ཀྲུང་གུང་ཀྲུང་དབྱང་གཞུང་ལས་ཐིང་དང་རྒྱལ་སྲིད་སྤྱི་ཁྱབ་ཁང་གཞུང་ལས་ཐིང་གིས《ཕྲུ་གུ་གསོ་སྐྱོང་གི་ཁ་གསབ་ལམ་ལུགས་ལག་བསྟར་ཇུས་གཞི》དཔར་འགྲེམས་བྱས།

རྩོམ་སྒྲིག ཚེ་གཟུངས་སྐྱིད། ཡོང་ཁུངས། ཀྲུང་གོ་བོད་ཀྱི་དྲ་བ། བཤེར་འབེབས། ཚེ་བརྟན་བཀྲ་ཤིས།

ཟླ7པའི་ཚེས28ཉིན། ཀྲུང་གུང་ཀྲུང་དབྱང་གཞུང་ལས་ཐིང་དང་རྒྱལ་སྲིད་སྤྱི་ཁྱབ་ཁང་གཞུང་ལས་ཐིང་གིས《ཕྲུ་གུ་གསོ་སྐྱོང་གི་ཁ་གསབ་ལམ་ལུགས་ལག་བསྟར་ཇུས་གཞི》དཔར་འགྲེམས་བྱས་མ་ཟད། ས་གནས་ཁག་གི་སྡེ་ཚན་གྱིས་དོན་དངོས་དང་ཟུང་འབྲེལ་བྱས་ཏེ་ཇུས་གཞི་ལག་བསྟར་དོན་འཁྱོལ་བྱ་དགོས་པའི་བརྡ་སྦྱོར་བཏང་ཡོད།

《ཕྲུ་གུ་གསོ་སྐྱོང་གི་ཁ་གསབ་ལམ་ལུགས་ལག་བསྟར་ཇུས་གཞི》ཡི་ནང་དོན་གཙོ་བོ་གཤམ་གསལ་ལྟར། 

ཏང་ཀྲུང་དབྱང་གི་ཕྲུ་གུ་སྐྱེ་བར་རྒྱབ་སྐྱོར་གྱི་སྲིད་ཇུས་མ་ལག་དང་སྐུལ་ལྕག་ལམ་སྲོལ་འཐུས་ཚང་དུ་གཏོང་རྒྱུའི་སྐོར་གྱི་ཐབས་ཇུས་བཀོད་སྒྲིག་དོན་འཁྱོལ་མཐར་ཕྱིན་དང་། ཕྲུ་གུ་སྐྱེ་བ་མཛའ་མཐུན་ཅན་གྱི་སྤྱི་ཚོགས་བསྐྲུན་པར་སྐུལ་འདེད་གཏོང་ཆེད། ཇུས་གཞི་འདི་སྒྲིག་བཟོ་བྱས་པ་ཡིན། 

གཅིག སྤྱིའི་བླང་བྱ། 

ཞི་ཅིན་ཕིང་གི་དུས་རབས་གསར་བའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་སྟོན་དུ་འཛིན་པ་དང་། ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གཉིས་པ་དང་གསུམ་པའི་དགོངས་དོན། མི་དམངས་ལྟེ་བར་འཛིན་པའི་འཕེལ་རྒྱས་ཀྱི་དགོངས་པ་སོགས་རྒྱུན་འཁྱོངས་བྱས་ཏེ། འཕེལ་རྒྱས་ཁྲོད་དམངས་འཚོར་འགན་སྲུང་དང་དམངས་འཚོ་ཇེ་ལེགས་སུ་བཏང་ནས་ཕྲུ་གུ་གསོ་སྐྱོང་གི་ཁ་གསབ་ལམ་ལུགས་ལག་བསྟར་བྱས་ཏེ། ཕྲུ་གུ་སྐྱེ་བ་མཛའ་མཐུན་ཅན་གྱི་སྤྱི་ཚོགས་སྣང་ཚུལ་བསྐྲུན་ཡོད།

