མཚོ་སྔོན་རྐང་ཚ་རྫོང་གིས་རྣམ་པ་སྣ་མང་གིས་ལོ་ལེགས་དུས་ཆེན་ལ་རྟེན་འབྲེལ་ཞུས།

རྩོམ་སྒྲིག ལྷ་ཆེན་རྡོ་རྗེ། ཡོང་ཁུངས། རྐང་ཚ་རྫོང་མི་རིགས་སྐད་ཡིག་ལས་དོན་ལྟེ་གནས། བཤེར་འབེབས། ཚེ་བརྟན་བཀྲ་ཤིས། 

     ཟླ9པའི་ཚེས23ཉིན། མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་རྐང་ཚ་རྫོང་གིས“སྟོན་ལོ་ལེགས་བྱུང་བའི་འབྲས་བཟང་བསུ། དོན་ལག་ལེན་ཁྲོད་ནས་དར་རྒྱས་སྐུལ”ཞེས་པ་བརྗོད་དོན་བྱས་ནས་ཞིང་བའི“ལོ་ལེགས་དུས་ཆེན”གྱི་དགའ་སྟོན་བྱེད་སྒོ་སྤེལ། བྱེད་སྒོའི་ཁྲོད་དུས་ཆེན་སྦྲེལ་ཐག་ཏུ་བྱས་ཏེ། “ཞིང་ལས་ལུས་རྩལ་རིག་གནས་གནས་སྐོར་ཚོང་ལས”བཅས་ལས་རིགས་སྣ་མང་མཉམ་འདྲེས་འཕེལ་རྒྱས་ཡོང་བར་གཏིང་ཟབ་ངང་སྐུལ་འདེད་བཏང་ཞིང་། དྲ་ལམ་དང་ཡུལ་དངོས་གཉིས་མཉམ་འགུལ་གྱིས་ཐོན་ཁུངས་བསྡུ་སྒྲིལ་བྱས་ཏེ། ཐོན་ལས་ཀྱི་སྤུས་ཚད་མཐོར་འདེགས་དང་རིག་གནས་ནུས་པ་སྤྲོད་པ་ཕྱོགས་གཉིས་ཀ་མཉམ་གནས་མཉམ་དར་མངོན་འགྱུར་བྱུང་།

     ཐེངས་འདིའི་ཞིང་བའི་ལོ་ལེགས་དུས་ཆེན་གྱི་བྱེད་སྒོ་ནི་གོང་རིམ་གྱིས་གཅིག་གྱུར་འཆར་འགོད་དང་ཞིབ་ཚགས་བཀོད་སྒྲིག མཉམ་འགུལ་སྐུལ་འདེད་བཅས་རྒྱུན་འཁྱོངས་བྱས་ཏེ། རྫོང་ཨུའི་ཞིང་ཕྱུགས་ལས་དོན་མགོ་ཁྲིད་ཚོགས་ཆུང་གིས་གཙོ་གཉེར་བྱས་པ་དང་། འབྲེལ་ཡོད་སྡེ་ཁག་ཁག་གིས་གཞོགས་འདེགས་དམ་ཟབ་དང་མཉམ་གྲོས་མཉམ་འཛིན་བྱེད་པ། མཉམ་དུ་ནུས་ཤུགས་འདོན་པའི་བྱ་བའི་རྣམ་པ་ཆགས་ཡོད། བྱེད་སྒོའི་ནང་གསར་གཏོད་རང་བཞིན་ལྡན་པའི“ཚོགས་ར་གཙོ་བོ་དང་ཡན་ལག་ཚོགས་ར”ཟུང་འབྲེལ་བྱེད་སྟངས་སྤྱད་དེ་ཚོང་འབྲེལ་མཐུད་སྦྱོར་དང་ཐོན་རྫས་འགྲེམས་འཚོང་། སྲིད་ཇུས་དྲིལ་སྒྲོག ཐད་གཏོང་ཚོང་ལས། སྟོན་བསྡུ་དཔེ་སྟོན། ཡུལ་ཚོ་དང་གྲོང་རྡལ་གྱི་ཁྱད་ཆོས་ལྡན་པའི་ལེ་ལག་ཆེན་པོ་དྲུག་བཀོད་སྒྲིག་བྱས་ཡོད།

