འབྲུག་མོའི་སླ་ང་།
རྩོམ་སྒྲིག ཚེ་གཟུངས་སྐྱིད། ཡོང་ཁུངས། མཚོ་བྱང་ཁུལ་མི་དམངས་སྲིད་གཞུང་དྲ་བ། བཤེར་འབེབས།
འབྲུག་མོའི་སླ་ང་ནི་མདའ་བཞི་རྫོང་ཝ་མགྱོགས་ཡུལ་ཚོ་མདའ་བཞི་སྡེ་བའི་དགུན་སའི་ཆུ་ཁོལ་ཁ་ཟེར་བར་ཡོད་དེ། ཆུ་ཁོལ་གོང་མའི་བྲག་རི་ཆུང་བ་དེའི་ལྷོ་ནུབ་ཕྱོགས་ཀྱི་སྤྱི་ལེ་གཅིག་ཙམ་གྱི་སར་རི་ཁེར་ཆད་དམའ་མོ་ཞིག་ཡོད་པའི་བྱང་ངོས་ཀྱི་ཐེམ་ཐོག་ཏུ་ཆུ་ཚན་གོར་མོ་ལྷོག་ལྷོག་ཏུ་གདུ་བ་ཞིག་ཡོད་པ་དེ་ཡིན། ངག་རྒྱུན་ལ་དེ་ནི་འབྲུག་མོའི་སླ་ང་ཡིན་ཟེར།
གེ་སར་ཁྲུས་གཞོང་།
གེ་སར་ཁྲུས་གཞོང་ནི་མདའ་བཞི་རྫོང་ཝ་མགྱོགས་ཡུལ་ཚོ་མདའ་བཞི་སྡེ་བའི་དགུན་སའི་ཆུ་ཁོལ་ཁ་ཟེར་བར་ཡོད་དེ། ཆུ་ཁོལ་གོང་མའི་བྲག་རི་ཆུང་བ་དེའི་ལྷོ་ནུབ་ཕྱོགས་ཀྱི་སྤྱི་ལེ་གཅིག་ཙམ་གྱི་སར་རི་ཁེར་ཆད་དམའ་མོ་ཞིག་ཡོད་པའི་བྱང་ངོས་ཀྱི་འབྲུག་མོའི་སླ་ངའི་ནུབ་ཕྱོགས་ཀྱི་ཉེ་སར་ཆུ་ཚན་ཟབ་མོ་གསུམ་ཡོད་པའི་བར་མ་དེ་ཡིན། ངག་རྒྱུན་དུ་དེ་ནི་གླིང་གེ་སར་རྒྱལ་པོའི་ཁྲུས་གཞོང་ཡིན་པར་བཤད།
འབྲུག་མོའི་ཁྲུས་གཞོང་།
འབྲུག་མོའི་ཁྲུས་གཞོང་ནི་མདའ་བཞི་རྫོང་ཝ་མགྱོགས་ཡུལ་ཚོ་མདའ་བཞི་སྡེ་བའི་དགུན་སའི་ཆུ་ཁོལ་ཁ་ཟེར་བར་ཡོད་དེ། ཆུ་ཁོལ་གོང་མའི་བྲག་རི་ཆུང་བ་དེའི་ལྷོ་ནུབ་ཕྱོགས་ཀྱི་སྤྱི་ལེ་གཅིག་ཙམ་གྱི་སར་རི་ཁེར་ཆད་དམའ་མོ་ཞིག་ཡོད་པའི་བྱང་ངོས་ཀྱི་འབྲུག་མོའི་སླ་ངའི་ནུབ་ཕྱོགས་ཀྱི་ཉེ་སར་ཆུ་ཚན་ཟབ་མོ་གསུམ་ཡོད་པའི་ཞོལ་མ་དེ་ཡིན། ངག་རྒྱུན་དུ་དེ་ནི་གླིང་སེང་ལྕམ་འབྲུག་མོའི་ཁྲུས་གཞོང་ཡིན་པར་བཤད།
འབྲུག་མོའི་ཐོམ་བུ།
འབྲུག་མོའི་ཐོམ་བུ་ནི་མདའ་བཞི་རྫོང་ཝ་མགྱོགས་ཡུལ་ཚོ་མདའ་བཞི་སྡེ་བའི་དགུན་སའི་ཆུ་ཁོལ་ཁ་ཟེར་བར་ཡོད་དེ། ཆུ་ཁོལ་གོང་མའི་བྲག་རི་ཆུང་བ་དེའི་ལྷོ་ནུབ་ཕྱོགས་ཀྱི་སྤྱི་ལེ་གཅིག་ཙམ་གྱི་སར་རི་ཁེར་ཆད་དམའ་མོ་ཞིག་ཡོད་པའི་བྱང་ངོས་ཀྱི་འབྲུག་མོའི་སླ་ངའི་ནུབ་ཕྱོགས་ཀྱི་ཉེ་སར་ཆུ་ཚན་ཟབ་མོ་གསུམ་ཡོད་པའི་གོང་མ་དེ་ཡིན། ངག་རྒྱུན་དུ་དེ་ནི་གླིང་སེང་ལྕམ་འབྲུག་མོའི་ཐོམ་བུ་ཡིན་པར་བཤད།
རྟ་རྐྱང་བུའི་ཁྲུས་གཞོང་།
རྟ་རྐྱང་བུའི་ཁྲུས་གཞོང་ནི་མདའ་བཞི་རྫོང་ཝ་མགྱོགས་ཡུལ་ཚོའི་མདའ་བཞི་སྡེ་བའི་དགུན་སའི་ཆུ་ཁོལ་ཁ་ཟེར་བར་ཡོད་ཅིང་དེ་ནི་ཆུ་ཁོལ་ཞོལ་མ་ཡིན། ཆུ་ཚན་གོར་མོ་ལྷོག་ལྷོག་ཏུ་གདུ་བ་དེ་ངག་རྒྱུན་ལ་གླིང་གེ་སར་རྒྱལ་པོའི་རྟ་རྐྱང་བུའི་ཁྲུས་གཞོང་ཡིན་ཟེར།