བྱ་བའི་ཁྲོད་དམངས་འཚོ་ཇེ་ལེགས་དང་དམངས་ལ་ཕན་པ་རྒྱུན་འཁྱོངས་བྱས་ནས་ཁྱིམ་ཚང་གི་ཕྲུ་གུ་གསོ་སྐྱོང་དང་གཉོར་སྐྱོང་མ་གནས་ཇེ་དམའ་རུ་གཏོང་བ། སྤྱི་འདོམས་སྦྲེལ་མཐུད་དང་འདྲ་མཉམ་འགན་སྲུང་རྒྱུན་འཁྱོངས་བྱས་ནས་ད་ཡོད་ཀྱི་དམངས་འཚོའི་སྲིད་ཇུས་དང་ཕན་ཚུན་སྦྲེལ་མཐུད་བྱས་ཏེ། ཆ་རྐྱེན་དང་འཚམ་པའི་བྱིས་པའི་འདྲ་མཉམ་སྒོས་ཁ་གསབ་ལོངས་སྤྱོད་ཐུབ་པར་འགན་ལེན་ཏན་ཏིག་བྱེད་པ། ནུས་ཤུགས་ཅི་ཡོད་འདོན་པ་དང་ནུས་པས་ལྕོགས་ཚོད་སྒྲུབ་པ་རྒྱུན་འཁྱོངས་བྱས་ནས། མི་འབོར་འཕེལ་རྒྱས་གནས་ཚུལ་དང་དཔལ་འབྱོར་སྤྱི་ཚོགས་འཕེལ་རྒྱས་ཆུ་ཚད་ལ་གཅིག་གྱུར་གྱིས་བསམ་གཞིགས་བཏང་སྟེ། ཁ་གསབ་ཁྱབ་ཁོངས་དང་ཚད་གཞི་ལུགས་མཐུན་སྒོས་གཏན་འཁེལ་བྱས་ནས་ནོར་སྲིད་ཀྱིས་ཐེག་ཁུར་ཐུབ་པ་དང་སྲིད་ཇུས་རྒྱུན་བསྲིང་ཐུབ་པར་འགན་ལེན་ཏན་ཏིག་བྱེད་པ། བདེ་འཇགས་ཚད་ལྡན་དང་སྟབས་བདེ་ལག་བསྟར་སླ་བ་རྒྱུན་འཁྱོངས་བྱས་ནས་ཐོབ་ཐང་ཞིབ་བཤེར་ནན་མོ་དང་འགྲེམ་གཏོང་གོ་རིམ་ཚད་ལྡན། དོན་སྒྲུབ་ལས་ཕྱོད་ཇེ་མཐོར་བཏང་སྟེ། མ་དངུལ་གྱི་བདེ་འཇགས་ལ་འགན་ལེན་ཏན་ཏིག་བྱས་ནས་དོན་བཟང་ལེགས་པོར་སྒྲུབ་དགོས།

གཉིས། ཁ་གསབ་བྱ་ཡུལ་དང་ཚད་གཞི།

(གཅིག) ཁ་གསབ་བྱ་ཡུལ། 2025ལོའི་ཟླ1པོའི་ཚེས1ཉིན་ནས་བཟུང་། བཅའ་ཁྲིམས་ཁྲིམས་སྲོལ་གྱིས་གཏན་འབེབས་དང་མཐུན་པར་བཙས་པའི་ལོ3མན་གྱི་ཕྲུ་གུ་རྣམས་ལ་ལོ3ལོན་པའི་བར་དུ་ཁ་གསབ་སྟེར་རྒྱུ་རེད།

