ཞི་ཅིན་ཕིང་གིས་ལྷོ་ཁོ་རེ་ཡའི་སྲིད་འཛིན་ལི་ཙའེ་མིན་དང་གྲོས་མོལ་མཛད།
发布时间:2025年11月04日 消息来源:

རྩོམ་སྒྲིག་པ། ལྷ་ཆེན་རྡོ་རྗེ། ཡོང་ཁུངས། ཀྲུང་གོ་བོད་ཀྱི་དྲ་བ། བཤེར་འབེབས། ཚེ་བརྟན་བཀྲ་ཤིས།

   ས་དེའི་དུས་ཚོད་ཟླ11པའི་ཚེས1ཉིན་གྱི་ཕྱི་དྲོར། ལྷོ་ཁོ་རེ་ཡའི་སྲིད་འཛིན་ལི་ཙའེ་མིན་གྱིས་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་དང་མཉམ་དུ་ཆིན་ཀྲོའུ་རྟེན་མཛོད་ཁང་དུ་གྲོས་མོལ་མཛད།  ཟླ11པའི་ཆིན་ཀྲོའུ་ནི་སྟོན་དུས་ཀྱི་མཛེས་པ་ཀུན་ནས་རྫོགས། ཞི་ཅིན་ཕིང་རླངས་འཁོར་ལ་བསྡད་དེ་འབྱོར་ཞིང་། ཆིན་ཀྲོའུ་གུས་ཞབས་རུ་ཁག་གིས་གཟབ་རྒྱས་ཀྱི་དགའ་བསུ་ཞུས།

ལི་ཙའེ་མིན་གྱིས་སྤྲོ་སེམས་འཁོལ་བའི་ངང་ཞི་ཅིན་ཕིང་ལ་བསུ་མ་གནང་། རྒྱལ་ཁབ་གཉིས་ཀྱི་གཙོ་བདག་གིས་ཕྱག་འཇུ་གནང་ནས་འདྲ་པར་བླངས།

ཞི་ཅིན་ཕིང་དང་ལི་ཙའེ་མིན་རྣམ་གཉིས་གཟིགས་ཞིབ་སྟེགས་བུའི་སྟེང་ཕེབས་པ་ན། དམག་མིའི་རོལ་དབྱངས་རུ་ཁག་གིས་ཀྲུང་གོ་དང་ལྷོ་ཁོ་རེ་ཡ་རྒྱལ་ཁབ་གཉིས་ཀྱི་རྒྱལ་གླུ་དཀྲོལ། ཞི་ཅིན་ཕིང་གིས་ལི་ཙའེ་མིན་གྱིས་ཕེབས་རོགས་འོག་གཟབ་སྦྲེང་རུ་ཁག་ལ་གཟིགས་ཞིབ་གནང་། རྒྱལ་ཁབ་གཉིས་ཀྱི་གཙོ་བདག་གིས་སོ་སོར་ཕ་རོལ་པའི་ཕེབས་རོགས་མི་སྣར་ཕྱག་འཇུ་གནང་ནས་གུས་འདུད་ཞུས།

དགའ་བསུའི་མཛད་སྒོ་རྗེས་སུ། རྒྱལ་ཁབ་གཉིས་ཀྱི་གཙོ་བདག་གིས་གྲོས་མོལ་མཛད།

ཞི་ཅིན་ཕིང་གིས་བསྟན་དོན། ཀྲུང་གོ་དང་ལྷོ་ཁོ་རེ་ཡ་གཉིས་ནི་གནས་སྤོ་ཐབས་མེད་པའི་ཁྱིམ་མཚེས་གལ་ཆེན་དང་ཁ་འབྲལ་མི་ཐུབ་པའི་མཉམ་ལས་གྲོགས་པོ་ཡིན། འབྲེལ་བ་བཙུགས་ནས་ལོ་ངོ33འགོར་བའི་རིང་། རྒྱལ་ཁབ་གཉིས་ཀྱིས་སྤྱི་ཚོགས་ཀྱི་ལམ་ལུགས་དང་འདུ་ཤེས་འཛིན་སྟངས་ཀྱི་ཁྱད་པར་ལས་བརྒལ་ནས། ཁྱབ་ཁོངས་སོ་སོའི་བརྗེ་རེས་དང་མཉམ་ལས་ལ་ཧུར་ཐག་གིས་སྐུལ་འདེད་བཏང་སྟེ། ཕན་ཚུན་ལ་གྲུབ་འབྲས་ཐོབ་པ་དང་མཉམ་དུ་དར་རྒྱས་སུ་བཏང་། ཀྲུང་གོ་དང་ལྷོ་ཁོ་རེ་ཡའི་འབྲེལ་བ་སྐྱོན་བྲལ་དང་བརྟན་པོའི་ངང་འཕེལ་རྒྱུར་སྐུལ་འདེད་གཏོང་རྒྱུ་ནི་ཐོག་མཐའ་བར་གསུམ་དུ་རྒྱལ་ཁབ་གཉིས་ཀྱི་མི་དམངས་ཀྱི་རྩ་བའི་ཁེ་ཕན་དང་མཐུན་པར་མ་ཟད་དུས་རབས་ཀྱི་རླབས་རྒྱུན་དང་མཐུན་པའི་གདམ་ག་ཡང་དག་ཅིག་ཡིན་པ་དོན་དངོས་ལས་ར་སྤྲོད་བྱས་ཡོད། ཀྲུང་གོ་ཕྱོགས་ཀྱིས་ཀྲུང་གོ་དང་ལྷོ་ཁོ་རེ་ཡའི་འབྲེལ་བར་མཐོང་ཆེན་བྱས་ནས། ལྷོ་ཁོ་རེ་ཡའི་སྲིད་ཇུས་ལ་རྒྱུན་མཐུད་རང་བཞིན་དང་བརྟན་བརླིང་རང་བཞིན་རྒྱུན་འཁྱོངས་བྱས་ཡོད། ལྷོ་ཁོ་རེ་ཡའི་ཕྱོགས་དང་མཉམ་དུ་འབྲེལ་འདྲིས་ལ་ཤུགས་སྣོན་པ་དང་། མཉམ་ལས་ཟབ་སྤེལ། ཐུན་མོང་གི་ཁེ་ཕན་རྒྱ་སྐྱེད་པ། ལག་གདང་སྦྲེལ་ནས་འགྲན་སློང་ལ་ཁ་གཏད་འཇལ་བ་དང་། ཀྲུང་གོ་དང་ལྷོ་ཁོ་རེ་ཡའི་འཐབ་ཇུས་མཉམ་ལས་གྲོགས་པོའི་འབྲེལ་བ་བརྟན་པོར་འཕེལ་རྒྱུར་སྐུལ་འདེད་བཏང་སྟེ། ས་ཁུལ་གྱི་ཞི་བདེ་དང་འཕེལ་རྒྱས་ལ་དྲང་ནུས་སྔར་ལས་མང་པོ་འདོན་སྤྲོད་བྱེད་འདོད་ཡོད།