རྐང་ཚ་རྫོང་གི་བོད་མཁར་བསུ་མ་ཞེས་པའི་ཡུལ་སྐོར་ལས་དོན་ཁང་གི་བྱ་དགའ་སྤྲོད་ཐབས། （ཚོད་ལྟའི་ལག་བསྟར། ） 

རྐང་ཚ་རྫོང་གི་བོད་མཁར་བསུ་མ་ཞེས་པའི་ཡུལ་སྐོར་ལས་དོན་ཁང་གི་

　　 བྱ་དགའ་སྤྲོད་ཐབས། （ཚོད་ལྟའི་ལག་བསྟར། ）  

 ཡོང་ཁུངས། རྐང་ཚ་རྫོང་ཡུལ་སྐོར་རྒྱང་སྒྲོག་བརྙན་འཕྲིན་ཅུ།

　ཡིག་བསྒྱུར།  རྐང་ཚ་རྫོང་མི་དམངས་སྲིད་གཞུང་བོད་སྐད་ཡིག་བྱ་བའི་ལྟེ་གནས  

 

ཞིང་ཆེན་ཨུ་ཡོན་ལྷན་ཁང་དང་ཞིང་ཆེན་སྲིད་གཞུང་གིས་དཔལ་འབྱོར་ཇེ་བརྟན་དུ་གཏོང་བར་བཏོན་པའི་སྲིད་ཇུས་དང་བྱེད་ཐབས་རབ་དང་རིམ་པ་ཁྱོན་ཡོངས་ནས་དོན་འཁྱོལ་ཡོང་བ་དང་། རྫོང་ཁོངས་ཀྱི་དཔལ་འབྱོར་སྒྲིག་གཞི་རྒྱུན་ཆད་མེད་པར་ཇེ་ལེགས་སུ་གཏོང་བ་དང་ས་ཁོངས་ཡོངས་ཀྱི་ཡུལ་སྐོར་འཕེལ་རྒྱས་ལ་སྐུལ་འདེད་ཤུགས་ཆེར་གཏོང་བ། ཡུལ་སྐོར་ཐོན་ལས་ཀྱིས་རྫོང་ཁོངས་ཀྱི་དཔལ་འབྱོར་ཁྲོད་བཟུང་བའི་བསྡུར་ཚད་མཐོ་རུ་གཏོང་བ། རྒྱལ་ནང་གི་ཡུལ་སྐོར་ལས་དོན་ཁང་ལ་རང་རེའི་རྫོང་དུ་ཡུལ་སྐོར་བའི་ཐོན་ཁུངས་ཧུར་ཐག་གིས་སྐྱེལ་འདྲེན་བྱ་རྒྱུར་ལྕག་སྐུལ་དང་ཁྲིད་སྟོན་བཅས་བྱེད་པ་དང་། སྔར་ལས་མང་པོའི་ཡུལ་སྐོར་བས་རྐང་ཚའི་རང་བྱུང་སྣོད་བཅུད་དང་རི་ཆུ་ནགས་གསུམ་ལ་མྱོང་རོལ་བྱེད་ཆེད། ཉ་དང་འདབ་ཆགས་ཀྱི་ཞིང་ཁམས། མཚོ་ངོགས་བོད་མཁར་རྐང་ཚ་ཞེས་པའི་ཡུལ་སྐོར་ཚོང་རྟགས་གྲགས་ཅན་དེ་ཇེ་ལེགས་སུ་བཏང་ནས།རྐང་ཚའི་རིག་གནས་ཡུལ་སྐོར་དཔལ་འབྱོར་མགྱོགས་མྱུར་ངང་འཕེལ་རྒྱས་སུ་འགྲོ་བར་སྐུལ་འདེད་གཏོང་དགོས།   《མཚོ་སྔོན་ཞིང་ཆེན་གྱི་རིག་གནས་དང་ཡུལ་སྐོར་ཐོན་ལས་ཀྱི་བྱ་དགའ་དང་ལག་བསྟར་ཞིབ་སྲོལ（གནས་སྐབས་ལག་བསྟར་སྲོལ་ཡིག）》དང《མཚོ་བྱང་ཁུལ་གྱི་རིག་གནས་དང་ཡུལ་སྐོར་ལས་རིགས་མགྱོགས་མྱུར་ངང་སླར་གསོ་དང་འཕེལ་རྒྱས་སུ་གཏོང་རྒྱུའི་བྱ་ཐབས་ཁག་བཅུ》སོགས་ཀྱི་ཡིག་ཆའི་དགོངས་དོན་གཞིར་བཟུང་ཞིང་།　རང་རེའི་རྫོང་གི་དོན་དངོས་དང་ཟུང་འབྲེལ་བྱས་ནས་བྱ་ཐབས་འདི་དམིགས་སུ་བཀར་ནས་བཟོས་པ་ཡིན། 　　

