དགུན་དྲོད་ཀྱིས་ཁེངས་པས་དམངས་སེམས་དྲོས། རོགས་ཁ་གསབ་སྤྲད་པས་དམངས་ཡིད་ཚིམ།—རྐང་ཚ་རྫོང་གིས་གྲོང་ཁྱེར་དང་གྲོང་གསེབ་ཀྱི་དཀའ་ངལ་ཡོད་པའི་མང་ཚོགས་ལ་དྲོད་རླངས་ཁ་གསབ་སྤྲད།

རྩོམ་སྒྲིག ལྷ་ཆེན་རྡོ་རྗེ། ཡོང་ཁུངས། རྐང་ཚ་རྫོང་མི་རིགས་སྐད་ཡིག་ལས་དོན་ལྟེ་གནས། བཤེར་འབེབས། ཚེ་བརྟན་བཀྲ་ཤིས། 

    དགུན་དུས་སུ་དྲོད་རླངས་མཁོ་འདོན་བྱེད་པ་ནི་དམངས་ཚིས་ཀྱི་ལས་དོན་གལ་ཆེན་ཞིག་ཡིན་ཞིང་། དཀའ་ངལ་ཡོད་པའི་མང་ཚོགས་ཀྱི་གཞི་རྩའི་འཚོ་བའི་འགན་སྲུང་དང་འབྲེལ་བ་ཡོད། ཉེ་ཆར་དམངས་ཚིས་ཀྱི་མཐའ་ཚད་བརྟན་པོ་སྲུང་བ་དང་གྲོང་ཁྱེར་དང་གྲོང་གསེབ་ཀྱི་དམའ་སྲུང་། དམིགས་བསལ་རོགས་སྐྱོར་ཁྱིམ་ཚང་གི་དགུན་ཁའི་དྲོད་རླངས་དཔལ་འབྱོར་གྱི་གནོན་ཤུགས་ཇེ་ཉུང་དུ་གཏོང་ཆེད། དགུན་དུས་ཀྱི་དམངས་འཚོར་ཞབས་འདེགས་ཞུ་རྒྱུར་གྲ་སྒྲིག་ཡག་པོ་བྱས་ནས། རྐང་ཚ་རྫོང་གིས་མི་དམངས་ལ་ཕན་འདོགས་པའི་སྲིད་ཇུས་གནད་སྨིན་དོན་འཁྱོལ་བྱས་པ་དང་། གོ་རིམ་ལྡན་པའི་སྒོ་ནས་གྲོང་ཁྱེར་དང་གྲོང་གསེབ་ཀྱི་དཀའ་ངལ་ཡོད་པའི་མང་ཚོགས་ལ་དགུན་དུས་ཀྱི་དྲོད་རླངས་ཁ་གསབ་སྤྲོད་པའི་ལས་ཀ་སྤེལ་ཏེ། རྫོང་ཡོངས་ཀྱི་ཐོ་འགོད་ནང་ཚུད་པའི་གྲོང་ཁྱེར་དང་གྲོང་གསེབ་ཀྱི་དམའ་སྲུང་དང་དམིགས་བསལ་རོགས་སྐྱོར་ཁྱིམ་ཚང་ཚང་མར་ཆེད་དོན་དྲོད་རླངས་ཁ་གསབ་འདང་ངེས་སྤྲད་དེ། དོན་དངོས་ཐོག་ལག་བསྟར་བྱེད་ཐུབ་པའི་ཕན་བདེ་བྱེད་ཐབས་ཀྱིས་དཀའ་ངལ་ཡོད་པའི་མང་ཚོགས་རྣམས་གྲང་ངར་ལས་སྐྱོབ་པ་དང་དྲོ་སྐྱིད་ལྡན་པའི་ངང་ནས་དགུན་ཁ་སྐྱེལ་བར་སྲུང་སྐྱོང་བྱས།

    ཐེངས་འདིའི་དྲོད་རླངས་ཁ་གསབ་སྤྲོད་རྒྱུ་དེ་གནད་འཁེལ་བརྟག་དཔྱད་དང་། རིགས་དབྱེ་ཇུས་བསྟར། འགན་སྲུང་བྱེད་དགོས་ཚད་ཚང་མ་འགན་ལེན། གྲངས་ཚད་འདང་ངེས་ཀྱི་རྩ་དོན་མཐའ་འཁྱོངས་བྱས་ཏེ། གཏན་ལ་ཕབ་པའི་ཚད་གཞི་ལྟར་དབྱེ་བ་ཕྱེ་ནས་སྤྲད་པ་དང་། རྫོང་ཡོངས་ཀྱི་ཐོ་འགོད་གྲོང་ཁྱེར་དང་གྲོང་གསེབ་ཀྱི་དམའ་སྲུང་ཁྱིམ་ཚང་ཡོངས་རྫོགས་ལ་ཁྱབ་པར་བྱསཤིང་། ཆད་ལྷག་མེད་ལ་ནོར་འཛོལ་མེད་པར། དམངས་ཕན་གྱི་ཁེ་བཟང་དཀའ་ངལ་ཡོད་པའི་དུད་ཁྱིམ་རེ་རེར་གནད་སྨིན་ངང་སྐྱེལ་ཐུབ་ཡོད། དེའི་ནང་ཁ་གསབ་ཚད་གཞི་ནི་གྲོང་ཁྱེར་དང་གྲོང་གསེབ་ཁག་གཉིས་སུ་གསལ་བར་ཕྱེ་བ་སྟེ། གྲོང་ཁྱེར་གྱི་དཀའ་ངལ་ཅན་གྱི་དུད་ཁྱིམ་རེར་སྒོར1000དང་། གྲོང་གསེབ་ཀྱི་དཀའ་ངལ་ཅན་གྱི་དུད་ཁྱིམ་རེར་སྒོར800སྤྲད་ཅིང་། ཚད་ལྡན་རང་བཞིན་དང་སྒྲིག་སྲོལ་ལྡན་པའི་སྒོ་ནས་སྤྲོད་སྟངས་དེས་སྲིད་ཇུས་བཟང་པོ་ལག་བསྟར་བྱེད་པ་དེ་བས་གསལ་པོ་དང་གནད་དུ་ཁེལ་བ་ཞིག་ཏུ་གྱུར་ཡོད།

