཆ་འདི་ལ་བརྟེན་ནས་ལོ་ངོ་འདི་དག་གི་རིང་རང་ཉིད་ཀྱིས་མཐོང་བའི་སྡེ་གྲོང་དང་ཁོ་ཚང་གི་འགྱུར་ལྡོག་བརྗོད་བྱུང་།

ཉེ་ཆར། ཀྱག་ཀྱོག་གི་གཞུང་ལམ་བརྒྱུད་དེ་མདུན་ཕྱོགས་ཀྱི་སུམ་མདོ་ཟམ་པ་བརྒལ་བ་ན། ཐུན་མོང་མ་ཡིན་ཞིང་བོད་ཀྱི་ཁྱད་ཆོས་ལྡན་པའི་མཚོ་ཤར་གྲོང་ཁྱེར་ཧུའུ་ཀྲུའུ་ཧོར་རིགས་རང་སྐྱོང་རྫོང་སུམ་མདོ་བོད་རིགས་ཞང་གི“སུམ་མདོ་སྡེ་བ”ཞེས་བྲིས་ཡོད་པའི་སྒོ་ཆེན་དེ་མཐོང་། སྡེ་ལམ་གྱི་འགྲམ་ངོགས་གཉིས་སུ་བོད་ཀྱི་ཁྱད་ཆོས་མངོན་པར་གསལ་བའི་གྱང་དམའ་མོ་ཞིག་དྲང་མོར་རིང་དུ་བསྲིངས་ལ། བསྣོལ་མར་མཛེས་པར་ཆགས་པའི་གཞིས་ཀ་དག་ལ་ལྷག་ཏུ་བོད་ཀྱི་སྡེ་གྲོང་གི་ཐུན་མོང་མ་ཡིན་པའི་ཆ་ལྡན།

སྡེ་མི་ལྷ་སྲུང་ཆོས་རྒྱལ་ཚང་གིས་མེ་ཐབ་གསོས་ཡོད་པས་ཁང་པའི་ནང་དུ་དྲོད་ལམ་ལམ་ཞིག་རེད། མདུན་ཅོག་སྟེང་དུ་ཁོ་ཚང་གིས་བཙོས་པའི་གོར་དམར་བསྒྲིགས་ཡོད་པ་སོགས་ནང་དུ་དྲོད་སྣང་གིས་ཁེངས་འདུག “སྔོན་ཆད་དགུན་ཁ་སླེབས་དུས་ཁང་པའི་ནང་ཤིན་ཏུ་འཁྱགས། ད་ལྟ་ཧ་ཅང་དྲོ་ལ་དགུན་ཁར་ཡང་ལུས་ནས་རྔུལ་ཆུ་བཞུར་བའི་སྐབས་ཡོད”ཅེས་ལྷ་སྲུང་ཆོས་རྒྱལ་གྱིས་ཐོད་པའི་སྟེང་གི་རྔུལ་ཆུ་འབྱིད་ཞོར་དུ་དེ་ལྟར་བཤད།

ལྷ་སྲུང་ཆོས་རྒྱལ་ཚང་གི་བཟའ་མི་གསུམ་པོས་ལོ་ངོ་མང་པོར་ཕྱུགས་འཚོས་ནས་འཚོ་བ་རོལ་བ་རེད། རྗེས་སུ་ཁོའི་ཆུང་མ་དང་བུ་གཉིས་ཀ་དབང་པོ་སྐྱོན་ཅན་དུ་གྱུར་པས། ཁྱིམ་ཚང་གི་ལས་འགན་ལྗིད་མོ་ཁོ་གཅིག་པུའི་ཕྲག་སྟེང་དུ་བབས་ནས་འཚོ་བ་དཀའ་སྡུག་གི་གནས་སུ་ལྷུང་། “སྡེ་བའི་ལས་བྱེད་པའི་རོགས་རམ་འོག་ང་རང་སྡེ་བའི་ནང་གི་གཙང་སྦྲ་པར་གྱུར་པ་དང་། ངའི་བུའང་སུམ་མདོ་ནགས་རའི་སྐྱེ་ཁམས་བདག་སྐྱོང་པར་གྱུར་པས། རང་ཚང་གི་སྒོ་ཁ་ནས་གཏན་འཇགས་ཀྱི་བྱ་བ་འདི་འདྲ་ཡོད་པ་ལ་བཀའ་དྲིན་ཆེ་བར་བསམས་ཡོད”ཅེས་ལྷ་སྲུང་ཆོས་རྒྱལ་གྱིས་ཕྱིར་དྲན་བྱས་ནས་དེ་ལྟར་བཤད།