དོན་ཚན་དང་པོ།  བྱ་དགའ་སྤྲོད་ཡུལ།  　 

བྱ་ཐབས་འདིའི་བྱ་དགའ་ཐོབ་ཡུལ་ནི་ཞིང་ཆེན་ཕྱི་ནང་གི་ཡུལ་སྐོར་བ་སྒྲིག་འཛུགས་བྱས་ཏེ་ཚོགས་པའི་རྣམ་པས་ཡུལ་སྐོར་དུ་བསླེབ་པ་དང་། བྱས་རྗེས་མངོན་གསལ་ཡོད་པའི་རྫོང་ཕྱིའི་ཚོགས་པ་སྒྲིག་འཛུགས་བྱེད་མཁན་གྱི་ཡུལ་སྐོར་ལས་དོན་ཁང་། 　　

དོན་ཚན་གཉིས་པ།  བྱ་དགའི་ཆ་རྐྱེན། 　　

བྱ་དགའ་རེ་ཞུ་བྱེད་མཁན་གྱི་ཡུལ་སྐོར་ལས་དོན་ཁང་ལ་ངེས་པར་དུ་གཤམ་གྱི་ཆ་རྐྱེན་དག་ཚང་དགོས། 　　

༼ གཅིག ༽ངེས་པར་དུ་རྒྱལ་ཁབ་འབྲེལ་ཡོད་སྲིད་འཛིན་ལས་ཁུངས་ཀྱི་ཆོག་མཆན་ཐོབ་ནས་བཙུགས་པའི་ཁྲིམས་མཐུན་གྱི་ཡུལ་སྐོར་ཁེ་ལས་ཡིན་དགོས། 　　

༼ གཉིས ༽ལས་རིགས་ཀྱི་དོ་དམ་དང་ལེན་བྱེད་དགོས་པ་མ་ཟད། ཡུལ་སྐོར་དོ་དམ་སྡེ་ཁག་གི་ལོ་བཤེར་བརྒྱུད་དགོས། 　　

༼ གསུམ　༽ལོ་འཁོར་གཅིག་གི་རིང་ལ་ཡུལ་སྐོར་དོ་དམ་སྡེ་ཁག་གི་ཆད་པ་ཕོག་མེད་པ། 　　

༼ བཞི ༽ལོ་འཁོར་གཅིག་གི་རིང་ལ་བདེ་འཇགས་དང་ཞབས་ཞུའི་སྤུས་ཚད་ཐད་འགན་འཁྲིའི་ལས་འཛོལ་ཚབས་ཆེན་དང་ཡུལ་སྐོར་ཞུ་གཏུག་རྩོད་གཞི་ཚབས་ཆེན་ཐེབས་མེད་པ། 　　

༼ ལྔ ༽གཞུང་དྲང་ཡིད་རྟོན་དང་གཉེར་སྐྱོང་ཚད་ལྡན་ཡོང་བ་བྱས་ཏེ་ལུགས་མཐུན་མིན་པའི་འགྲན་རྩོད་ཀྱི་བྱ་སྤྱོད་མི་ཡོང་བ་བྱ་དགོས། 　　

དོན་ཚན་གསུམ་པ།  བྱ་དགའི་ཚད་གཞི།　　 

ཡུལ་སྐོར་ལས་དོན་ཁང་གིས་ཡུལ་སྐོར་སྣེ་ཁྲིད་ཀྱི་བྱ་དགའ་སྤྲོད་པའི་བྱ་ཐབས་ཀྱིས་ལོ་འཁོར་གྱི་ཚོགས་པ་སྒྲིག་འཛུགས་ཀྱི་བྱ་དགའི་ལམ་ལུགས་ལྟར་ལག་བསྟར་ནས་བྱ་དགའི་མ་དངུལ་རྐང་ཚ་རྫོང་ཁོངས་ཡོངས་ཀྱི་ཡུལ་སྐོར་འཕེལ་རྒྱས་མ་དངུལ་ཁྲོད་ནས་བཀོད་སྒྲིག་བྱེད་པ། 　　

