ས་ཁོངས་ཀྱིས་མཚོ་སྔོན་ལ་མཚོ་འཕགས་ཀྱི་མཐོ་ཚད་འགོད་སྐབས་རྒྱང་རིང་ཞིང་བརྗིད་ཉམས་ལྡན་པའི་རི་དང་ཆུ་བོ་མཚེའུ་བཅས་དང་ཕུན་སུམ་ཚོགས་ཤིང་ཐུན་མོང་མ་ཡིན་པའི་རང་བྱུང་གི་སྐྱེ་སྟོབས་ཀྱང་བསྐྲུན་ཡོད། “ཀྲུང་ཧྭའི་ཆུ་ལྕོག”གཙང་གསུམ་འབྱུང་ཡུལ་དང་།ཀྲུང་གོའི་སྐམ་སའི་ཚྭ་མཚོ་ཆེ་ཤོས་ཡིན་པའི་མཚོ་སྔོན་པོ། ཀྲུང་གོའི་ནུབ་རྒྱུད་ཀྱི་སྐྱེ་ཁམས་བདེ་འཇགས་སྲུང་ཡོལ་མདོ་ལ་རིང་མོ་སོགས་ཀྱིས་སྐྱེ་ཁམས་དཔལ་ཡོན་གྱི་མཐོ་སའི་ཤོག་དྲིལ་ངོས་སུ་ལྗང་མདོག་གི“ཞབས་རྗེས”བཞག་ནས་མི་དང་བྱ་གཞག་མཐའ་དག་དར་ཞིང་རྒྱས་པའི་ཡུལ་ལྗོངས་ཧྲིལ་པོའི་པར་རིས་དཔར་ཡོད།

སྐྱེ་ཁམས་སྲུང་སྐྱོང་ཁྲོད་ཀྱི་ཚན་རྩལ་གྱི་ནུས་པར་དམིགས་ནས།མདོ་ལ་རིང་མོའི་རྒྱལ་ཁབ་སྤྱི་གླིང་གི་རི་སྐྱེས་སྲོག་ཆགས་སྐྱོབ་གསོའི་ས་ཚིགས་ཀྱི་འགན་འཁུར་པ་མ་ཚུན་ཞིན་གྱིས་ཚན་རྩལ་གྱིས་རི་སྐྱེས་སྲོག་ཆགས་ལ་བརྟག་དཔྱད་བྱས་པར་སྐྱེལ་ཡོང་བའི་འགྱུར་ལྡོག་སྐོར་བརྗོད། ཁོས་བཤད་རྒྱུར། དེ་སྔ་རྒྱུན་སྲོལ་གྱི་མ་དཔེ་བརྟག་དཔྱད་བྱེད་སྐབས་རི་སྐྱེས་སྲོག་ཆགས་ཀྱི་རིགས་དང་།གྲངས་ཚད།སྐྱེ་ཁམས་བཅས་སྟབས་བདེའི་ངང་ཟིན་ཐོར་འགོད་ཐུབ་པ་ཙམ་ཡིན་མོད། འོན་ཀྱང་རྒྱལ་ཁབ་སྤྱི་གླིང་སྒྲིག་སྲོལ་ཚོད་ལྟའི་བྱ་བར་སྐུལ་འདེད་གཏིང་ཟབ་བཏང་བ་དང་བསྟུན་ནས། དམར་ཕྱིའི་པར་ཆས་དྲ་མིག་ཅན་དུ་བཀོད་སྒྲིག་བྱས་ནས་བརྟག་དཔྱད་ཀྱི་རམ་འདེགས་ལག་ཆ་གལ་ཆེན་ཡོད་པས། གྲངས་འབོར་ཇེ་མང་དུ་ཕྱིན་པ་དང་དུས་མཚུངས་སུ་ཁྱབ་པའི་རྒྱ་ཁྱོན་ཡང་ཆེ་རུ་འགྲོ་བཞིན་ཡོད།

མིག་སྔའི་བར་རྒྱལ་ཁབ་སྤྱི་གླིང་གི་ཚན་ཞིབ་ལྟ་ཞིབ་ཚད་ལེན་བརྟག་དཔྱད་ལས་གཞི120ལྷག་བརྒྱུད་རིམ་ལྡན་པའི་སྒོ་ནས་ལག་བསྟར་བྱས་ཡོད་པ་དང་། རང་བྱུང་ཐོན་ཁུངས་ཀྱི་གཞི་རྩའི་གཞི་གྲངས“རྩིས་ཐོ་གཅིག”དང་། སྐྱེ་དངོས་སྣ་མང་རང་བཞིན་སྲུང་སྐྱོང་བྱེད་པའི“རེའུ་མིག་གཅིག”སྐྱེ་དངོས་རིགས་ལྟ་ཞིབ་ཚད་ལེན་བྱེད་པའི་བརྟག་དཔྱད“རི་མོ་གཅིག”བཅས་ནས་མགོ་བརྩམས་ཏེ། རྒྱལ་ཁབ་སྤྱི་གླིང་གི“གཅིག་ཅན་གསུམ”ཚན་ཞིབ་གཞི་གྲངས་མ་ལག་བཙུགས་ཤིང་། གསའ5དང་རྩྭ་གཡི11། ཁྲུང་ཁྲུང་སྐེ་ནག38བཅས་ཀྱི་འཁོར་སྐར་རྗེས་འདེད་ལྟ་ཞིབ་ཚད་ལེན་ལེགས་གྲུབ་བྱུང་ནས། རང་རྒྱལ་གྱི་འབྲེལ་ཡོད་སྐྱེ་དངོས་རིགས་ལྟ་ཞིབ་ཚད་ལེན་གཞི་གྲངས་ཐད་ཀྱི་སྟོང་ཆ་བསྐངས་ཡོད།