(གཉིས) ཁ་གསབ་ཚད་གཞི། ཕྲུ་གུ་གསོ་སྐྱོང་གི་ཁ་གསབ་ལོ་རེར་སྟེར་རྒྱུ་ཡིན་པ་དང་། ད་ལྟ་རྒྱལ་ཁབ་ཀྱི་རྨང་གཞིའི་ཚད་གཞི་ཕྲུ་གུ་རེར་ལོ་རེར་སྒོར3600རེད། དེའི་ཁྲོད2025ལོའི་ཟླ1པོའི་ཚེས1ཉིན་གྱི་སྔོན་དུ་སྐྱེས་པ་དང་། ལོ་གསུམ་མ་ལོན་པའི་ཕྲུ་གུར་ཟླ་གྲངས་ལྟར་བརྩིས་ནས་ཁ་གསབ་སྟེར་རྒྱུ་རེད། ཕྲུ་གུ་གསོ་སྐྱོང་ཁ་གསབ་ལམ་ལུགས་ཀྱི་གཏན་འབེབས་ལྟར་བྱིན་པའི་ཕྲུ་གུ་གསོ་སྐྱོང་ཁ་གསབ་ལ་མི་སྒེར་གྱི་དཔྱ་ཁྲལ་མེད་པར་བཟོ་རྒྱུ་རེད། མ་མཐའི་འཚོ་བའི་འགན་སྲུང་བྱ་ཡུལ་དང་དབུལ་ཕོངས་མི་སྣ་སོགས་རོགས་སྐྱོབ་བྱ་ཡུལ་གཏན་འཁེལ་བྱེད་སྐབས། ཕྲུ་གུ་གསོ་སྐྱོང་ཁ་གསབ་དེ་ཁྱིམ་ཚང་དང་མི་སྒེར་གྱི་ཡོང་སྒོའི་ནང་བརྩི་རྒྱུ་མིན་པ། 

གསུམ། རེ་ཞུའི་གོ་རིམ། 

ཕྲུ་གུ་གསོ་སྐྱོང་ཁ་གསབ་དངུལ་དེ་ཕྲུ་གུའི་ཕ་མའམ་ཡང་ན་ལྟ་སྐྱོང་པ་གཞན་དག་གིས་གཏན་འབེབས་ལྟར་བྱིས་པའི་ཁྱིམ་ཐོ་ཡོད་ས་ནས་རེ་ཞུ་བྱས་ཏེ་ལེན་དགོས། 

(གཅིག) རེ་ཞུ། རེ་ཞུ་བྱེད་མཁན་གྱིས་འབྲེལ་ཡོད་ཆ་འཕྲིན་བསྐངས་ནས་ཕྲུ་གུ་སྐྱེས་པའི་གསོ་རིག་དཔང་ཡིག་དང་ཁྱིམ་ཐོ་སོགས་དཔྱད་གཞིའི་ཡིག་རིགས་མཁོ་འདོན་བྱེད་པ་མ་ཟད། འདོན་སྤྲོད་བྱས་པའི་ཆ་འཕྲིན་དང་དཔྱད་གཞིའི་ཡིག་རིགས་ཀྱི་དོན་དངོས་རང་བཞིན་དང་འཐུས་ཚང་རང་བཞིན་ལ་ཁས་ལེན་བྱེད་པ། རེ་ཞུ་བྱེད་མཁན་གྱིས་གཙོ་བོ་ཕྲུ་གུ་གསོ་སྐྱོང་ཆ་འཕྲིན་དོ་དམ་མ་ལག་བརྒྱུད་ནས་དྲ་ཐོག་ཏུ་རེ་ཞུ་བྱེད་པའམ་ཡང་ན་ཡུལ་དངོས་སུ་སོང་ནས་རེ་ཞུ་བྱས་ཆོག 

(གཉིས) ཐོག་མའི་ཞིབ་འབེབས། ཕྲུ་གུའི་ཁྱིམ་ཐོ་ཡོད་སའི་ཤང་དང་གྲོང་རྡལ་སྲིད་གཞུང(སྲང་ལམ་དོན་སྒྲུབ་ཁང)གིས་རེ་ཞུའི་ཆ་འཕྲིན་ལ་ཐོག་མའི་ཞིབ་བཤེར་གཏན་འབེབས་བྱེད་པ་དང་། གྲོང་ཚོའི་ཨུ་ལྷན་གྱིས་འབྲེལ་ཡོད་བྱ་བ་ལེགས་པོ་སྒྲུབ་པར་རོགས་རམ་བྱེད་པ།

(གསུམ) ཞིབ་བཤེར་གཏན་འཁེལ། རྫོང་རིམ་པའི་འཕྲོད་བསྟེན་བདེ་ཐང་སྡེ་ཁག་གིས་ཞིབ་བཤེར་གཏན་འཁེལ་བྱས་ནས་འབྲེལ་ཡོད་ཆ་འཕྲིན་རིམ་པ་གཅིག་པའི་ནོོར་སྲིད་སྡེ་ཁག་ཏུ་མཁོ་འདོན་བྱེད་པ།

