པར་ལེན་མཁན་ཚེ་དབང་རྣམ་རྒྱལ།   

གནས་དེ་ནི་བདག་གིས་བྱ་གཞག་གཉེར་སའི་ཡུལ་གྲུ་ཡིན་ལ་སྐྱེ་ཁམས་དཔལ་ཡོན་གྱི་སྒོ་མོ་ཐོག་མར་འབྱེད་སའང་ཡིན། དང་ཐོག་ནགས་ལས་སྲིད་འཛིན་གྱི་ལས་གཞིའི་ཁྲོད་ནས་སྐྱེ་ཁམས་ལས་རིགས་སུ་གོམ་ཁ་ངང་གིས་བསྒྱུར་ཅིང་། ལས་རིགས་ཀྱིས་རང་ཉིད་ལ་ཞབས་ཞུའི་དགའ་མོས་ལྷུག་པོར་བསྩལ་བས་རང་བྱུང་སྐྱེ་དངོས་ཡོད་དོ་ཅོག་པར་དུ་འདེབས་པ་དང་བརྙན་ལ་འགོད་པའི་དངོས་བྲིས་ལས་སུ་དབང་མེད་དུ་ཕྱོགས་ཤིང་། གནས་དེ་གའི་རང་བྱུང་སྐྱེ་དངོས་ཡོད་ཚད་མ་ལུས་པར་ཟིན་ཐོར་འགོད་རྒྱུའི་འདུན་པ་དྲག་པོ་སྐྱེས།

2011 ལོའི་ལོ་དཀྱིལ་ནས་བཟུང་རྨ་སོག་རྩྭ་ཐང་གི་ཡུལ་གྲུ་སོ་སོ་དང་ནགས་ཀླུང་རི་ཁུལ་མ་ཁྱབ་ས་མེད་པར་གཅན་གཟན་རི་དྭགས་འཚོལ་ཞིབ་བྱས། སྐབས་དེར་བསམ་ཡུལ་ལས་འདས་པའི་དོན་ཞིག་ལ་མཐོ་སྒང་གི་གཅན་གཟན་རྒྱལ་བོ་རུ་འབོད་པའི་གསའ་ཡི་འཚོ་སྡོད་གསར་པ་རྒྱུས་ལོན་བྱུང་། དེ་བས་དེང་གི་སྲིད་ཇུས་བཟང་པོའི་གོ་སྐབས་རག་པའི་ཆེད་དང་། ཆེད་གཉེར་ལས་ཁུངས་ཀྱིས་ཁས་ལེན་གདེང་འཇོག་ཐོབ་པའི་ཆེད་དུ་གོང་རིམ་མགོ་ཁྲིད་ལ་སྙན་ཞུ་ཕུལ།

མཁྱེན་རྒྱ་ཡངས་པའི་མགོ་ཁྲིད་ཀྱིས་དམིགས་བསལ་གྱིས་གཅན་གཟན་གསའ་ལ་རྟོག་ཞིབ་བྱེད་པའི་ཆོག་མཆན་གནང་བས་ལོ་ངོ་གཅིག་གི་ནང་དུ་རྒྱུས་ལོན་གསལ་པོ་བྱས།བསྟུད་མར་ལོ་ཕྱེད་ཀྱི་ནང་དུ་མཚོ་སྔོན་ཞིང་ཧོ་ནན་སོག་རིགས་རང་སྐྱོང་རྫོང་ངམ་གཙང་གསུམ་དཀྱིལ་ཁུལ་དུ་གཅན་གཟན་གསའ་ཡོད་པ་ར་སྤྲོད་བྱུང་། ལས་གཞི་ཚན་རིག་དང་མཐུན་ཆེད་ཡང་བསྐྱར་ལོ་ཕྱེད་ཀྱི་ནང་དུ་ས་ཕྱོགས་ངེས་ཅན་དང་དུས་ཚིགས་གཏན་འཁེལ་སྒོས་གསའ་ཡི་འགུལ་སྐྱོད་བརྒྱུད་རིམ་རྟོག་ཞིབ་ཚད་ལེན་བྱས་ཏེ་མཇུག་འབྲས་རྒྱལ་ཡོངས་སུ་ཁྱབ་བསྒྲགས་བྱས་ཤིང་།མཚོ་སྔོན་ནགས་ལས་ལོ་རྒྱུས་ལ་དོན་ཆེན་ཞིག་བསྒྲུབས།  དེ་ནི་བདག་ལ་མཚོན་ན་མཐོ་སྒང་གི་བླ་སྲོག་གསོན་པོ་གསར་རྙེད་བྱུང་བས་ཅི་འདྲའི་དགའ་དགོས་པའི་དོན་ཆེན་ཞིག་རེད་ཨང་།