མདོ་ལ་རིང་མོས་འཁྱགས་ཀླུང་དང་གངས་རི་མང་པོ་ཞིག་བསྐྱེད་ཡོད་པ་དང་ཧྲུའུ་ལི་ལྷོ་རིའི་རི་རྒྱུད་ཀྱི་གངས་དཀར་ཕྱོགས་ལེའི་འཁྱགས་རི་ནི་བུ་ཧ་ཆུ་བོའི་མགོ་ཁུངས་ཡིན་ལ། བུ་ཧ་ཆུ་བོའང་མཚོ་སྔོན་པོའི་ཁ་གསབ་ཆུ་བོ་མང་པོའི་ཁྲོད་ཆུའི་བཞུར་ཚད་ཆེ་ཤོས་ཀྱི་ཆུ་བོ་ཞིག་ཀྱང་རེད། ཐེམ་ཆེན་ནི་མཚོ་སྔོན་པོའི་འབབ་རྒྱུད་ཀྱི་སྐྱེ་ཁམས་སྲུང་སྐྱོང་ས་ཁོངས་གལ་ཆེན་ཞིག་ཡིན་པས། ཉེ་ལམ་མཚོ་སྔོན་པོ་མཛེས་ལྗོངས་ཁུལ་སྲུང་སྐྱོང་བེད་སྤྱོད་དོ་དམ་ཅུས་ཐེམ་ཆེན་དོ་དམ་ཡན་ལག་ཅུས་དང་ཅོང་ཆུ།མཁར་དམར།གཡག་ཁེངས་བཅས་ཀྱི་སྲུང་སྐྱོང་ས་ཚིགས་ཀྱི་སྒོ་བྱང་བཀལ།

ད་ལོ་ནས་བཟུང་མཚོ་སྔོན་པོའི་མཐའ་འཁོར་གྱི་ས་གནས་སྲིད་གཞུང་གི་རྒྱབ་སྐྱོར་ཤུགས་ཆེན་འོག སྐྱེ་ཁམས་དོ་དམ་སྲུང་སྐྱོང་པའི་དཔུང་སྡེ་འཛུགས་སྐྲུན་ལ་འཕེལ་རྒྱས་ཆེན་པོ་བྱུང་། དེའི་ནང་གུང་ཧོ་རྫོང་གིས་མ་དངུལ་སྒོར་ཁྲི100སྤྱད་དེ་སྐྱེ་ཁམས་བདག་སྐྱོང་པ20སྡུད་ལེན་བྱས་པ་དང་རྐང་ཚ་རྫོང་གིས་མ་དངུལ་སྒོར་ཁྲི40སྤྱད་དེ་སྐྱེ་ཁམས་བདག་སྐྱོང་པ20སྡུད་ལེན་བྱས་ནས། རྫོང་གིས་གདན་ཞུ་དང་ས་ཚིགས་ཀྱིས་སྤྱོད་པའི་བྱེད་ཐབས་སྤྱད་པ་དང་། མཚོ་སྔོན་པོ་མཛེས་ལྗོངས་ཁུལ་སྲུང་སྐྱོང་བེད་སྤྱོད་དོ་དམ་ཅུས་ཀྱིས་སྐྱེ་ཁམས་བདག་སྐྱོང་པ30སྡུད་ལེན་བྱས་ཏེ། མཚོ་སྔོན་པོའི་མཐའ་འཁོར་གྱི་སྐྱེ་ཁམས་བདག་སྐྱོང་པ70ལྷག་ལ་སླེབས།

ལྷ་མོ་དོན་འགྲུབ་ནི་འོམ་ཆུའི་སྲུང་སྐྱོང་ས་ཚིགས་ཀྱི་སྐྱེ་ཁམས་བདག་སྐྱོང་པ་ཞིག་ཡིན་ཞིང་།ཉིན་ལྟར་སྐོར་སྲུང་བྱེད་ཚད་མང་དུ་བཏང་སྟེ། སྒེར་བསྐོར་ཡུལ་སྐོར་པས་སྲུང་སྐྱོང་ཁུལ་གྱི་ཁྱབ་ཁོངས་སུ་སྒར་བརྒྱབ་ནས་བཟའ་བཏུང་ལ་མི་རོལ་བའི་ཁ་ཏ་བསླབ་བྱ་བྱས་པ་དང་། མཚོ་འཁྱིལ་སྲུང་སྐྱོང་ས་ཚིགས་ཀྱི་སྐྱེ་ཁམས་བདག་སྐྱོང་པ་དགྲ་ལྷ་ཡང་དེ་དང་འདྲ་སྟེ།དེ་ནི་གསེར་ཉ་གྱེན་རྐྱལ་གྱི་བགྲོད་ལམ་ཡིན་ལ་ཡུལ་སྐོར་པ་ཅུང་གཅིག་སྡུད་ཀྱི་ས་ཁོངས་ཤིག་ཀྱང་ཡིན་པས་ཁོས་ཉིན་ལྟར་སྐོར་སྲུང་བྱེད་སྐབས་སེམས་ཤུགས་གང་ཡོད་ཀྱིས་འགན་འཁྲི་བསྒྲུབས་ཏེ། གྲམ་པའི་གཙང་སྦྲ་འགན་ལེན་བྱས་ནས་གཞི་རིམ་གྱི་སྐྱེ་ཁམས་སྲུང་སྐྱོང་ལས་དོན་ཁྲོད་དགེ་མཚན་ལྡན་པའི་ནུས་པ་འདོན་སྤེལ་བྱས་དང་བྱེད་ཀྱིན་ཡོད། །