(བཞི) འཐེན་ཞིབ། གྲོང་ཁྱེར་རིམ་པའི་འཕྲོད་བསྟེན་བདེ་ཐང་སྡེ་ཁག་གིས་བསྡུར་ཚད་ངེས་ཅན་ལྟར་ཁ་གསབ་བྱ་ཡུལ་གྱི་ཆ་འཕྲིན་ལ་འཐེན་ཞིབ་བྱེད་པ། ཞིང་ཆེན་རིམ་པའི་འཕྲོད་བསྟེན་བདེ་ཐང་སྡེ་ཁག་གིས་དགོས་མཁོར་གཞིགས་ནས་འཐེན་ཞིབ་བྱེད་པ་དང་། འགུལ་རྣམ་ལྟ་སྐུལ་དོ་དམ་ལག་ལེན་བྱས་ནས་མ་དངུལ་གྱི་བདེ་འཇགས་ལ་འགན་ལེན་ཏན་ཏིག་བྱེད་པ།

བཞི། མ་དངུལ་གྱི་ཡོང་ཁུངས་དང་ཁ་གསབ་སྤྲོད་པ།

(གཅིག) ནོར་སྲིད་ཀྱི་འགན་བགོས་བསྡུར་ཚད། ཀྲུང་དབྱང་ནོར་སྲིད་ཀྱིས2025ལོ་ནས་བཟུང་ཐུན་མོང་ནོར་སྲིད་ཀྱིས་འགན་དབང་སྤོ་སྒྱུར་གཏོང་སྤྲོད་རྣམ་གྲངས་ཀྱི“ཕྲུ་གུ་གསོ་སྐྱོང་ཁ་གསབ་རོགས་དངུལ”བཙུགས་ཏེ། རྒྱལ་ཁབ་ཀྱི་རྨང་གཞིའི་ཚད་ལྡན་ཕྲུ་གུ་གསོ་སྐྱོང་ཁ་གསབ་སྟེར་བར་མཁོ་བའི་མ་དངུལ་དེ་བསྡུར་ཚད་ལྟར་ཤར་རྒྱུད་དང་དབུས་རྒྱུད། ནུབ་རྒྱུད་ས་ཁུལ་དུ་ཁ་གསབ་སྤྲོད་པ། ས་གནས་ཀྱིས་ཚད་གཞི་ཇེ་མཐོར་བཏང་བའི་ཆ་ཤས་སུ་མཁོ་བའི་མ་དངུལ་ས་གནས་ནོར་སྲིད་ཀྱིས་འགན་འཁུར་དགོས། 

(གཉིས) ཁ་གསབ་སྟེར་བའི་དུས་ཚོད། ཞིང་ཆེན་ཁག་གིས་རང་ཞིང་གི་དོན་དངོས་དང་ཟུང་འབྲེལ་བྱས་ནས་ཁ་གསབ་སྤྲོད་པའི་དུས་ཚོད་གཏན་འཁེལ་བྱས་ཆོག འགྲེམ་གཏོང་ལས་ཕྱོད་ཇེ་མཐོར་བཏང་ནས་ཁ་གསབ་མ་དངུལ་སྤྲོད་པའི་གྲངས་འབོར་འདང་ངེས་དང་དུས་ཐོག་ཏུ་ཚང་མའི་ལག་ཏུ་འབྱོར་ཐུབ་པ་བྱེད་དགོས།

(གསུམ) ཁ་གསབ་མ་དངུལ་སྤྲོད་སྟངས། རེ་ཞུ་བྱེད་མཁན་སམ་ཡང་ན་ཕྲུ་གུའི་དངུལ་བྱང་། དངུལ་རྩའི་ཐོ་ཁོངས་གཞན་དག་བཅས་ནས་རེ་ཞུ་བྱས་ཆོག　 དམངས་ཕན་དང་ཞིང་ཕན་གྱི་ནོར་སྲིད་ཁ་གསབ་མ་དངུལ་གྱི“བྱང་བུ་གཅིག”གམ་ཡང་ན་ཕྲུ་གུའི་སྤྱི་ཚོགས་འགན་སྲུང་བྱང་བུ་བརྒྱུད་དེ་སྤྲད་ན་ལེགས། 