གསའ་ནི་གནས་འདི་ནས་ལམ་ལ་ཆས་ཤིང་མཐོ་སྒང་གི་ཡུལ་གྲུ་སོ་སོ་རུ་བསྒྲགས། གསའ་ནི་ཡུལ་འདི་ནས་གསར་དུ་རྙེད་ཅིང་གཙང་གསུམ་འབྱུང་ཡུལ་གྱི་རི་ལུང་ཀུན་ཏུ་ཁྱབ་པ་ཤེས། གསའ་ནི་མཚོ་སྔོན་ནས་སྲུང་སྐྱོབ་དང་འཛམ་གླིང་ཡོངས་ཀྱིས་དོ་སྣང་བྱེད་སར་གྱུར།   མི་ལོ་བཅུ་ཕྲག་རིང་ལ་གསའ་ཡི་འཚོ་བར་ཁ་བྲལ་མ་མྱོང་ལ་གསའ་དང་འབྲེལ་ནས་མཐོ་སྒང་གི་རི་སྐྱེས་སྲོག་ཆགས་དང་། རྩི་ཤིང་ཐམས་ཅད་དངོས་བྲིས་གང་ལེགས་བྱས་པ་ནི་གསའ་གཟིག་གི་བཀའ་དྲིན་ལས་མ་འདས་པས་ཉེ་ལམ་བསྐྱོན་པའི་གསའ་ཚང་ལྷན་འཛོམས་ཀྱི་པར་རིས་འགའ་དང་སྦྲགས་ནས་ང་དང་གསའ་ཡི་འབྲེལ་བ་ངོ་སྤྲོད་བྱ།

དུས་ཚོད：2025..8.20

རང་ཉིད་ནམ་རྒྱུན་དང་འདྲ་བར་ཇི་གིན་རི་ཡི་ངོ་མཚར་ལ་ལྟད་མོ་ལྟ་བ་དང་ཞོར་དུ་རི་སྐྱེས་སྲོག་ཆགས་དང་རྩི་ཤིང་སྨན་སྣ་སོགས་གང་འདོད་ཀྱིས་ཟིན་ཐོར་འགོད་སྐབས་གསའ་མཐོང་བྱུང་། སྐབས་དེར་གསའ་དེའི་གཟུགས་དབྱིབས་དང་སྤུ་བཞགས་གྲ་ཁ་ལ་བལྟས་ན་ཕལ་ཆེར་གསའ་མས་གསའ་ཕྲུག་རུམ་སྐབས་ཡིནཔ་ཤེས་ཐུབ། དེ་བས་ཉེ་འགྲམ་གྱི་ནགས་རྫོང་མཐུག་ས་ཞིག་ནས་ཉིན་འགར་ཡིབ་སྒུག་བྱེད་མགོ་བརྩམས།

དུས་ཚོད：2025.8.25

ཉིན་འདི་དག་ལ་ཐོ་རེངས་སྐར་ཆེན་མ་ཤར་གོང་ནས་གསའ་ཚང་ཉེ་འགྲམ་གྱི་ནགས་རྫོང་མཐུག་ས་ཞིག་ལ་འཛུལ་ཞིང་དབུགས་འབྱིན་རྔུབ་ལའང་སེམས་ཆུང་གིས་ཡིབ་སྒུག་བྱས། ཞོགས་པའི་ཉི་རྩེ་ས་ལ་འཕྲོས་མ་འཕྲོས་ཀྱི་མཚམས་སུ་གསའ་མས་ཕྲུ་གུ་སྒོར་ཁྲིད་འོང་ནས་ཞོགས་སྦྱོང་གི་ཚུལ་གྱིས་འགུལ་སྐྱོད་བྱས་མོད། སྐབས་དེར་བྲག་ཁུང་གི་དཀར་ས་ཧ་ཅང་གཉོམ་པས་བདག་ལ་མིག་གི་ལོངས་སྤྱོད་དང་སེམས་ཀྱི་དགའ་བདེའི་མྱོང་རོལ་ཙམ་ལས་པར་དང་བརྙན་དུ་ཕབ་ཐུབ་མ་བྱུང་།