རྐང་ཚ་རྫོང་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུ་དང་མཉམ་འབྲེལ་གྲོས་མཐུན་བཞག་པའི་ཞིང་ཆེན་ཕྱི་ནང་གི་ཡུལ་སྐོར་ལས་དོན་ཁང་གིས་ཡུལ་སྐོར་བ་ཁྲིད་དེ་བསླེབ་པ་དག་གིས། ངེས་པར་དུ་རྐང་ཚར་མ་ཐོན་པའི་ཉིན་དང་པོ་ནས་གཉིས་པའི་བར་བརྙན་སྐྱེལ་བརྒྱུད་དེ་རྫོང་ཡུལ་སྐོར་ཞབས་ཞུ་ལྟེ་གནས་སུ་ཐོ་འགོད་བྱེད་དགོས་པ་དང་། 　ཕྱིར་ལོག་པའི་སྔོན་དུ་འཁོར་ཐེངས་དེའི་ཞག་སྡོད་འབྱོར་ཐོའམ་ཡང་ན་ལྗོངས་ཁུལ་གྱི་འཛིན་བྱང་སོགས་འབྲེལ་ཡོད་རྒྱུ་ཆ་མཁོ་འདོན་བྱེད་དགོས། རང་རྫོང་གི་སྐར་མ་རིམ་པའི་མགྲོན་ཁང་དུ་ཞག་སྡོད་དགོང་མ་གཅིག་གི་ཡན（དགོང་མ་གཅིག་འདུ）ནམ་ཡང་ན་རང་རྫོང་དུ་ཡུལ་སྐོར་ལྗོངས་ཁུལ་གཅིག་གི་ཡན（ལྗོངས་ཁུལ་གཅིག་འདུ）གྱི་འཛིན་ཡིག་ཡོད་པའི་ཡུལ་སྐོར་ལས་དོན་ཁང་ལ། ལོ་འཁོར་གཅིག་རིང་ཚོགས་པ་སྒྲིག་འཛུགས་བྱས་ཏེ་ཡུལ་སྐོར་བའི་མི་གྲངས་རིམ་རྩིས་བྱས་ན་མི་ཐེངས1000གི་ཡན་ཟིན་པར་ཡུལ་སྐོར་བའི་མི་གྲངས་ལྟར་མི་ཐེངས་རེར་སྒོར2ཀྱི་བྱ་དགའ་སྤྲོད་རྒྱུ་དང་། ལོ་འཁོར་གཅིག་རིང་ཚོགས་པ་སྒྲིག་འཛུགས་བྱས་ཏེ་ཡུལ་སྐོར་བའི་མི་གྲངས་རིམ་རྩིས་བྱས་ན་མི་ཐེངས5000ཡི་ཡན་ཟིན་པ་ལ་ཡུལ་སྐོར་བའི་མི་གྲངས་ལྟར་མི་ཐེངས་རེར་སྒོར3ཀྱི་བྱ་དགའ་སྤྲོད་རྒྱུ།  ལོ་འཁོར་གཅིག་རིང་ཚོགས་པ་སྒྲིག་འཛུགས་བྱས་ཏེ་ཡུལ་སྐོར་བའི་མི་གྲངས་རིམ་རྩིས་བྱས་ན་མི་ཐེངས10000ཡི་ཡན་ཟིན་པ་ལ་ཡུལ་སྐོར་བའི་མི་གྲངས་ལྟར་མི་ཐེངས་རེར་སྒོར5ཡི་བྱ་དགའ་སྤྲོད་རྒྱུའོ།། ཡུལ་སྐོར་བ་སྒྲིག་འཛུགས་བྱས་ཏེ་རང་རྫོང་གི་ལྗོངས་ཁུལ་དུ་ལྟ་སྐོར་དུ་ཕྱིན་པ་དང་སྐར་མ་རིམ་པའི་མགྲོན་ཁང་དུ་ཞག་སྡོད་བྱས་པའི་ཡུལ་སྐོར་ལས་དོན་ཁང་ལ་གོང་གི་དོན་ཚན་ལྟར་དུ་ཐེངས་དེའི་མི་གྲངས་ལྟར་བརྩི་རྒྱུ། 

