རྐང་ཚས་རྫོང་ཕྱིའི་ནོར་ལུག་ཤ་ཐད་ཚོང་ཁང་ལ་བྱ་དགའ་སྤྲོད་རྒྱུ་རེད།

 རྐང་ཚ་རྫོང་གི་རྫོང་ཁོངས་ཕྱི་ནས་ཐད་ཚོང་ཁང་གཉེར་བར་བྱ་དགའ་མཐོ་ཤོས་སྒོར་ཁྲི32.3སྤྲོད་རྒྱུ་རེད།

ཉེ་ཆར་མཚོ་བྱང་བོད་རིགས་རང་སྐྱོང་ཁུལ་རྐང་ཚ་རྫོང་གིས<<རྐང་ཚ་རྫོང་གིས་རྫོང་ཁོངས་ཕྱི་ནས་ནོར་ལུག་ཤ་ཐད་ཚོང་ཁང(ཐད་ཚོང་ས་ཚིགས)འཛུགས་པའི་ཁ་གསབ་དང་བྱ་དགའ་སྤྲོད་ཐབས(ཚོད་ལྟའི་ལག་བསྟར)>>བཏོན་ནས་རྐང་ཚ་རྫོང་གི་རྫོང་ཁོངས་ཕྱི་ནས་བཙུགས་པའི་མཚོ་སྔོན་པོའི་ནོར་གནག་དང་བོད་ལུག་ཤ་གཉེར་སྐྱོང་བྱ་རྒྱུ་གཙོ་བོར་བྱེད་པའི་ཐད་ཚོང་ཁང་སྣ་ཚོགས(ཐད་ཚོང་ས་ཚིགས)དང་། རྒྱ་ཁོག་ཟ་ཁང་། བསྲེགས་ཟས་ཁང་། ཉམས་ལེན་ཚོང་ཁང་བཅས་ཀྱིས་ཁ་གསབ་བྱ་དགའ་མཐོ་ཤོས་སྒོར་ཁྲི32.3ལོངས་སྤྱོད་བྱས་ཆོག་པ་རེད།

ཁ་གསབ་མ་དངུལ་ནང་གཙོ་བོ་སྒོ་བྱང་གི་མཚོན་རྟགས་དང་འཁྱགས་སྦྲེལ་སྒྲིག་ཆས། ཚོང་ཁང་གླ་གཏོང་། གློག་རྡུལ་བརྡ་ཁྱབ་སྒྲིག་ཆས་དང་གྱོན་ཆས་ཁ་གསབ་བཅས་ཚུད་ཡོད། བྱ་དགའི་མ་དངུལ་དེ་གཙོ་བོ་ཐད་ཚོང་ཁང(ཐད་ཚོང་ས་ཚིགས)སོ་སོའི་ལོ་རེའི་ཕྱིར་ཚོང་བྱེད་ཚད་ལ་གཞིགས་ནས་གཏན་འཁེལ་བྱེད་རྒྱུ་ཡིན་ཞིང་། ལོ་རེའི་ཕྱིར་འཚོང་དངུལ་གྲངས་སྒོར་ཁྲི80(དེའི་ནང་ཚུད)ནས་སྒོར་ཁྲི300བར་ཡིན་ན་ཐེངས་གཅིག་རང་བཞིན་གྱི་བྱ་དགའ་སྒོར་ཁྲི3སྤྲོད་པ་དང་། སྒོར་ཁྲི300(དེའི་ནང་ཚུད)ནས་སྒོར་ཁྲི500བར་ཡིན་ན་ཐེངས་གཅིག་རང་བཞིན་གྱི་བྱ་དགའ་སྒོར་ཁྲི6སྤྲོད་པ། སྒོར་ཁྲི500(དེའི་ནང་ཚུད)ཡན་ཡིན་ན་ཐེངས་གཅིག་རང་བཞིན་གྱི་བྱ་དགའ་སྒོར་ཁྲི10སྤྲོད་རྒྱུ་རེད། ཐད་ཚོང་ཁང(ཐད་ཚོང་ས་ཚིགས)སོ་སོས་ཕྱིར་ཚོང་བྱས་པའི་ནོར་ལུག་གི་ཐོན་རྫས་དེ་ངེས་པར་དུ་ནོར་གནག་དང་བོད་ལུག་གི་ཤ་ཡིན་དགོས་པ་དང་ཕྱིར་ཚོང་བྱས་པའི་ཐོན་རྫས་གཞན་དག་ཀྱང་རྐང་ཚའི་ཁྱད་ལྡན་ཞིང་ཕྱུགས་ཐོན་རྫས་ཡིན་དགོས་ལ། རྒྱལ་ཁབ་ཀྱི་འབྲེལ་ཡོད་ཚད་གཞི་དང་ཞིང་ཕྱུགས་ཐོན་རྫས་གཞན་དག་གི་སྤུས་ཚད་བདེ་འཇགས་ཀྱི་གཏན་འབེབས་དང་མཐུན་དགོས་པར་མ་ཟད་བླང་བྱ་ལྟར"མཚོ་སྔོན་པོའི་ནོར་གནག་དང་བོད་ལུག་ཤ་ཐད་ཚོང་ཁང(ཐད་ཚོང་ས་ཚིགས)"གི་སྒོ་བྱང་དང་བྱང་བུ་གཅིག་གྱུར་ཡིན་དགོས།

རྒྱུས་ལོན་བྱུང་པ་ལྟར་ན། ཁ་གསབ་བྱ་དགའི་མ་དངུལ་སྙན་ཞུ་དེ"ཚོང་བདག་གིས་སྙན་ཞུ་དང་གཅིག་སྡུད་ཞིབ་བཤེར"གྱི་རྩ་དོན་གཞིར་བཟུང་ནས། ཁ་གསབ་ཀྱི་ཆ་རྐྱེན་དང་མཐུན་པའི་ཐད་ཚོང་ཁང(ཐད་ཚོང་ས་ཚིགས)གིས་གཉེར་སྐྱོང་བྱས་ནས་ཟླ6འགོར་རྗེས་སྙན་ཞུ་བྱེད་ཆོག་པ་དང་བྱ་དགའི་ཆ་རྐྱེན་དང་མཐུན་པའི་ཐད་ཚོང་ཁང(ཐད་ཚོང་ས་ཚིགས)གིས་ལོ་རེའི་ཟླ12པའི་ཚེས6ནས་ཚེས15ཉིན་བར་རྐང་ཚ་རྫོང་ཞིང་ཕྱུགས་ཆུ་བེད་དང་ཚན་རྩལ་ཅུས་ལ་སྙན་ཞུ་བྱེད་དགོས།