ལྔ། དོ་དམ་དང་ལྟ་སྐུལ།

(གཅིག) ཆ་འཕྲིན་དོ་དམ། རྒྱལ་ཡོངས་གཅིག་གྱུར་གྱི་ཕྲུ་གུ་གསོ་སྐྱོང་ཁ་གསབ་ཆ་འཕྲིན་དོ་དམ་མ་ལག་བཙུགས་ནས“སྐྱེས་མ་ཐག་པའི་དོན་དག་གཅིག”སྒྲུབ་པར་ཟུང་འབྲེལ་བྱས་ཏེ། ས་ཁུལ་བར་དང་སྡེ་ཁག་བར་གྱི་ཆ་འཕྲིན་མཉམ་སྤྱོད་བྱེད་ཤུགས་ཆེ་རུ་གཏོང་བ། ཆ་འཕྲིན་དོ་དམ་ལམ་ལུགས་བཙུགས་ནས་ཆ་འཕྲིན་འཚོལ་སྡུད་དང་ཐག་གཅོད། བེད་སྤྱོད་སོགས་བྱ་བ་ལེགས་པོར་སྒྲུབ་པ། ཆ་འཕྲིན་བདེ་འཇགས་འགན་འཁྲི་དོན་འཁྱོལ་བྱས་ནས་མི་སྒེར་གྱི་ཆ་འཕྲིན་བདེ་འཇགས་ལ་འགན་སྲུང་བྱེད་པ། ཆ་འཕྲིན་འགུལ་རྣམ་ལྟ་ཞིབ་ཚད་ལེན་བྱེད་ཤུགས་ཆེ་རུ་བཏང་ནས་དུས་བཀག་ལྟར་གཞི་གྲངས་ཕྱོགས་བསྡོམས་དབྱེ་ཞིབ་བྱས་ཏེ། སྲིད་ཇུས་དཔྱད་དཔོག་དང་ལེགས་སྒྲིག་ཡག་པོ་སྒྲུབ་པར་རྒྱབ་སྐྱོར་མཁོ་འདོན་བྱེད་དགོས།

(གཉིས) གོ་རིམ་ཧྲིལ་བོར་ལྟ་སྐུལ། རྩིས་བཤེར་སྡེ་ཁག་དང་ནོར་སྲིད་སྡེ་ཁག་གིས་གོ་རིམ་ཧྲིལ་བོའི་ལྟ་སྐུལ་ཞིབ་བཤེར་ལ་ཤུགས་སྣོན་པ། སྒྲིག་ཁྲིམས་ལྟ་ཞིབ་ལས་ཁུངས་ཀྱིས་སྒྲིག་ཁྲིམས་ལག་བསྟར་དང་འགན་འཁྲི་རྩད་གཅོད་ལ་ལྟ་སྐུལ་བྱེད་ཤུགས་ཆེ་རུ་བཏང་ནས་མང་ཚོགས་ཀྱི་ཁེ་ཕན་ལ་གནོད་སྐྱོན་གཏོང་བའི་ཚུལ་མིན་གྱི་སྤྱོད་ཚུལ་དང་རུལ་སུངས་གནད་དོན་ལ་རྩད་ཞིབ་ཐག་གཅོད་ནན་མོ་བྱེད་པ། ཕྲུ་གུ་གསོ་སྐྱོང་ཁ་གསབ་ལམ་ལུགས་ལག་བསྟར་གནས་ཚུལ་གྱི་རང་འགུལ་ངང་སྤྱི་ཚོགས་ཀྱི་ལྟ་སྐུལ་དང་ལེན་བྱེད་པ། འཕྲོད་བསྟེན་བདེ་ཐང་སྡེ་ཁག་དང་ནོར་སྲིད་སྡེ་ཁག་གིས་མ་དངུལ་བཀོལ་སྤྱོད་དོ་དམ་ལ་ཤུགས་སྣོན་དང་དུས་ཐོག་ཏུ་དཔྱད་ཞིབ་གདེང་འཇོག་རྩ་འཛུགས་བྱས་ཏེ། མ་དངུལ་བཀོལ་སྤྱོད་ཀྱི་ཕན་འབྲས་དངོས་གནས་ཇེ་མཐོར་གཏོང་དགོས།