དོན་ཚན་བཞི་བ།  ལོ་རེའི་ཡུལ་སྐོར་ཚོགས་པའི་བྱ་དགའི་སྙན་ཞུ།

ཞིང་ཆེན་ཕྱི་ནང་གི་ཡུལ་སྐོར་ཚོགས་པའི་བྱ་དགའི་སྙན་ཞུ་དེ་ཞིང་ཆེན་ཕྱི་ནང་གི་ཡུལ་སྐོར་ཚོགས་པ་སྒྲིག་འཛུགས་བྱེད་མཁན་ནམ་ཡུལ་སྐོར་ལས་དོན་ཁང་གིས་ལོ་རེའི་ཟླ10བའི་ཚེས10ཉིན་ནས་བཟུང་རྫོང་གི་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུ་ལ་ཡུལ་སྐོར་སྣེ་ལེན་པའི་བྱ་དགའི་རེ་ཞུ་འབུལ་དགོས་ལ། རེ་ཞུ་བྱེད་མཁན་གྱི་ཡུལ་སྐོར་ཚོགས་པས་གཤམ་གསལ་གྱི་རྒྱུ་ཆ་དག་མཁོ་འདོན་བྱེད་དགོས་ཏེ། རྫོང་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུ་དང་མཉམ་འབྲེལ་བྱས་པའི་གྲོས་མཐུན་ཡི་གེ་དང་།　ལོ་འཁོར་ཧྲིལ་བོར་སྣེ་ལེན་བྱས་པའི་གཞི་གྲངས། ཚོགས་པ་རེ་རེའི་ཡུལ་སྐོར་བའི་མིང་ཐོ་དང་ཐོབ་ཐང་ལག་ཁྱེར་གྱི་བསྐྱར་དཔར་དང་འགྲོ་འོང་བཀོད་སྒྲིག་རེའུ་མིག མཛེས་ལྗོངས་ཁུལ་གྱི་འཛིན་བྱང་དང་ཡང་ན་སྐར་མ་རིམ་པའི་མགྲོན་ཁང་གི་ཁང་རིན་འབྱོར་ཐོ་བཅས་འཇོག་དགོས་ལ། དེ་ནས་རྫོང་རིག་གནས་ལུས་རྩལ་ཡུལ་སྐོར་རྒྱང་སྒྲོག་ཅུ་ཡིས་ཟླ11ཚེས30ཉིན་གྱི་གོང་དུ་ཞིབ་བཤེར་གཏན་འབེབས་བྱེད་དགོས། ལོ་དེའི་བྱ་དགའ་རེ་ཞུ་བྱས་རྗེས་ཐོན་པའི་གཞི་གྲངས་དེ་ལོ་རྗེས་མའི་འགྲུལ་པ་ནང་འདྲེན་དང་སྣེ་ལེན་བྱེད་པའི་གཞི་གྲངས་ནང་བརྩི་ངེས་ཡིན།

དོན་ཚན་ལྔ་པ།  བྱ་དགའ་ཞིབ་བཤེར་གཏན་འབེབ་དང་མ་དངུལ་གཏོང་སྤྲོད། 

བྱ་དགའ་དང་ཞིབ་བཤེར་གཏན་འབེབས་ཀྱི་དམིགས་ཚད་ཆ་རྐྱེན་དང་མཐུན་པའི་ཡུལ་སྐོར་ལས་དོན་ཁང་གིས་ལོ་འཁོར་བྱ་དགའི་རེ་ཞུའི་རེའུ་མིག་དང་འབྲེལ་ཡོད་རྒྱུ་ཆ་སྤྲད་རྗེས། རྫོང་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུ་དང་རྫོང་ནོར་སྲིད་ཅུ་གཉིས་ཀྱིས་མཉམ་དུ་འཁྲུལ་མེད་ཞིབ་དཔྱད་བྱས་རྗེས་ལོ་རེའི་ཟླ12པར་འོས་མཐུན་གྱི་བྱ་དགའི་དངུལ་སྤྲོད་ངེས་ཡིན།

