མཚོ་བྱང་གིས་ཧྲན་ཏུང་ཕྱུགས་ལས་དངོས་མང་བཤམ་སྟོན་འདུ་ཚོགས་ཐོག་སྒོར་དུང་ཕྱུར1.95ཡི་གན་རྒྱ་བཞག་པ་དང་། གསེར་གྱི་བྱ་དགའ་ཁག3བླངས།
རྩོམ་སྒྲིག་པ། ལྷ་ཆེན་རྡོ་རྗེ། ཡོང་ཁུངས། མཚོ་བྱང་མདོ་ལ་བོད་ཡིག་ཚགས་པར། བཤེར་འབེབས། ཚེ་བརྟན་བཀྲ་ཤིས།
ཟླ10པའི་ཚེས30ཉིན་ནས་ཚེས31ཉིན་བར། ཧྲན་ཏུང་ཕྱུགས་ལས་དངོས་མང་བཤམ་སྟོན་འདུ་ཚོགས་སྐབས40པ་ཧྲན་ཏུང་ཞིང་ཆེན་ཅི་ནན་གྲོང་ཁྱེར་དུ་སྤེལ་ལ། མཚོ་བྱང་ཁུལ་གྱིས་ཐོག་དང་པོར་རྩ་འཛུགས་བྱས་ཏེ་འགྲེམས་ཚོགས་སུ་ཞུགས་ཤིང་། རང་ས་གནས་ཀྱི་སྤུས་ལེགས་ཁེ་ལས5ལ་འདེམས་སྒྲུག་ཞིབ་ཚགས་བྱས་ཏེ་བོད་ལུག་ཤ་དང་། སྐམས་ཤ སྦྲང་རྩིའི་ཐོན་རྫས་དང་ནས་ཀྱི་ཐོན་རྫས་སོགས་རིགས190ཡི་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཅི་ནན་དུ་འགྲེམས་སྟོན་བྱས་པར་མ་ཟད། ཁྱད་ལྡན་ལེགས་ཆ་དང་ཕུལ་བྱུང་རྒྱུ་སྤུས་ལ་བརྟེན་ནས་གྲུབ་འབྲས་མང་བོ་བླངས་ཡོད།
ཐེངས་འདིའི་དངོས་མང་བཤམ་སྟོན་འདུ་ཚོགས་སྟེང་། མཚོ་བྱང་གིས་ལིན་དབྱི་ཞིན་གྲོང་ནས་ལས་སྣོན་ཞིབ་ཚགས་ཞིབ་བཟོ་རྟེན་གཞིའི་ལས་གཞི་སོགས་རིན་ཐང་སྒོར་དུང་ཕྱུར1.95ཟིན་པའི་ལས་གཞི་གསུམ་ལ་གན་རྒྱ་བཞག་པར་མ་ཟད། ཧྲན་ཏུང་བདེ་ཐང་ཤའི་ཐོན་ལས་མཉམ་འབྲེལ་ལྷན་ཚོགས་དང་ཧྲན་ཏུང་རིམས་འགོག་ལྟེ་གནས་དང་མུ་འབྲེལ་འཐབ་ཇུས་གྲོས་མཐུན་གན་རྒྱ་བཞག ཚོགས་ཆེན་གྱི་ཆེད་ལས་དཔྱད་ཞིབ་བརྒྱུད། མཚོ་བྱང་ཁུལ་འཇུ་ལག་རྫོང་ཧེང་ཡོན་སྦྲང་རྩིའི་ཐོན་ལས་ཚད་ཡོད་སྤྱི་གཉེར་ཁང་གི“འཇུ་ལག་ཆུ”རིགས་ཀྱི་སྦྲང་རྩིའི་ཐོན་རྫས་དང་། རྐང་ཚ་ལུའུ་ཆིང་ཞིང་ཕྱུགས་གསར་སྤེལ་ཚད་ཡོད་སྤྱི་གཉེར་ཁང་གི“རྐང་ཚ་མཚོ་སྔོན་པོ”ཆས་རྟགས་ཀྱི་ནོར་གནག་དང་བོད་ལུག་སོགས་ཐོན་རྫས་ཁག3ལ“སྤུས་ལེགས་ཕྱུགས་ལས་ཐོན་རྫས་ཀྱི་གསེར་གྱི་བྱ་དགའ”ཐོབ་ཅིང་འགྲེམས་ཚོགས་ཀྱི་གཙོ་གནད་དུ་གྱུར་ཡོད།
