ལི་ཆང་གིས་རྒྱལ་སྲིད་སྤྱི་ཁྱབ་ཁང་གི་བཀའ་རྒྱར་མཚན་རྟགས་བཀོད་དེ《གྲོང་གསེབ་ཀྱི་གཞུང་ལམ་སྲོལ་ཡིག》ཁྱབ་བསྒྲགས་བྱས།

རྩོམ་སྒྲིག་པ། ཚེ་གཟུངས་སྐྱིད། ཡོང་ཁུངས། ཀྲུང་གོ་བོད་ཀྱི་དྲ་བ།  བཤེར་འབེབས། ཚེ་བརྟན་བཀྲ་ཤིས། 

ཉེ་ཆར། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་རྒྱལ་སྲིད་སྤྱི་ཁྱབ་ཁང་གི་བཀའ་རྒྱར་མཚན་རྟགས་བཀོད་དེ།《གྲོང་གསེབ་ཀྱི་གཞུང་ལམ་སྲོལ་ཡིག》ཁྱབ་བསྒྲགས་བྱས་པ་དང་། 2025ལོའི་ཟླ9པའི་ཚེས15ཉིན་ནས་བཟུང་ལག་བསྟར་བྱ་རྒྱུ་རེད།

《སྲོལ་ཡིག》ལག་བསྟར་བྱེད་པའི་དམིགས་ཡུལ་ནི་གྲོང་གསེབ་ཀྱི་གཞུང་ལམ་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་སྟེ། གྲོང་གསེབ་ཕྱོགས་ཡོངས་དར་སྤེལ་ལ་སྐུལ་འདེད་གཏོང་བ་དང་། ཞིང་ལས་ཞིང་སྡེ་དེང་རབས་ཅན་ཇེ་མགྱོགས་སུ་གཏོང་བའི་དགོས་མཁོ་དང་བསྟུན་ཆེད་ཡིན།《སྲོལ་ཡིག》ལ་བསྡོམས་པས་དོན་ཚན28ཡོད་ལ། གཙོ་བོ་གཤམ་གསལ་གྱི་ནང་དོན་གཏན་འབེབས་བྱས་ཡོད་དེ།

གཅིག་ནི་འཕེལ་རྒྱས་ཀྱི་ཁྲིད་ཕྱོགས་གཏན་འཁེལ་བྱེད་པ་སྟེ། སྲིད་གཞུང་གིས་གཙོ་ཁྲིད་དང་གཅིག་གྱུར་འཆར་འགོད། ཡུལ་བབ་དང་བསྟུན་པ་བཅས་རྒྱུན་འཁྱོངས་བྱས་ནས། ཁུལ་ཁོངས་ཡོངས་ལ་ཁྱབ་པ་དང་། ཀུན་ཕན་མཉམ་སྤྱོད། བདེ་འཇགས་སྤྱོད་བདེ། སྟབས་བདེ་ནུས་མཐོ་བཅས་ཀྱི་གྲོང་གསེབ་འགྲིམ་འགྲུལ་གྱི་རྨང་གཞིའི་སྒྲིག་བཀོད་རིམ་བཞིན་འཐུས་ཚང་དུ་གཏོང་དགོས།

གཉིས་ནི་འགན་འཁྲི་གཙོ་བོ་དངོས་འབེབས་བྱེད་དགོས་པ་སྟེ།  རྫོང་རིམ་པའི་སྲིད་གཞུང་གིས་གྲོང་གསེབ་ཀྱི་གཞུང་ལམ་འཕེལ་རྒྱས་གཏོང་བའི་འགན་འཁྲི་གཙོ་བོ་འཁུར་དགོས་པ་དང་། རྒྱལ་སྲིད་སྤྱི་ཁྱབ་ཁང་གི་འགྲིམ་འགྲུལ་སྐྱེལ་འདྲེན་སོགས་སྡེ་ཁག་དང་། གྲོང་ཁྱེར་རིམ་པ་ཡན་གྱི་ས་གནས་སྲིད་གཞུང་དང་དེའི་འབྲེལ་ཡོད་སྡེ་ཁག་གིས་མཛུབ་སྟོན་དང་ལྟ་སྐུལ་བྱེད་ཤུགས་ཇེ་ཆེར་གཏོང་དགོས།

གསུམ་ནི་གཞུང་ལམ་དྲ་བའི་སྤུས་ཚད་ཇེ་མཐོར་གཏོང་དགོས་པ་སྟེ། གསར་དུ་ལས་པའི་གྲོང་གསེབ་ཀྱི་གཞུང་ལམ་དེ་ལག་རྩལ་ཚད་རིམ་གྱི་བླང་བྱ་དང་མཐུན་དགོས་ལ། ད་ཡོད་ཀྱི་ལག་རྩལ་རིམ་པ་དམའ་ཤོས་ཀྱི་བླང་བྱ་དང་མི་མཐུན་པའི་རིགས་རིམ་སྤོར་བསྒྱུར་བཀོད་བྱེད་དགོས།