དོན་ཚན་དྲུག་པ།  ལྟ་རྟོག་དང་འགན་འཁྲི་ཞིབ་བཤེར། 

ཡུལ་སྐོར་ལས་དོན་ཁང་ལ་ལྟ་རྟོག་དང་འགན་འཁྲི་ཞིབ་བཤེར་བྱེད་སྐབས་འབྲེལ་ཡོད་ཀྱི་དཔྱད་གཞིའི་རྒྱུ་ཆ་དག་འདོན་སྤྲོད་ཡང་དག་བྱེད་དགོས་པ་མ་ཟད། རྫོང་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུ་ལ་རམ་འདེགས་ཧུར་ཐག་གིས་བྱས་ནས་འབྲེལ་ཡོད་ཀྱི་དཔྱད་གཞིའི་ཡིག་རིགས་ཀྱི་ཞིབ་བཤེར་ལས་དོན་ལེགས་སྒྲུབ་བྱེད་དགོས། ཐོ་འགོད་དང་མི་འཚམ་པ་དང་། རེ་ཞུའི་དུས་ཚོད་ལས་བརྒལ་བའམ་ཡང་ན་གཏན་འཁེལ་བྱས་པའི་དུས་ཚོད་ནང་འབྲེལ་ཡོད་རྒྱུ་ཆ་འདོན་སྤྲོད་མི་བྱེད་པའི་ཡུལ་སྐོར་ལས་དོན་ཁང་ལ་བྱ་དགའ་སྤྲོད་རྒྱུ་མིན།（རྫོང་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུ་ཡིས་དུས་བཅད་ངེས་གཏན་མེད་པར་སྐབས་བསྟུན་ཟུར་བཤེར་བྱེད་ངེས།） རྫོང་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུ་ཡིས་བྱ་དགའ་ཐོབ་པའི་ཡུལ་སྐོར་ལས་དོན་ཁང་གི་མིང་ཐོ་མཚོ་སྔོན་ཡུལ་སྐོར་སྲིད་དོན་དྲ་ཐོག་ཏུ་ཁྱབ་བསྒྲགས་བྱེད་སྲིད་ལ། ཡུལ་སྐོར་ལས་རིགས་ཕྱོགས་ཀྱི་ལྟ་སྐུལ་དང་ཐེར་འདོན་གོང་ཞུ་ཡང་དུས་ལྟར་དང་ལེན་བྱེད་རྒྱུ་ཡིན་པས། རྫུན་བཟོ་བྱེད་མཁན་སོགས་ཀྱི་ཡུལ་སྐོར་ལས་དོན་ཁང་ཡོད་ཚེ།　གང་དེའི་བྱ་དགའི་དངུལ་ཕྱིར་བསྡུ་རྒྱུ་བྱེད་རྒྱུ་ཡིན་པ་མ་ཟད།　ལོ་གསུམ་ནང་བྱ་དགའི་སྙན་ཞུ་འབུལ་བའི་ཐོབ་ཐང་མེད་པར་བཟོ་ངེས། ལོ་འཁོར་ནང་རྐང་ཚ་རྫོང་དུ་ཡུལ་སྐོར་བདེ་འཇགས་ལས་འཛོལ་ཚབས་ཆེན་བྱུང་བ་དང་ཡུལ་སྐོར་ཞབས་ཞུའི་སྤུས་ཚད་ཀྱི་རྐྱེན་པས་ཞུ་གཏུག་ཆེན་པོ་བརྒྱབ་པའི་ཡུལ་སྐོར་ལས་དོན་ཁང་ལ་ལོ་དེའི་བྱ་དགའི་སྙན་ཞུའི་ཐོབ་ཐང་མེད་པར་བཟོ་རྒྱུ།

དོན་ཚན་བདུན་པ།  ཟུར་མཆན།  

  ༡.བྱ་ཐབས་འདི་ཁྱབ་བསྒྲགས་བྱས་པའི་ཉིན་ནས་བཟུང་ལག་བསྟར་བྱ་རྒྱུ་དང་། གོ་ཆོད་དུས་ཡུན་ལོ2ཡིན།

  ༢.བྱ་ཐབས་འདིར་རྐང་ཚ་རྫོང་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུ་ཡིས་འགྲེལ་བཤད་དང་འགན་ཁུར་བྱས་ཡོད།

　　　　　　　　　　　　　　།