ཞི་ཅིན་ཕིང་གིས་ཞོད་འགོག་གནོད་སེལ་བྱ་བར་མཛུབ་སྟོན་གལ་ཆེན་གནང་བ།

རྩོམ་སྒྲིག ཚེ་གཟུངས་སྐྱིད། ཡོང་ཁུངས། ཀྲུང་གོ་བོད་ཀྱི་དྲ་བ། བཤེར་འབེབས། ཚེ་བརྟན་བཀྲ་ཤིས།

ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅིའམ། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་དོན་ཨུ་ཡོན་ལྷན་ཁང་གི་ཀྲུའུ་ཞི་ཞི་ཅིན་ཕིང་གིས་ཞོད་འགོག་གནོད་སེལ་བྱ་བར་མཛུབ་སྟོན་གལ་ཆེན་གནང་།

ཞི་ཅིན་ཕིང་གིས་བསྟན་དོན། ཉེ་ལམ་ཀྲུང་ཧྭའི་ཤར་རྒྱུད་དང་བྱང་རྒྱུད། བྱང་ཤར་སོགས་ས་གནས་སུ་དྲག་ཆར་བབས་ཏེ་ཆུ་ལོག་དང་ས་གཤིས་གནོད་འཚེ་འབྱུང་བཞིན་ཡོད་པ་དང་། པེ་ཅིན་དང་ཧོ་པེ། ཅི་ལིན། ཧྲན་ཏུང་སོགས་ས་ཁུལ་དུ་མི་སྣར་ཤི་རྨས་དང་རྒྱུ་ནོར་ལ་གྱོང་གུན་ཚབས་ཆེན་བྱུང་། ཞོད་འགོག་གི་ཉེན་སེལ་རྒུད་སྐྱོབ་བྱ་བ་སྣ་ཚོགས་ཏན་ཏིག་གིས་ལེགས་པར་བསྒྲུབས་ནས། ནུས་ཤུགས་ཡོད་རྒུས་འབྲེལ་བ་ཆད་པའི་མི་སྣ་འཚོལ་སྐྱོབ་དང་། བློ་བརྟན་འགྱུར་མེད་སྒོས་གནོད་འཚེ་ཐེབས་པའི་མང་ཚོགས་སྤོ་སྒྱུར་བཀོད་སྒྲིག་བྱས་ཏེ་ཚད་ཆེས་ཆེ་བའི་སྒོ་ནས་མི་སྣ་ཤི་རྨས་ཇེ་ཉུང་དུ་གཏོང་དགོས།

ཞི་ཅིན་ཕིང་གིས་ནན་གྱིས་བསྟན་དོན། ད་ལྟ"ཟླ་བདུན་པའི་མཇུག་དང་ཟླ་བརྒྱད་པའི་ཟླ་འགོའི"ཞོད་འགོག་གི་གནད་འགག་དུས་སྐབས་སུ་སླེབས་ཡོད་ལ། ས་ཁུལ་སོ་སོ་དང་སྡེ་ཁག་སོ་སོས་ཚད་མཐའི་འཛིན་སེམས་དང་མཐའ་ཆོད་བསམ་གཞིགས་བརྟན་པོ་བྱས་ཏེ། ཆབ་སྲིད་འགན་འཁྲི་ཕྱོགས་ཡོངས་ནས་སྲ་བརྟན་དུ་གཏོང་བ་དང་། ཞོད་འགོག་གི་བྱེད་ཐབས་སྣ་ཚོགས་དོན་འཁྱོལ་ཞིབ་ཕྲ་བྱེད་པ། ཉམས་ཞན་རིམ་པ་དང་གཙོ་གནད་གནས་ཡུལ་དམ་འཛིན་བྱས་ནས། རོགས་སྐྱོབ་སྟོབས་ཤུགས་དང་གནོད་སྐྱོབ་དངོས་རྫས་ཚན་རིག་དང་མཐུན་པའི་སྒོ་ནས་བཀོད་སྒྲིག་བྱས་ཏེ། ནུས་ཤུགས་ཡོད་རྒུས་གློ་བུར་དུ་བྱུང་བའི་ཛ་དྲག་གི་གནས་ཚུལ་ལ་དེ་མ་ཉིད་དུ་གདོང་གཏོད་པ་དང་ཐོག་མའི་དུས་ཚོད་ནང་ཐག་གཅོད་བྱས་ནས་མི་དམངས་ཀྱི་ཚེ་སྲོག་དང་རྒྱུ་ནོར་བདེ་འཇགས་ལ་འགན་སྲུང་བྱེད་དགོས།

ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན་ནམ། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་མཆན་བཀོད་མཛུབ་སྟོན་གནང་སྐབས་བསྟན་དོན། པེ་ཅིན་གྲོང་ཁྱེར་མུས་ཡུན་ས་ཁུལ་དུ་དྲག་ཆར་དང་ཆུ་ལོག་གི་གནོད་འཚེ་བྱུང་ནས་མི་སྣར་རྨས་སྐྱོན་ཚབས་ཆེན་བཟོས་ཡོད་ལ། འབྲེལ་ཐག་ཆད་པའི་མི་སྣ་ནུས་ཤུགས་ཡོད་རྒུས་བཙལ་དགོས་པ་དང་གནོད་ཐེབས་མང་ཚོགས་བཀོད་སྒྲིག་ལེགས་པོ་བྱས་ནས། ཧུར་ཐག་གིས་རྨས་སྐྱོན་ཐེབས་ཚད་ཇེ་ཉུང་དུ་གཏོང་དགོས། ཉེ་ལམ་ཀྲུང་ཧྭའི་བྱང་ཕྱོགས་ས་ཁུལ་ཁག་ཅིག་ལ་བསྟུད་མར་དྲག་ཆར་བབས་པ་དང་། རྒྱལ་ཁབ་འགོག་སྲུང་སྤྱི་ཁྱབ་པུའུ་ཡིས་འབྲེལ་ཡོད་ས་གནས་ལ་མཛུབ་ཁྲིད་བྱས་ཏེ་དྲག་ཆར་དང་ཆུ་ལོག ཞོད་འགོག་གནོད་འཚེ་འགོག་ཟོན་དང་དེར་ཁ་གཏད་འཇལ་རྒྱུར་སྔར་ལས་ཤུགས་སྣོན་པ་དང་།  དམིགས་བསལ་གནམ་གཤིས་ལྟ་ཞིབ་ཚད་ལེན་དང་སྔོན་བརྡ་ཡག་པོ་བཏང་ནས། གཙང་བོ་དང་ཆུ་མཛོད་ཀྱི་ཆུ་རགས་ལ་སྐོར་སྲུང་བྱས་ཏེ། ཉེན་ཁ་ཞིབ་བཤེར་དང་གྲོང་ཁྱེར་གྱི་ཞོད་སྐྱོན་མངོན་མེད་རྐྱེན་ངན་ལ་ཞིབ་བཤེར་བྱེད་ཤུགས་ཆེ་རུ་གཏོང་དགོས། ཉེན་ཁ་ཡོད་པའི་མང་ཚོགས་དུས་ཐོག་ཏུ་གནས་སྤར་ནས་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་བདེ་འཇགས་ལ་དངོས་སུ་འགན་སྲུང་བྱེད་དགོས། །