    ཐེངས་འདིའི་དམངས་ཕན་བྱེད་ཐབས་དྲོ་སྐྱིད་ཅན་གྱི་ཁྱབ་ཁོངས་རྒྱ་ཆེ་ལ་ཁེ་ཕན་ཐོབ་མཁན་མང་། བསྡོམས་རྩིས་བྱས་ན་རྫོང་ཡོངས་ཀྱི་དཀའ་ངལ་ཡོད་པའི་མང་ཚོགས་དུད་ཁྱིམ2193དང་མི་གྲངས5051ལ་ཕན་ཐོག དྲོད་རླངས་ཁ་གསབ་ཁྱོན་བསྡོམས་མ་དངུལ་སྒོར་ཁྲི181.96བཏང་། དེའི་ནང་གྲོང་ཁྱེར་གྱི་དམའ་སྲུང་དུད་ཁྱིམ299དང་མི590ལ་མ་དངུལ་སྒོར་ཁྲི29.9སྤྲད་པ་དང་། གྲོང་གསེབ་ཀྱི་དམའ་སྲུང་དུད་ཁྱིམ1664དང་མི4220ལ་མ་དངུལ་སྒོར་ཁྲི133.12སྤྲད། དམིགས་བསལ་རོགས་སྐྱོར་དུད་ཁྱིམ230དང་མི241ལ་མ་དངུལ་སྒོར་ཁྲི18.94སྤྲད།

    དྲོད་རླངས་ཁ་གསབ་ཆུང་ཆུང་གིས་དམངས་ཚིས་ཀྱི་བརྩེ་སེམས་ཟབ་མོ་མཚོན་ཡོད། ཐེངས་འདིའི་དགུན་དུས་ཀྱི་དྲོད་རླངས་ཁ་གསབ་སྤྲོད་པའི་ལས་དོན་འདི་ནི་རྐང་ཚ་རྫོང་གིས་དམངས་ཚིས་འགན་སྲུང་ལ་སྐུལ་འདེད་གཏོང་བ་དང་། སེམས་གསོ་རོགས་སྐྱོར་གཏིང་ཟབ་བྱེད་པའི་ལག་ལེན་གསོན་པོ་ཞིག་ཡིན་པས། དཀའ་ངལ་ཡོད་པའི་མང་ཚོགས་རྣམས་ཀྱིས་དགུན་ཁར་འཚོ་བ་སྐྱེལ་བའི་གནོན་ཤུགས་ཇེ་དམའ་རུ་བཏང་སྟེ། དམངས་ཚིས་འགན་སྲུང་གི་བདེ་འཇགས་དྲ་བ་བརྟན་པོ་བསྐྲུན་ཡོད། རྗེས་ཕྱོགས་སུ་རྐང་ཚ་རྫོང་གིས་དམིགས་བསལ་ཚོགས་སྤྱི་ལ་དམིགས་པ་དང་དམངས་ཚིས་ཀྱི་དགོས་མཁོ་དམ་འཛིན་བྱས་ཏེ། སྤྱི་ཚོགས་རོགས་སྐྱོབ་སྲིད་ཇུས་ཁག་རྒྱུན་རྣམ་ཅན་གྱིས་ལག་བསྟར་བྱེད་པ་དང་། དགུན་དུས་སུ་དྲོ་སྐྱིད་ལྡན་པའི་རོགས་རམ་བྱེད་ཐབས་ཞིབ་ཕྲ་བཟོ་བ། དམངས་ཚིས་འགན་སྲུང་ཐད་ཀྱི་ཞན་ཆ་མུ་མཐུད་ཁ་གསབ་ཡིན། གནད་ལ་འཁེལ་དང་སེམས་པ་བཟང་བ། ལས་ཆོད་ཆེ་བའི་རོགས་སྐྱོབ་ཞབས་ཞུ་བརྒྱུད་དེ་དཀའ་ངལ་ཡོད་པའི་མང་ཚོགས་ཀྱི་ཐོབ་སྣང་དང་སྐྱིད་སྣང་། བདེ་འཇགས་ཚོར་སྣང་བཅས་རྒྱུན་ཆད་མེད་པར་མཐོ་རུ་གཏོང་བཞིན་ཡོད་པར་མ་ཟད། ས་གནས་འདིའི་མང་ཚོགས་ཚང་མ་དྲོ་ཞིང་སྐྱིད་པའི་དགུན་དུས་ཤིག་སྐྱེལ་བར་འབད་པ་བྱེད།