དྲུག རྩ་འཛུགས་ལག་བསྟར་ལ་ཤུགས་སྣོན་པ། 

(གཅིག) རྩ་འཛུགས་མགོ་ཁྲིད་ལ་ཤུགས་སྣོན་པ། ཏང་ཀྲུང་དབྱང་གི་གཅིག་བསྡུས་གཅིག་གྱུར་གྱི་མགོ་ཁྲིད་འོག ས་གནས་ཁག་གི་འབྲེལ་ཡོད་སྡེ་ཁག་གིས་ཞིབ་མོའི་བློ་ཡིས་རྩ་འཛུགས་བཀོད་སྒྲིག་བྱས་ཏེ། འགན་འཁྲི་ལས་བགོས་གསལ་བོ་བྱས་ནས་འགན་འཁྲི་དང་འགན་སྲུང་། དོན་འཁྱོལ་བཅས་དམིགས་སར་འབྱོར་བར་འགན་ལེན་ཏན་ཏིག་བྱེད་དགོས། ཞིང་ཆེན་རིམ་པའི་སྲིད་གཞུང་གིས་གཅིག་གྱུར་དོ་དམ་དང་ནོར་སྲིད་ཀྱི་ཐེག་ནུས་དཔྱད་དཔོག་ལ་ཤུགས་བསྣན་ནས། ཕྲུ་གུ་གསོ་སྐྱོང་ཁ་གསབ་སྲིད་ཇུས་དང་རང་ས་གནས་ཀྱི་དཔལ་འབྱོར་སྤྱི་ཚོགས་འཕེལ་རྒྱས་ཆུ་ཚད་ཕན་ཚུན་མཐུན་སྦྱོར་དང་། རིགས་གཅིག་པའི་ས་ཁུལ་དང་སྤྱིའི་ཆ་ནས་དོ་མཉམ་ཡིན་པ་རྒྱུན་འཁྱོངས་ཐུབ་སྟེ། རིམ་པ་དེ་གའི་ནོར་སྲིད་དང་འོག་རིམ་ནོར་སྲིད་ཀྱི་ཐེག་ནུས་པ་དང་རྒྱུན་བསྲིང་ཐུབ་པར་འགན་ལེན་བྱེད་པ། ཞིང་ཆེན་རིམ་པའི་འཕྲོད་བསྟེན་བདེ་ཐང་སྡེ་ཁག་དང་ནོར་སྲིད་སྡེ་ཁག་གིས་ཇུས་གཞི་འདིར་གཞིགས་ནས་རང་ས་ཁུལ་གྱི་མི་འབོར་དང་འཕེལ་རྒྱས་དོན་དངོས་དང་ཟུང་འབྲེལ་བྱས་ཏེ། རང་ཞིང་གི་ལག་བསྟར་ཇུས་གཞི་བཟོ་བ། ཞིང་ཆེན་རིམ་པའི་སྲིད་གཞུང་འཐད་པ་བྱུང་བ་བརྒྱུད་རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་དང་ནོར་སྲིད་པུའུ་རུ་ཐོ་འགོད་སྙན་སེང་ཞུ་དགོས། ཕྲུ་གུ་གསོ་སྐྱོང་ཁ་གསབ་ལམ་ལུགས་ཀྱི་འབྲེལ་ཡོད་དོ་དམ་ཚད་གཞི་རྒྱབ་ཁབ་འཕྲོད་བསྟེན་བདེ་ཐང་ཨུ་ལྷན་དང་ནོར་སྲིད་པུའུ་ཡིས་ལོགས་སུ་གཏན་འབེབས་བྱས་ཡོད།

