“རྐང་ཚའི་མཚན་ལྗོངས”ཞེས་པ་བརྗོད་དོན་བྱས་པའི་སྐོར་སྐྱོད་ངོ་མཚར་འཁྲབ་སྟོན་མགོ་ཚུགས།

རྩོམ་སྒྲིག་པ། ལྷ་ཆེན་རྡོ་རྗེ། ཡོང་ཁུངས། རྐང་ཚ་རྫོང་མི་རིགས་སྐད་ཡིག་ལས་དོན་ལྟེ་གནས། བཤེར་འབེབས། ཚེ་བརྟན་བཀྲ་ཤིས། 

     ཟླ9པའི་ཚེས13ཉིན་གྱི་དགོང་མོར། “མཁར་གྲོང་གཉིས་མཉམ་འགུལ། གསའ་ཁྲོམ་དུ་སྐོར་སྐྱོད།རྐང་ཚ་ལ་འཕྲད་པ་སྟེ་རྐང་ཚའི་མཚན་ལྗོངས”ཞེས་པ་བརྗོད་དོན་བྱས་པའི་མི་རིགས་དམངས་སྲོལ་སྐོར་སྐྱོད་འཁྲབ་སྟོན་དེ་གསའ་ཁྲོམ་དུ་མགོ་ཚུགས། ཐེངས་འདིའི་བྱེད་སྒོས་རིག་གནས་སྦྲེལ་ཐག་བྱས་ཏེ་ཟི་ལིང་གྲོང་ཁྱེར་མཁར་བྱང་ཁུལ་དང་མཚོ་བྱང་བོད་རིགས་རང་སྐྱོང་ཁུལ་རྐང་ཚ་རྫོང་གཉིས་ཟུང་དུ་འབྲེལ་ནས། ཡུལ་དངོས་ཀྱི་གྲོང་དམངས་དང་གནས་སྐོར་པ་རྣམས་ལ་ས་ཁོངས་བརྒལ་བའི་མིག་གི་དགའ་སྟོན་དང་རྣ་བའི་གསོས་སུ་སྨིན་པའི་གསོལ་སྟོན་ཡག་པོ་བཤམས་པ་དེས་ས་གནས་གཉིས་ཀྱི་རིག་གནས་སྤེལ་རེས་དང་བརྩེ་སེམས་མཉམ་འདྲེས་ཀྱི་དུས་རིམ་གསར་བར་སླེབས་པ་མཚོན་ཡོད།

　　   བྱེད་སྒོས“ས་གནས་མང་པོར་འཁྲབ་སྟོན་དང་ས་ཁོངས་ཡོངས་སུ་ཉམས་ལེན”གྱི་རྣམ་པ་སྤྱད་དེ། གསའ་ཁྲོམ་བརྒྱུད་དེ་ལྷོ་ནས་བྱང་བར་འཁྲབ་སྟོན་བྱ་ཡུལ་ཆེན་པོ་གསུམ་བཀོད་སྒྲིག་བྱས་ནས་རིག་རྩལ་ལེ་ཚན་རེས་མོས་ཀྱིས་འཁྲབ་སྟོན་བྱས་པ་དང་ཆབས་ཅིག སྣ་མང་མཉམ་འགུལ་གྱི་ཉམས་ལེན་དུས་མཉམ་དུ་སྒོ་འབྱེད་བྱས།བོད་སྨན་གྱི་མཚན་མོའི་ཁྲོམ་རར་གསོ་རིག་སྨན་གྱི་དྲི་ཞིམ་གང་སར་ཁྱབ་པ་དང་།“ཐུན་མོང་ཕྱུག་པའི་ཁྲོམ་རའི”གཟུགས་མེད་རིག་གནས་ཤུལ་བཞག་གི་ལག་རྩལ་འགྲེམས་སྟོན་བྱས་ཏེ།གྲོང་དམངས་མང་པོའི་ཡིད་སེམས་དབང་མེད་བཀུག“རྐང་ཚའི་ཁྱད་ལྡན་ཐོན་རྫས་འགྲེམས་སྟོན་ཁུལ”དེ་མི་ཚོགས་ཀྱིས་འཚང་ཁ་རྒྱག་པའི་གནས་སུ་གྱུར་ཅིང་། ཟས་མཆོག་གཡོ་སྦྱོར་བྱེད་ཁུལ་དུ་ལུག་ཤ་ཧྲིལ་པོ་སྲེག་པ་དང་དཀྲུག་ཇ།  བོད་ལུགས་ཀྱི་འོ་ཞོ་སོགས་བོད་ཟས་དག་མས“མངར་ཟས་ཀྱི་རྐང་ཚའི”ཡིད་སེམས་རབ་ཏུ་འཕྲོག་བཞིན་པ་མངོན།“དངོས་བཟང་ཆེད་བཤམས་ཁུལ”དུ་རྐང་ཚའི་རང་བྱུང་ཕྱུགས་རའི་ཞིང་ཕྱུགས་ཐོན་རྫས་དང་དེ་བཞིན་མཚོ་སྔོན་པོ་དང་མདོ་ལ་རི་བོའི་གཞི་རྒྱུའི་རིག་གནས་གསར་གཏོད་ལེགས་སྐྱེས་མཉམ་འདྲེས་འགྲེམས་སྟོན་བྱས་ཏེ་ཡུལ་སྐོར་བར་ཁྱད་ཆོས་ལྡན་པའི་ལེགས་སྐྱེས་ཀྱི་གདམ་ཀ་འདོན་སྤྲོད་བྱས་ཡོད། 