དུས་ཡུན་ཐུང་ཐུང་ཉིན་གཉིས་ནང་འགྲེམས་སྟོན་བྱས་པ་བརྒྱུད། མཚོ་བྱང་ཁུལ་གྱི་འགྲེམས་ཁུལ་དུ་མི་ཚོགས་ཀྱིས་ཁེངས་ཤིང་། རིགས190ཡི་འགྲེམས་ཚོང་ཐོན་རྫས་ཚང་མ་ཉོས་ཚར་ནས་ཕྱིར་ཚོང་བསྡོམས་འབོར་སྒོར་ཁྲི7ལྷག་ཙམ་མངོན་འགྱུར་བྱུང་། བོད་ལུག་ཤ་དང་སྐམས་ཤ སྦྲང་རྩི། ནས་ཀྱི་ཐོན་རྫས་སོགས་མཐོ་སྒང་གི་ཁྱད་ལྡན་ཐོན་རྫས་ཀྱི་སྤུས་ཚད་དང་ཐུན་མོང་མ་ཡིན་པའི་ཁྱད་ཆོས་ལ་བརྟེན་ནས་འགྲེམས་ཚོགས་ཀྱི་ཆེས་དགའ་བསུ་ཐོབ་པའི་ཐོན་རྫས་སུ་གྱུར་ནས་ཅི་ནན་གྱི་གྲོང་མི་དང་ཉོ་སྒྲུབ་ཚོང་བ་གང་མང་ཞིག་གི་ཡིད་དབང་བཀུག་ཡོད།
ཐེངས་འདིའི་འགྲེམས་ཚོགས་སུ་ཞུགས་པ་བརྒྱུད། མཚོ་བྱང་ཁུལ་ལ་དགའ་འོས་པའི་ཕྱིར་ཚོང་གྲུབ་འབྲས་དང་དབང་གྲགས་ལྡན་པའི་བྱ་དགའ་ཐོབ་པར་མ་ཟད། ཧྲན་ཏུང་ཕྱུགས་ལས་དངོས་མང་བཤམ་སྟོན་འདུ་ཚོགས་ཀྱི་སྟེགས་བུ་གལ་ཆེན་དེར་བརྟེན་ནས་ཧྲན་ཏུང་གི་ཁྲོམ་ར་དང་ཐ་ན་རྒྱལ་ཡོངས་ཀྱི་ཚོང་པར་གཅིག་སྡུད་ཐོག་མཚོ་བྱང་ཁུལ་གྱི་སྤུས་ལེགས་ཞིང་ཕྱུགས་ཐོན་རྫས་དང་ཐོན་ལས་ཀྱི་མི་མངོན་པའི་སྟོབས་ཤུགས་མངོན་པར་བྱས་ཤིང་། “སྤུས་ཚད་ལེགས་པ་དང་བྲོ་བ་ཞིམ་པའི”མཚོ་བྱང་གི་ཁྱད་ལྡན་ཐོན་རྫས་ལ་འཛད་སྤྱོད་པའི་ཡིད་ཆེས་དང་ཁས་ལེན་ཐོབ་ཡོད་ལ། རྗེས་མཐུད་ཀྱི་ཁྲོམ་རའི་ཚོང་ལམ་དེ་བས་ཡངས་ཤིང་རྒྱ་ཆེ་བ་གསར་གཏོད་དང་མཚོ་བྱང་གི་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་བྱ་ཡུལ་འཛུགས་སྐྲུན་གྱི་སྐུལ་འདེད་ལ་རྨང་གཞི་བརྟན་པོ་བཏིང་ཡོད།