(གཉིས) སྦྲེལ་མཐུད་ཚད་གཞི་ལེགས་པོར་བཟོ་བ། ཞིང་ཆེན་ཁག་གིས་གྲོང་ཁྱེར་རིམ་པའི་སྲིད་འཛིན་ས་ཁོངས་སུ་གཅིག་གྱུར་གྱི་ཕྲུ་གུ་གསོ་སྐྱོང་གི་ཁ་གསབ་སྲིད་ཇུས་དང་ཚད་གཞི་ལག་ལེན་བསྟར་བ་དང་། ས་ཁུལ་གྱི་ཧེ་བག་ཅུང་ཆུང་བའི་ཞིང་ཆེན་གྱིས་ཀྱང་རང་ཞིང་ནང་ཁུལ་དུ་གཅིག་གྱུར་གྱི་ཕྲུ་གུ་གསོ་སྐྱོང་ཁ་གསབ་སྲིད་ཇུས་དང་ཚད་གཞི་ལག་བསྟར་ཆོག་པ། རྫོང་རིམ་པ་མན་གྱི་སྲིད་གཞུང་གིས་རང་འགྲོས་སུ་ཕྲུ་གུ་གསོ་སྐྱོང་ཁ་གསབ་སྲིད་ཇུས་དང་ཚད་གཞི་བཏོན་མི་ཆོག ཞིང་ཆེན་རིམ་པ་དང་གྲོང་ཁྱེར་རིམ་པའི་སྲིད་གཞུང་སྡེ་ཁག་གིས་ཕྲུ་གུ་གསོ་སྐྱོང་ཁ་གསབ་སྲིད་ཇུས་སམ་ཡང་ན་ཚད་གཞི་ཇེ་མཐོར་གཏོང་བའི་སྲིད་ཇུས་འདོན་རྩིས་ཡོད་ན། བྱ་བའི་སྔོན་གྱི་རིགས་སྒྲུབ་དཔྱད་དཔོག་ལ་ཤུགས་སྣོན་དགོས་པ་མ་ཟད། དམངས་འཚོའི་སྲིད་ཇུས་ཐོ་འགོད་སྙན་སེང་གི་འབྲེལ་ཡོད་བླང་བྱ་གཞིར་ཟུང་གོང་རིམ་གྱི་གཙོ་གཉེར་སྡེ་ཁག་ཏུ་ཐོ་འགོད་སྙན་སེང་ཞུ་དགོས།

(གསུམ) ལག་བསྟར་ཕན་འབྲས་ཆེ་རུ་གཏོང་བ། སྦྲུམ་ཆགས་དང་ཕྲུ་གུ་སྐྱེ་བའི་སྦྲུམ་མའི་ལུས་ཁམས་བདེ་སྲུང་དང་། ཞག་སྡོད་ཕྲུ་གུ་སྐྱེ་བ། ཕྲུ་གུ་དམར་འབྱར་ལ་འགོག་སྨན་རྒྱག་པ། བདེ་ཐང་དོ་དམ། ཁྱིམ་ཐོ་ཐོ་འགོད། སྤྱི་ཚོགས་འགན་སྲུང་བྱང་བུ་རེ་ཞུ་སོགས་དང་ཟུང་འབྲེལ་བྱས་ཏེ། ཞབས་ཞུའི་གོ་རིམ་ཇེ་ལེགས་དང་སྲིད་ཇུས་དྲིལ་བསྒྲགས་སྒྲོག་འགྲེལ་བྱ་བ་ཡག་པོར་སྒྲུབ་ནས་མང་ཚོགས་ཀྱི་ཤེས་རྟོགས་ཐུབ་ཚད་ཇེ་མཐོར་གཏོང་བ། ས་གནས་ཁག་གི་འབྲེལ་ཡོད་སྡེ་ཁག་གིས་རྟོག་ཞིབ་གཏིང་ཟབ་བྱས་ནས་བསམ་འཆར་གྲོས་འགོར་ཉན་པ་དང་། ཕྲུ་གུ་གསོ་སྐྱོང་ཁ་གསབ་ལམ་ལུགས་ལག་བསྟར་གནས་ཚུལ་དཔྱད་དཔོག་བྱས་ཏེ། དུས་ཐོག་ཏུ་ཉམས་མྱོང་དང་བྱེད་ཐབས་སྤྱི་བསྡོམས་བྱས་ནས་སྲིད་ཇུས་བྱེད་ཐབས་འཐུས་ཚང་དུ་གཏོང་དགོས། །