མཚོ་བྱང་ཁུལ་ནི་ཞིང་ཆེན་ཡོངས་ཀྱི་མཐོ་སྒང་བོད་ལུག་དང་ནས། ལོག་དཀར་བཅས་སོན་རྒྱུད་མཁོ་འདོན་རྟེན་གཞི་ཆེ་ཤོས་སུ་གྱུར་པ།
རྩོམ་སྒྲིག ཚེ་གཟུངས་སྐྱིད། ཡོང་ཁུངས། མཚོ་བྱང་མདོ་ལ་བོད་ཡིག་ཚགས་པར། བཤེར་འབེབས། ཚེ་བརྟན་བཀྲ་ཤིས།
ཉེ་བའི་ལོ་ཤས་རིང་མཚོ་བྱང་ཁུལ་གྱིས་འདེམས་གསོ་དང་འདེབས་འཛུགས་ལས་རིགས་འཕེལ་རྒྱས་མགྱོགས་པོ་གཏོང་བ་དང་། ཀྲུང་དབྱང་དང་ཞིང་ཆེན་ཏང་ཨུ། ཞིང་ཆེན་སྲིད་གཞུང་གི་འབྲེལ་ཡོད་འདེམས་གསོ་དང་འདེབས་འཛུགས་ལས་རིགས་དར་རྒྱས་གཏོང་རྒྱུའི་སྐོར་གྱི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་གཏིང་ཟབ་བྱས་ཏེ《མཚོ་བྱང་ཁུལ་གྱི་མཐོ་སྒང་བོད་ལུག་སྲུང་སྐྱོབ་སྲོལ་ཡིག》དང《མཚོ་བྱང་ཁུལ་གྱི་ཕྱུགས་རིགས་དང་ཕྱུགས་ཁྱུ་དོ་དམ་བྱ་ཐབས》།《མཚོ་བྱང་ཁུལ་གྱི་ནས་ཀྱི་ཐོན་ལས་འཕེལ་རྒྱས་ཇེ་མགྱོགས་སུ་གཏོང་རྒྱུའི་ཇུས་གཞི（2021ལོ་ནས2025ལོའི་བར）》《མཚོ་བྱང་ཁུལ་གྱི་ནས་དང་ལོག་དཀར་ཐོན་ལས་འཕེལ་རྒྱས་གཏོང་བའི་འགུལ་སྤྱོད་འཆར་གཞི》བཅས་བཟོས་ནས་བཏོན་ཏེ་བོད་ལུག་དང་ནོར་གནག ནས། ལོག་དཀར། གཟན་རྩྭ་སོགས་ཞིང་ལས་ཀྱི་འདེབས་འཛུགས་ཐོན་ཁུངས་སྲུང་སྐྱོབ་བེད་སྤྱོད་དང་སོན་རྒྱུད་འདེམས་གསོ་བཟོ་སྐྲུན་ལ་ཤུགས་བསྣན་ནས་ལོ་ལྟར་ནོར་གནག་དང་བོད་ལུག་གི་རྒྱུད་བཟང་ཕྱུགས་རིགས་ཁྲི1ལྷག་ཙམ་དང་ནས་དང་ལོག་དཀར་ཏུན་ཁྲི1.5ལྷག་ཙམ་ཕྱིར་གཏོང་བྱས་ཏེ་ཞིང་ཆེན་ཡོངས་ཀྱི་མཐོ་སྒང་བོད་ལུག་དང་ནས། ལོག་དཀར་བཅས་ཀྱི་སོན་རྒྱུད་མཁོ་འདོན་རྟེན་གཞི་ཆེ་ཤོས་སུ་གྱུར་ཡོད་པ་རེད།
བོད་ལུག་དཀར་པོའི་རྒྱུད་བཟང་འདེམས་གསོའི་བཟོ་སྐྲུན་མུ་མཐུད་ལག་བསྟར་བྱས་ནས་བོད་ལུག“ལོ་གཉིས་ནང་ཐེངས་གསུམ་བཙས་པ”དང“མང་བཙས་བོད་ལུག”ལག་རྩལ་ཞིབ་འཇུག་ཁྱབ་གདལ་གཏོང་རྒྱུར་ཤུགས་བསྣན་ནས“ཁུལ་དུ་ཚན་རྩལ་དཔེ་སྟོན་གླིང་ཡོད་པ་དང་རྫོང་དུ་རྒྱུད་བཟང་གསོ་སྤེལ་བྱ་ཡུལ་ཡོད་པ། ཡུལ་ཚོ་རུ་རྒྱུད་བཟང་གསོ་སྤེལ་རྟེན་གཞི་ཡོད་པ། སྡེ་བ་རུ་རྒྱུད་བཟང་འདེམས་གསོ་རྟེན་གཞི་ཡོད་པ”བཅས་རིམ་པ་བཞིའི་རྒྱུད་བཟང་གསོ་སྤེལ་མ་ལག་དང“རིམ་པ་དབྱེ་ནས་གཅིག་སྡུད་དང་ཁྱུ་བགོས་ནས་གསོ་སྤེལ། གཅིག་གྱུར་ཐོག་བེད་སྤྱོད”བཅས་ཀྱི་སོན་བཟང་འདེམས་གསོའི་རྣམ་པ་ཞིག་ཆགས་པར་བྱས་ནས་ཁྱད་ལྡན་ཐོན་ལས་རྟེན་གཞི་ཅན་དང་གཞི་ཁྱོན་ཅན། རྒྱུད་བཟང་ཅན་བཅས་མངོན་འགྱུར་ཡོང་བར་བྱས་ཡོད། ཁུལ་ཡོངས་སུ་ཕྱུགས་རྒྱུད་སྤེལ་ཡུལ9དང་ལྟེ་བའི་ཁྱུ་ཚོགས221། ཕྱུགས་ཟོག82389། མོ་ཕྱུགས53236བཅས་ཡོད་ཅིང་། རིམ་རྩིས་བྱས་ན་བོད་ལུག“ལོ་གཉིས་ནང་ཐེངས་གསུམ་བཙས་པའི”གསོ་སྤེལ་བྱ་བ་ཁྱབ་གདལ་བཏང་ནས་ཁྲི200ཡན་གསོ་སྤེལ་བྱས་ཡོད། 