     ཚོགས་ར་གཙོ་བོས་ནུས་ཤུགས་གཅིག་སྒྲིལ་གྱིས་སྟེགས་བུ་བསྐྲུན་པ་དང་། ཐོན་རྫས་དང་སིལ་འཚོང་ཕྱོགས་གཉིས་ཀར་ནུས་པ་འདོན་སྤེལ་བྱས་ཏེ། ཚོགས་ར་གཙོ་བོར་མཐུན་སྦྱོར་ངང་ཐོན་རྫས་གན་རྒྱ་འཇོག་པ་དང་། ཐད་ཚོང་ཁང་གི་བྱ་དགའ་སྤྲོད་པའི་བྱང་བུ་འགེལ་བ། ཞིང་ཕྱུགས་ཐོན་རྫས་འགྲེམས་འཚོང་། ཟས་མཆོག་གི་རོ་ལ་མྱོང་བ། འབྲོག་ཕན་སྲིད་ཇུས་སྒྲོག་འགྲེལ་སོགས་ཀྱི་བྱེད་སྒོ་སྤེལ་བ་བརྒྱུད་ནས་ཐོན་འཚོང་འབྲེལ་མཐུད་ཀྱི་སྟེགས་བུ་བསྐྲུན་ཏེ། ཕྱུགས་ལས་འཕེལ་རྒྱས་ལ་ནུས་པ་བཏོན། ཡན་ལག་ཚོགས་རར་ཕན་ཚུན་མཉམ་འགུལ་བྱེད་པ་དང་ཁྱད་ཆོས་མི་འདྲ་བ་ལྡན་ཞིང་། དྲ་ལམ་དང་ཡུལ་དངོས་གཉིས་ཀར་མཉམ་དུ་འབད་བརྩོན་བྱས་པ་དེས་ལས་རིགས་དང་རིག་གནས། ཞབས་ཞུ་བཅས་གཏིང་ཟབ་ཏུ་འདྲེས་པར་བྱས། དྲ་ལམ་ཕྱིར་འཚོང་ལས་གནས་ལ་ཚ་རླབས་འཕྱུར་བར་བྱས་པ་དང་། སྟོན་བསྡུའི་ཡན་ལག་ཚོགས་རར་ཞིང་ལས་འཕྲུལ་ཆས་ལག་རྩལ་མི་སྣ་རྣམས་ཞིང་ཁར་ཟབ་ཞུགས་བྱས་ཏེ་བརྒྱུད་རིམ་ཧྲིལ་བོར་འཕྲུལ་འཁོར་ཅན་གྱི་བཀོལ་སྤྱོད་དཔེ་སྟོན་བྱས་པར་མ་ཟད། བརྔ་བསྡུའི་གྱོང་གུན་ཇེ་ཉུང་དུ་གཏོང་བ་དང་ལྗང་མདོག་འགོག་སྲུང་ལག་རྩལ། དམངས་ཕན་འགན་བཅོལ་སྲིད་ཇུས་བཅས་ཁྱབ་གདལ་བཏང་སྟེ་སྟོན་བསྡུའི་ཚད་གཞི་རྒྱུན་ཆད་མེད་པར་མཐོ་རུ་བཏང་བ་དང་འབྲུ་རིགས་བརྟན་འཕར་ཡོང་བའི་རྨང་གཞི་བརྟན་པོ་བཏིང་ཡོད།

     འོམ་ཆུ་གྲོང་རྡལ་དང་གཡི་དཀར་འོམ་ལུང་ཡུལ་ཚོ། མཚོ་འཁྱིལ་ཡུལ་ཚོ་བཅས་ཀྱི་ཡན་ལག་ཚོགས་ར་ནས་ཁྱད་ཆོས་ལྡན་པའི་བྱེད་སྒོ་རབ་དང་རིམ་པ་དུས་གཅིག་ཏུ་སྤེལ། “མདོག་བཞིའི་ཁྱིམ་གཞིས”འཛུགས་སྐྲུན་བྱེད་པ་དང་འབྲོག་ལས་ཤུལ་བཞག་རིག་གནས་རྒྱུན་འཛིན་བྱེད་པར་དམིགས་ནས། སོན་བཟང་དཔྱད་བསྡུར་དང་ལག་རྩལ་འགྲན་སྡུར། ཟས་རིགས་འགྲན་བསྡུར་སོགས་ཀྱི་རྣམ་པ་བརྒྱུད་དེ། སྐྱེ་ཁམས་དང་རིག་གནས། ཐོན་ལས། ཡུལ་སྐོར་བཅས་མཉམ་འདྲེས་གཏིང་ཟབ་ཡོང་བར་སྐུལ་འདེད་བཏང་སྟེ། མི་རིགས་སོ་སོའི་མང་ཚོགས་ཀྱིས་ལོ་ལེགས་བྱུང་བ་ལ་རྟེན་འབྲེལ་ཞུ་བ་དང་ཏང་གི་དྲིན་ཤེས་པ། གྲོང་གསེབ་དར་རྒྱས་གཏོང་བར་མཉམ་དུ་འབད་བརྩོན་བྱེད་པའི་བསམ་བློའི་ཉམས་འགྱུར་བཟང་པོ་གང་ལེགས་མངོན་པར་བྱས།