མཚོ་བྱང་ཁུལ་རྐང་ཚ་རྫོང་གིས་རྒྱ་ལོ་བཅོ་ལྔའི་བྱ་འགུལ་ཕུན་སུམ་ཚོགས་པར་རོལ་བ།

རྒྱ་ལོ་བཅོ་ལྔར་མཉམ་དུ་འཛོམས། གློག་སྒྲོན་འོད་མདངས་ཁྲ་ཆིལ་ལེ། ཟླ2པའི་ཚེས5ཉིན་ཏེ་ལུགས་རྙིང་ལོ་གསར་གྱི་ཚེས15ཉིན། ཏང་གི་ཚོགས་ཆེན་ཉི་ཤུ་པའི་དགོངས་དོན་ལག་ལེན་དངོས་འབེབས་བྱེད་པ་དང་སྲོལ་རྒྱུན་རིག་གནས་སྔར་བས་དར་སྤེལ་དུ་གཏོང་བ། དུས་ཆེན་སྐབས་ཀྱི་མང་ཚོགས་ཀྱི་རིག་གནས་རྩེད་འཇོ་འཚོ་བ་ཕུན་སུམ་ཇེ་ཚོགས་སུ་གཏོང་བ། རྫོང་ཡོངས་ཀྱི་མི་དམངས་ལ་དགའ་སྤྲོ་བཀྲ་ཤིས་ཀྱི་སྲོལ་རྒྱུན་དུས་ཆེན་རོལ་དུ་འཇུག་པ་བཅས་ཀྱི་ཆེད། རྐང་ཚ་རྫོང་གིས་རྣམ་པ་སྣ་མང་དང་ནང་དོན་ཕུན་སུམ་ཚོགས་པའི“ལུགས་རྙིང་ལོ་གསར་བསུ། རྒྱ་ལོ་བཅོ་ལྔ་རོལ།”ཞེས་པའི་བརྗོད་དོན་བྱ་འགུལ་སྤེལ་ནས། ལས་བཟོ་པ་དང་མང་ཚོགས་ལ་རྣམ་པ་གསར་སྐྲུན་གྱི་རྒྱ་ལོ་བཅོ་ལྔའི“རྒྱགས་ཕྱེ་གྱ་ནོམ་པ”ཞིག་ཕུལ། རྫོང་རིམ་པའི་མགོ་ཁྲིད་པ་ཁ་ཤས་ཡུལ་དངོས་སུ་ཡོང་སྟེ་རྫོང་ཡོངས་ཀྱི་མི་དམངས་དང་མཉམ་དུ་རྒྱ་ལོ་བཅོ་ལྔའི་དུས་ཆེན་ལ་དགྱེས་དགུར་རོལ། རྫོང་ཨུའི་ཧྲུའུ་ཅི་གཞོན་པའམ་སྲིད་ཁྲིམས་ཨུ་ཡོན་ལྷན་ཁང་གི་ཧྲུའུ་ཅི་འཇམ་དབྱངས་དོན་ལྡན་གྱིས་རྟ་པ་བརྒྱ་ཡིས་བོད་མཁར་སྐོར་བའི་ལོ་གསར་བསུ་བའི་བྱ་འགུལ་ཁྲོད་ཤིས་ཚིག་ཕུལ་བ་དང་། རྫོང་དཔོན་གཞོན་པ་ཅི་ཧྲི་ཝེ་ཡིས་བྱ་འགུལ་ལ་མགོ་འཛིན་བྱས།

འཇམ་དབྱངས་དོན་ལྡན་གྱིས་ཤིས་ཚིག་ཕུལ་ནས་བཤད་རྒྱུར། ལོ་གསར་པར་སྨོན་འདུན་གསར་པ་ཞུ་ལ་རེ་བལྟོས་གསར་པ་འཛིན། དེ་རིང་ང་ཚོས་འདི་ནས་རྟ་པ་བརྒྱ་ཡིས་བོད་མཁར་བསྐོར་ནས་ལོ་གསར་བསུས་ཏེ་བཀྲ་ཤིས་སྨོན་འདུན་ཞུ། མི་སྟོང་སྐོར་བྲོ་འཁྲབ་ཅིང་གླུ་གར་གྱི་རྒྱ་མཚོ་བསྐྱིལ། འབྱོར་ཕྱུག་སྒོ་འབྱེད་འཆམ་མཐུན་མཛེས་སྡུག་བཅས་ཀྱི་རྐང་ཚའི་ངོ་མཚར་རི་མོ་ཞིག་ཡུན་གྱིས་བཀྲམས། རྒྱ་ལོ་བཅོ་ལྔ་ཚ་ཚ་འུར་འུར་གྱིས་རོལ། འཐབ་ལམ་གསར་པར་དགའ་དགའ་སྤྲོ་སྤྲོས་བསྐྱོད། རྫོང་ཡོངས་ཀྱི་བྱ་གཞག་ཐམས་ཅད་དབྱར་མཚོ་རྒྱས་པ་ལྟར་འཕེལ་ཞིང་རིགས་སོ་སོའི་མི་དམངས་བདེ་ཞིང་སྐྱིད་པ། རླབས་ཆེན་མེས་རྒྱལ་དར་རྒྱས་འབྱོར་ཕྱུག་ལྡན་ཞིང་རྒྱལ་ཁབ་བདེ་ལ་མང་ཚོགས་སྐྱིད་པར་སྨོན།

                 རྟ་པ་བརྒྱ་ཡིས་བོད་མཁར་བསྐོར་ནས་ལོ་གསར་བསུས། ། 

                སྐོར་བྲོ་དགའ་སྤྲོས་འཁྲབ་ནས་བདེ་སྐྱིད་འཚོ་བ་མཚོན། །

དགའ་སྤྲོའི་དགོད་སྒྲས་ལོ་གསར་དུས་ཆེན་དཔལ་ལ་རོལ། ། 

གླུ་དང་གར་གྱིས་རྒྱ་ལོའི་བཅོ་ལྔ་སྐྱིད་པོར་རོལ། །