2021ལོ་ནས2023ལོའི་བར་ཁུལ་ཡོངས་ཀྱི་རྒྱུད་བཟང་བོད་ལུག་ཕྱུགས་རྒྱུད12325མཁོ་འདོན་བྱས་པ་དང་ཆ་སྙོམས་ལོ་རེར་ཕྱུགས་རྒྱུད4108མཁོ་འདོན་བྱས་པ་དེ་ནི་ཞིང་ཆེན་ཡོངས་ཀྱི་མཐོ་སྒང་བོད་ལུག་ཕྱུགས་རྒྱུད་མཁོ་འདོན་རྟེན་གཞི་ཆེ་ཤོས་སུ་ཆགས་ཡོད་པ་རེད།
“མཐོ་གྲང་ཐན་གསུམ”གྱི་གཞི་རྩའི་གནམ་གཤིས་ཀྱི་ཁྱད་ཆོས་ལ་གཞི་ཚུགས་ཏེ་ནས་ཀྱི་ས་བོན་འདེམས་གསོ་དང་། ས་བོན་བཟོ་སྐྲུན། ལྗང་མདོག་ཐོན་སྐྱེད་ལག་རྩལ་བཅས་ལ་བརྟེན་ནས་ནས་ཀྱི་ས་བོན་རྟེན་གཞི་འཛུགས་སྐྲུན་བྱེད་ཤུགས་ཆེ་རུ་བཏང་སྟེ་ནས་ཀྱི་ཐོན་སྐྱེད་ཆུ་ཚད་མཐོ་རུ་བཏང་པ་དང་། ནས་ཀྱི་ལས་སྣོན་ཐོན་ལས་སྦྲེལ་ཐག་སྣུར་བསྲིང་བྱ་རྒྱུར་སྐུལ་འདེད་བཏང་། 2023ལོར་ཁུལ་ཡོངས་སུ་ནས་ཀྱི་ས་བོན་ལྟེ་བའི་གསོ་སྤེལ་རྟེན་གཞི་མུའུ་ཁྲི5བསྐྲུན་པ་དང་། “ཁྲི་སྟོང་བརྒྱ་བཅུའི”ས་བོན་རྟེན་གཞི15བསྐྲུན་པ། ས་བོན་ཐོན་སྐྱེད་ཀྱི་ཆེད་ལས་མཉམ་ལས་ཁང20ལ་རོགས་སྐྱོར་བྱས་པ། སོན་བཟང་ཅན་དུ་འགྱུར་ཚད98%ཡན་ཟིན་པ། ལས་རིགས་ཀྱི་གཞི་གྲངས་བསྡོམས་རྩིས་ལ་གཞིགས་ན། 2023ལོར་མཚོ་བྱང་གི་ནས་འདེབས་ཁྱོན་མུའུ་ཁྲི28.46དང་། སྤྱིའི་ཐོན་འབབ་ཏུན་ཁྲི7.32ལ་སླེབས་ཡོད། ཆ་སྙོམས་མུའུ་རེའི་ཐོན་འབབ་སྤྱི་རྒྱ257.2ཟིན་ནས་ལོ་ལྟར་གྱི་འདེབས་ཁྱོན་གྱིས་ཞིང་ཆེན་ཡོངས་ཀྱི་ནས་འདེབས་ཁྱོན་གྱི20%དང་སྤྱིའི་ཐོན་འབབ་བསྡོམས་འབོར་གྱི30%ཡན་བཟུང་ཡོད། མཚོ་བྱང་ཁུལ་འདེམས་གསོའི་ནང་ཞུགས་པའི“ཁུ་ནུ་ཨང14པའི”ནས་ནི་མཚོ་སྔོན་ཞིང་ཆེན་གྱི་ནས་ཀྱི་རིགས་གཙོ་བོ་ཞིག་ཏུ་གྱུར་ཞིང་། འདེབས་ཁྱོན་གྱིས་ཞིང་ཆེན་ཡོངས་ཀྱི་ནས་འདེབས་ཁྱོན་གྱི50%ཙམ་བཟུང་བ་དང་། “འཇུ་ལག་གི་ནས”ལ་རྒྱལ་ཁའི་ངང་རྒྱལ་ཁབ་ཀྱི་ཞིང་ལས་ཐོན་རྫས་ཀྱི་ས་ཁམས་མཚོན་རྟགས་ཐོབ་སྟེ། ལོ་ལྟར་ཀན་སུའུ་དང་སི་ཁྲོན། བོད་ལྗོངས་སོགས་སུ་ནས་ཀྱི་ས་བོན་ཏུན་ཁྲི0.4མཁོ་འདེབས་བྱས་ཤིང་། དེ་ཞིང་ཆེན་ཡོངས་ཀྱི་ནས་ཀྱི་ས་བོན་མཁོ་འདོན་རྟེན་གཞི་ཆེ་ཤོས་སུ་གྱུར་ཡོད།
