ལི་ཧྲན་ཡོན་དང་ཐོག་མར་མཇལ་སྐབས། ཁོས་སྒེར་འཁོར་བསྐོར་ཞིང་ལུས་ལ་མཆོང་རྒོལ་ལྭ་བ་དང་། མགོ་ལ་ཉི་འགོག་ཞྭ་མོ་གྱོན་ཡོད། ལུས་ལ་ཡོ་ཆས་ཀྱང་མང་པོ་བཟུང་མེད་དེ། པར་ཆས་ཤིག་དང་མིག་ཤེལ་ཞིག་བསྣམས་འདུག ང་ཚོ་འགྲོ་རོགས་ཚང་མ་མཚོ་ནུབ་སོག་རིགས་བོད་རིགས་རང་སྐྱོང་ཁུལ་ཐེམ་ཆེན་རྫོང་གི་བྲག་དཀར་ཐེམ་ཆེན་ཕྱོགས་སུ་སྐྱོད་སྐབས། ཁོ་ཆེད་དུ་པར་ལེན་དུ་ཡོང་བ་མིན་པ་འདྲ་བའི་སྣང་བ་ཞིག་སྦྱིན་སོང་།

གནའ་བ་ཁྱུ་གཅིག་གིས་དོགས་གཞི་དེ་དག་མེད་པར་བཏང་སོང་། ལི་ཧྲན་ཡོན་གྱིས་མྱུར་དུ་རླངས་འཁོར་གྱི་གཞུག་སྒམ་ཕྱེ་ཞིང་། དེའི་ནང་དུ་སྒྲིག་ཆས་ཆ་ཚང་ཡོད་ལ། མི་མེད་གནམ་གྲུ་དང་། རྐང་སྟེགས། སྦྲ་གུར་སོགས་མཐོང་། ང་ཚོས་མཉམ་མ་བཞག་པའི་སྔོན་ལ། ཁོའི་མི་མེད་གནམ་གྲུ་མཁའ་དབྱིངས་སུ་བཏང་ཟིན་ལ། རི་ལྡེབས་ཀྱི་གནའ་བ་དང་ཐེམ་ཆེན་རྫོང་མཁར་གཉིས་པར་མིག་གཅིག་ཏུ་ཚུད་པའི་པར་བླངས་འདུག

ལི་ཧྲན་ཡོན་གྱིས་དགོད་བཞིན་དུ་ཐོག་མར་པར་ལེན་སྐབས་ཀྱི་རྣམ་པ་ཕྱིར་དྲན་བྱས་ཤིང་། ཉིན་གང་བོར་ཆུ་སྐྱར་རིགས་ཀྱིས་ཉ་འཛིན་པར་བསྒུགས་ནས་པར་བླངས་པ་དང་། རི་ལུང་ཀུན་ཏུ་ཤྭ་སྐྱའི་རྨིག་རྗེས་བཙལ་ཅིང་། རིམ་གྱིས་བརྙན་མིག་ནང་གི་རི་སྐྱེས་སྲོག་ཆགས་དག་ཁོའི་མིག་ལམ་དུ་སྲོག་ཆགས་ཙམ་མིན་པར་གྱུར། དེ་དག་གི་འཇིག་རྟེན་ལ་མཚར་སྣང་གིས་ཁེངས་ཏེ། ཁོའི་པར་ལེན་ཡང་ཟིན་ཐོ་འགོད་པ་རྐྱང་རྐྱང་ནས་ཚེ་སྲོག་གི་གཏམ་རྒྱུད་འཚོལ་ཞིབ་བྱེད་པའི་ཕྱོགས་སུ་ཕྱིན།

2020ལོར་ཁྱབ་སྒྲོག་བྱས་པའི་འཛམ་གླིང་རི་སྐྱེས་སྐྱེ་དངོས་པར་ལེན་པའི་ལོ་འཁོར་འགྲན་སྡུར（WPY）སྟེང་། ལི་ཧྲན་ཡོན་གྱིས《ཨ་མས་མདུན་དུ་རྒྱུགས་ཤིག་ཅེས་གསུང་སྐབས》ཞེས་པའི་བརྩམས་ཆོས་ལ་འོ་འཐུང་རིགས་ཀྱི་སྲོག་ཆགས་བྱ་སྤྱོད་ཚན་ཆུང་གི་བྱ་དགའ་ཨང་དང་པོ་ཐོབ། བརྩམས་ཆོས་འདིས་ཁྲི་ལེ་ཁྱིམ་ཚང་གང་བོའི་ཉེན་ཁའི་གནས་སྐབས་གསོན་ཉམས་ལྡན་པའི་སྒོ་ནས་བཀོད་ཡོད་པ་སྟེ། བག་ཕེབས་ངང་ཁ་ཟས་འཚོལ་བའི་ཁྱིམ་མི་གང་བོ་གློ་བུར་དུ་རང་བྱུང་དགྲ་བོ་སྦྲེ་དང་འཕྲད། དོགས་ཟོན་ཆེ་བའི་ཨ་མས་བརྡ་བཏང་རྗེས། ཕྲུ་གུ་རྣམས་དེ་མ་ཐག་ཏུ་བྲོས་ཤིང་བསྐུངས།

མི་སེམས་སྒུལ་བའི་བར་སྐབས་དེ་ཡི་རྒྱབ་ཏུ་ལི་ཧྲན་ཡོན་གྱི་ལོ་ངོ་དྲུག་རིང་གི་འགྱུར་མེད་རེ་སྒུག་ཡོད།

2019ལོའི་ཟླ8པར། ལི་ཧྲན་ཡོན་གྱིས་ཁྲི་ལེའི་ཚང་གི་ཉེ་འདབས་སུ་ཉིན་བཞི་ལ་བསྒུགས་རྗེས། མཐའ་མཇུག་བྱ་དགའ་ཐོབ་པའི་པར་རྩ་ཆེན་དེ་ལེན་ཐུབ་སོང་།