བཞི་ནི་དོ་དམ་བདག་སྐྱོང་ལ་ཤུགས་སྣོན་དགོས་པ་སྟེ། གྲོང་ཚོའི་གཞུང་ལམ་འཛུགས་སྐྲུན་གྱི་ཚོད་འཛིན་ཁུལ་དབྱེ་མཚམས་བཅད་པ་དང་དོ་དམ་དང་། ཚད་བཀག་ལས་བརྒལ་བའི་སྐྱེལ་འདྲེན་དང་། ཟོག་འདྲེན་རླངས་འཁོར་ལྕི་རིགས་ཀྱི་བཅོས་སྐྱོང་སོགས་ཀྱི་བྱང་བྱ་གསལ་བོར་བསྟན་ཡོད། གྲོང་གསེབ་གཞུང་ལམ་དོ་དམ་བདག་སྐྱོང་གི་འགན་འཁྲིའི་ལམ་ལུགས་འཛུགས་པ་དང་འཐུས་ཚང་དུ་གཏོང་བ་དང་། གྲོང་གསེབ་གཞུང་ལམ་བདག་སྐྱོང་གི་རྩ་འཛུགས་དང་ལག་བསྟར་གཙོ་གཞི་གསལ་བོར་བཏོན་ཏེ། གཞུང་ལམ་བདག་སྐྱོང་གི་ཆེད་ལས་སྡེ་ཚན་གྲོང་གསེབ་ཀྱི་གཞུང་ལམ་བདག་སྐྱོང་ཁྲོད་ཞུགས་པར་སྐུལ་མ་གཏོང་བ་དང་མཛུབ་སྟོན་བྱེད་དགོས།

ལྔ་ནི་བདེ་འཇགས་འགན་སྲུང་ལ་ཤུགས་སྣོན་དགོས་སྟེ། གྲོང་གསེབ་གཞུང་ལམ་གྱི་རྒྱུན་གཏན་སྐོར་ཞིབ་དང་བདེ་འཇགས་ལ་གནོད་པའི་རྐྱེན་རྩ་ཞིབ་བཤེར་བཅོས་སྐྱོང་སྤེལ་བ་དང་། གྲོང་གསེབ་གཞུང་ལམ་གྱི་འཕྲལ་བསྟུན་འགན་སྲུང་དང་གནོད་འགོག་གེགས་འགོག་ནུས་པ་འཛུགས་སྐྲུན་ལ་ཤུགས་སྣོན་པ། འགྲོ་ལམ་གྱི་འགྲིམ་འགྲུལ་བདེ་འཇགས་ཀྱི་ཁྲིམས་ལུགས་ཁྲིམས་སྲོལ་དང་བགྲོ་ལམ་ལ་བདག་སྐྱོང་སྲུང་སྐྱོབ་ཀྱི་དྲིལ་སྒྲོག་སློབ་གསོ་སྤེལ་དགོས་པའི་བླང་བྱ་བཏོན།

དྲུག་ནི་མཉམ་འདྲེས་འཕེལ་རྒྱས་ལ་སྐུལ་འདེད་གཏོང་དགོས་སྟེ། ས་གནས་ཀྱི་རིམ་པ་སོ་སོའི་སྲིད་གཞུང་གིས་བྱེད་ཐབས་སྤྱད་དེ་གྲོང་གསེབ་གཞུང་ལམ་དང་ལམ་རྒྱུད་ཀྱི་སྒྲིག་བཀོད་དང་། ཐོན་ལས་གླིང་ཁུལ། ཡུལ་སྐོར་ལྗོངས་ཁུལ་སོགས་གཞི་གཅིག་ཅན་འཛུགས་སྐྲུན་བྱེད་པར་སྐུལ་འདེད་གཏོང་བ་དང་། གྲོང་གསེབ་ཀྱི་འགྲུལ་སྐྱེལ་དང་། ཟོག་འདྲེན་ཟོག་འགྲུལ། སྦྲག་སྲིད་མྱུར་སྐྱེལ་བཅས་ཀྱི་མཉམ་འདྲེས་འཕེལ་རྒྱས་ལ་སྐུལ་འདེད་གཏོང་བ། གྲོང་གསེབ་ཀྱི་གཞུང་ལམ་ཞབས་ཞུ་ཐོགས་མེད་དང་མཁར་གྲོང་གི་དཔལ་འབྱོར་འཁོར་སྐྱོད་ཤར་གཏོང་བྱེད་པའི་ནུས་པ་ཆེ་རུ་གཏོང་དགོས་པ་གཏན་འབེབས་བྱས། །