བྱེ་མའི་ཁུག་ལ་བསིལ་རླུང་གཡུག་པའི་སྐབས།། སྐྱེ་ཁམས་མཛེས་ལྗོངས་ལྷག་ཏུ་ལྟ་ན་སྡུག།

རྩོམ་སྒྲིག ལྷ་ཆེན་རྡོ་རྗེ། ཡོང་ཁུངས། མཚོ་སྔོན་བོད་ཡིག་གསར་འགྱུར། བཤེར་འབེབས། ཚེ་བརྟན་བཀྲ་ཤིས། 

 མཚོ་སྔོན་པོའི་བྱང་འགྲམ་གྱི་གསེར་གྱི་བྱེ་མའི་མུ་འབྲེལ་དེ་སྔོན་མ་ནང་བཞིན་མཛེས་པར་མངོན་ཞིང་། རི་ཆུའི་བར་དུ་སྔ་ས་ནས་རྣམ་པ་གསར་པ་ཞིག་མངོན་པར་བཏོད་ཡོད། མཚེའུ་དང་བྱེ་མ་ནི་མཛེས་ལྗོངས་ཁོ་ན་ཙམ་མ་ཡིན་པར། ས་ཁོངས་རྒྱུན་མཐུད་འཕེལ་རྒྱས་ལ་འདེགས་སྐྱོར་བྱེད་པ་དང་མང་ཚོགས་ཀྱི་ཡོང་འཕར་ཕྱུག་འགྱུར་ལ་སྐུལ་ཁྲིད་བྱེད་པའི་ཐོན་ཁུངས་ཀྱི་ལྷན་སྐྱེས་དངོས་གྲུབ་ཅིག་རེད།

  བྱེ་གཞུང་དང་མཚེའུ་ཆེན་པོ་ཕན་ཚུན་འཁྱུད་ནས། ལོ་རེའི་ཟླ6པའི་ཟླ་སྨད་ནས་ཟླ8པའི་བར་ནི། སྙན་ངག་གི་དོན་གྱིས་ཕྱུག་ཅིང་ཉམས་འགྱུར་ཕུན་སུམ་ཚོགས་པའི་ལྗོངས་གཟིགས་དུས་ཚིགས་ཤིག་རེད། བྱེ་མའི་ཁུག་གི་མཛེས་ལྗོངས་ཁུལ་དུ་ཡུལ་སྐོར་པ་མང་པོ་ཡོད་པ་དང་། བྱེ་ཆུ་མཉམ་གནས་ཀྱི་ཐུན་མོང་མ་ཡིན་པའི་མཛེས་ལྗོངས་ཁྲོད་མཐོ་སྒང་གི་སྐྱེ་ཁམས་མཛེས་སྡུག་དང་འཕྲད་དེ་མཐོང་ལམ་དུ་འཆར་ཡོད། ཕྱི་དྲོའི་དུས་སུ། མི་ཚོགས་རིམ་བཞིན་ཇེ་མང་དུ་སོང་ནས་མཛེས་ལྗོངས་ལྟ་སྐོར་ཁུལ་གྱི་སྒོ་འགྲམ་གྱི་ཟ་ཁང་དང་། ཡུལ་སྐོར་པར་ལེན་ཚོང་ཁང་། རིག་གནས་གསར་གཏོད་ཚོང་ཁང་བཅས་ལ་འདུ་ལོང་གི་འཁྲུག་ཆ་དོད་ཅིང་། སྐྱེ་ཁམས་ཡུལ་སྐོར་གྱི་གནས་ཀུན་ལ་གསོན་ཤུགས་རབ་ཏུ་འཕེལ་ཡོད།

 མཚོ་བྱང་བོད་རིགས་རང་སྐྱོང་ཁུལ་ཧའེ་ཡན་རྫོང་མཆིན་ཁུག་གཞུང་གྲོང་རྡལ་ཟུར་གསུམ་མཁར་སྡེ་བའི་སྡེ་མི་སྙན་དབྱངས་དང་གཅུང་མོ་གཉི་གས་མཛེས་ལྗོངས་ལྟ་སྐོར་ཁུལ་དུ་དམངས་ཕན་ཞབས་ཞུའི་ཚོང་ཁང་ཞིག་གཉེར་བཞིན་ཡོད་ཅིང་། ད་ལོ་ནི་ཚོང་ཁང་གཉེར་བའི་ལོ་གསུམ་པ་རེད། ཟླ6པ་ནས་བཟུང་། ཉིན་རེར་ཆ་སྙོམས་ཀྱིས་ཚོང་གཉེར་ཡོང་འབབ་བརྟན་པོའི་ངང་སྒོར500ཡས་མས་ལེན་ཐུབ་ཀྱི་ཡོད་ལ། མཛེས་ལྗོངས་ལྟ་སྐོར་ཁུལ་གྱི་འཕེལ་རྒྱས་ཀྱི་རྣམ་པ་བཟང་པོར་བརྟེན་ནས། ཡོང་འབབ་ལོ་རེ་བཞིན་གོང་ནས་གོང་དུ་འཕར་བཞིན་ཡོད།