མུ་མཐུད་དུ་སྒུག་ནས་ཕྱི་དྲོའི་ཉི་མ་ཐག་ཚད་ཀྱི་དུས་སུ་གསའ་ཚང་གི་སྒོ་ནས་བདག་ལ་ཅི་འདོད་ལྷུན་གྱིས་རྩེན་པའི་འཁྲབ་སྟོན་དངོས་སུ་མགོ་བརྩམས་ཤིང་། དེ་ནས་སེམས་པ་བྲེལ་ཞིང་ལག་པ་འཚུབ་པའི་རྔམ་ལེན་གྱི་མུར་པར་དང་བརྙན་གྱི་སྒམ་དུའང་རིན་ཆེན་ནོར་གྱིས་གཏམས་པའི་གཡང་རྟགས་འཁོར་རོ། །

དུས་ཚོད：2025.9.11

དགེ་རྒན་དུས་ཆེན་གྱི་ཉིན་མོ་དེར་བདག་གིས་ཧོ་ནན་རྫོང་ཏང་གི་སློབ་གྲྭའི་དགེ་རྒན་རྣམས་དང་ལྷན་དུ་དུས་ཆེན་ལ་རོལ་ཞིང་། ནམ་རྒྱུན་ལྟར་དུ་སྐྱེ་ཁམས་རིག་གནས་ཀྱིས་དབུ་ཁྱུད་བཙུགས་ཤིང་སྐྱེ་ཁམས་རིག་གནས་ཀྱིས་རྫོགས་ཚིག་བཀོད་པར་མ་ཟད། སང་ཉིན་གསའ་ཚང་གི་དངོས་བྲིས་ལེགས་འགྲུབ་འབྱུང་བའི་སྨོན་ཚིག་གང་མང་གསུང་། ནངས་མོ་དགེ་རྒན་རྣམ་པའི་སྨོན་ཚིག་རུམ་གང་བཅུག་ནས་གསའ་ཚང་ལ་ཤར་སེ་རྒྱུག་ཅིང་སྔོན་ལྟར་ནགས་གསེང་ནས་སྒུག སྟབས་ལེགས་པ་ཞིག་ལ་ཡུན་རིང་མ་འགོར་བར་འཁྲབ་སྟོན་དངོས་སུ་མགོ་བརྩམས།  རེབས་དེར་སྔོན་དང་མི་འདྲ་བར་འཁྲབ་ཚན་གསར་པ་རྐྱང་རྐྱང་སྟེ། བྲག་ངོས་སུ་འཛེག་པ་དང་། གོག་ནུར། འགྲེ་ལོག བདའ་རེས་སོགས་བྱས་ཏེ། རྩེད་སྟངས་ཀྱི་རྣམ་འགྱུར་རེ་རེ་ལས་ཀྱང་དགའ་སྤྲོའི་གཏམ་རྒྱུད་གང་མང་མངོན།

ཐེངས་དེའི་དངོས་བྲིས་ཟིན་ཐོ་ནི་རིན་ཐང་བྲལ་བའི་མིག་གི་དགའ་སྟོན་ཞིག་ཡིན་པར་མ་ཟད།མཐོ་སྒང་གི་རི་སྐྱེས་སྲོག་ཆགས་རྣམས་བློ་བདེ་བག་ཕེབས་དང་། འཆམ་མཐུན་ཞི་བདེའི་དཔལ་ལ་རོལ་བཞིན་པའི་དན་རྟགས་ལེགས་པོ་ཞིག་ཡིན་ངེས།