　   　ཤོག་སྦག་གིས་མཚན་མོའི་མཁའ་དབྱིངས་ཁྲ་ལམ་མེར་བཏང་བ་དང་བསྟུན་ནས་ཁྱད་ཆོས་ལྡན་པའི་འཁྲབ་སྟོན་པའི་རུ་ཕྲེང17བསྟར་ཏེ་རིམ་བཞིན་གར་སྟེགས་སུ་སླེབས་ཤིང་། “མཁར་གྲོང་གཉིས་མཉམ་འགུལ། གསའ་ཁྲོམ་དུ་སྐོར་སྐྱོད། རྐང་ཚ་ལ་འཕྲད་པ”ཞེས་པ་བརྗོད་དོན་བྱས་པའི་འཕྱོར་འཁོར་དལ་གྱིས་མངོན་བྱུང་ལ། མཁར་བྱང་ཁུལ་གྱི་གཡང་རྟེན“གསའ་ཕྲུག”དང་རྐང་ཚ་རྫོང་གི“དགོ་ཕྲུག”གཉིས་སྟེགས་བུ་གཅིག་ཏུ་མཉམ་འགུལ་བྱས་པ་དེའི་ཐོག་ནས་ས་གནས་གཉིས་བར་གྱི་མཉམ་འབྲེལ་དམ་པོ་མཚོན་ཡོད།《དག་སྣང་རྐང་ཚ》ཞེས་པའི་ཞབས་བྲོས་ལྟད་མོ་བའི་འདྲེན་བྱེད་མིག་གི་དགའ་སྟོན་མཐོ་སྒང་གནས་མཆོག་ཏུ་དྲངས་པ་དང་།སྒྲ་སྙན་དཀྲོལ་ལེན《སྨོན་ལམ》ཞེས་པའི་བོད་ཡུལ་གྱི་བཀྲ་ཤིས་སྨོན་འདུན་བརྒྱུད་སྤྲོད་བྱས་པ་དང་།རྒྱལ་ཁབ་རིམ་པའི་གཟུགས་མེད་རིག་གནས་ཤུལ་བཞག་རྣམ་གྲངས་ཤོམ་གོས་འགྲེམས་སྟོན《རྫི་གླུའི་འཕྱོར་རྒྱན》ཞེས་པའི་སྣ་མང་བའི་མི་རིགས་ཀྱི་གྱོན་ཆས་མངོན་ཡོད།དེའི་འཕྲོར་ལྡེམ་མྱུར་གྱི་ཞབས་བྲོ་སྣ་ཚོགས་བསྟུད་མར་འཁྲབ་པས་གངས་ལྗོངས་རིག་གནས་ཀྱི་གཏིང་ཟབ་པའི་རྨང་གཞི་དང་ཡིད་དབང་རབ་ཏུ་འཕྲོག་པའི་ཡང་སྙིང་གང་ལེགས་མངོན་བྱུང་། 

　　   ཐེངས་འདིའི“རྐང་ཚའི་མཚན་ལྗོངས”ནི་མི་རིགས་དམངས་སྲོལ་གྱི་འཁྲབ་སྟོན་གཟབ་རྒྱས་མངོན་པའི་ལྟད་མོ་ཤིག་ཡིན་པར་མ་ཟད།ཟི་ལིང་མཁར་བྱང་གི“གྲོང་ཁྱེར་གྱི་གསོན་ཤུགས”དང་རྐང་ཚའི“མཐོ་སྒང་གི་ཡུལ་སྲོལ”དབར་རྟོག་ཞིབ་བྱེད་པའི་གཏིང་ཟབ་ཀྱི་གླེང་མོལ་ཞིག་ཀྱང་ཡིན།འདི་ནས་དབུ་ཚུགས་ཏེ་ས་གནས་གཉིས་ཀྱིས་མུ་མཐུད་དུ་སྐྱེ་ཁམས་ཐུན་མོང་སྲུང་སྐྱོབ་དང་རིག་གནས་ཐུན་མོང་རོལ་མྱོང་།འཕེལ་རྒྱས་ཐུན་མོང་ཕན་པ་བཅས་ལ་སྐུལ་འདེད་བཏང་ནས་གྲོང་དམངས་དང་གནས་སྐོར་བར་ངོ་མཚར་ཁྱད་དུ་འཕགས་པའི་རིག་གནས་ཉམས་ལེན་སྔར་ལས་མང་པོ་གསར་གཏོད་བྱ་རྒྱུ།