མཚོ་སྔོན་ཞིང་ཆེན་ཏང་ཨུའི་རྒྱུན་ལས་ཨུ་ཡོན་ལྷན་ཁང་གིས་རྒྱ་སྐྱེད་ཚོགས་འདུ་བསྡུས་པ།

རྩོམ་སྒྲིག ཚེ་གཟུངས་སྐྱིད། ཡོང་ཁུངས། ཀྲུང་གོ་བོད་ཀྱི་དྲ་བ།  བཤེར་འབེབས། ཚེ་བརྟན་བཀྲ་ཤིས།

ཟླ8པའི་ཚེས6ཉིན། མཚོ་སྔོན་ཞིང་ཆེན་ཏང་ཨུའི་ཧྲུའུ་ཅི་ཝུའུ་ཞའོ་ཅུན་གྱིས་མགོ་འཛིན་མཛད་ནས་ཞིང་ཆེན་ཏང་ཨུའི་རྒྱུན་ལས་ཨུ་ཡོན་ལྷན་ཁང་གི་རྒྱ་སྐྱེད་ཚོགས་འདུ་བསྡུས་ཤིང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཉེ་དུས་ཀྱི་མཛུབ་སྟོན་གལ་ཆེན་གྱི་དགོངས་དོན་དང་ཀྲུང་དབྱང་གི་འབྲེལ་ཡོད་ཚོགས་འདུའི་དགོངས་དོན་སློབ་སྦྱོང་བརྒྱུད་སྒྲོག་བྱས་ཏེ། རང་ཞིང་གི་ལག་བསྟར་བསམ་འཆར་ལ་ཞིབ་འཇུག་བྱས།

ཚོགས་འདུ་ལས་ནན་གྱིས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་དབྱང་ཆབ་སྲིད་ཅུས་ཀྱི་ཚོགས་འདུའི་སྟེང་གསུང་བཤད་གལ་ཆེན་གནང་བའི་དགོངས་དོན་སློབ་སྦྱོང་ཟབ་མོ་དང་ལག་བསྟར་མཐའ་འཁྱོལ་བྱེད་པ་དང་། ཆབ་སྲིད་ལངས་གནས་མཐོར་འདེགས་པ་དང་རང་འགུལ་གྱིས་རེའུ་སྡུར་ཚད་སྡུར་བྱེད་པ། རྣམ་འགྱུར་བརྟན་པོ་དང་ཐབས་ལམ་ཡང་དག བྱེད་ཐབས་སྟོབས་ལྡན་བཅས་ལ་བརྟེན་ནས་ཏང་ཀྲུང་དབྱང་གི་ལོ་སྨད་ཀྱི་དཔལ་འབྱོར་ལས་དོན་སྐོར་གྱི་ཇུས་ཆོད་བཀོད་སྒྲིག་དངོས་འབེབས་ལེགས་པོ་བྱེད་པ། ནང་མཁོའི་བག་ནུས་མྱུར་ཏུ་གློད་པ། འཛད་སྤྱོད་ཀྱི་རྨང་གཞིའི་ནུས་པ་དང་དངུལ་གཏོང་གི་གནད་འགག་ནུས་པ་ལེགས་པར་འདོན་པ། བཟོ་ལས་བརྟན་བརླིང་གོང་འཕེལ་དང་ཞབས་ཞུ་ལས་རིགས་སླར་བརྟན་གོང་འཕེལ་ལ་མུ་མཐུད་དུ་སྐུལ་འདེད་གཏོང་བ། དཔལ་འབྱོར་འཁོར་སྐྱོད་བཀོད་གཏོང་ལམ་སྲོལ་ལེགས་སྤྱོད་དངོས་སྤྱོད་བྱེད་པ། ལས་དོན་སྤུས་འདེགས་ཕན་སྐྱེད་ལ་སྟོབས་ཤུགས་ཡོད་རྒུས་སྐུལ་འདེད་གཏོང་བ། ལོ་ཧྲིལ་པོའི་དམིགས་འབེན་ལས་འགན་མཐའ་གཅིག་ཏུ་ལེགས་སྒྲུབ་བྱས་ཏེ། “ལོ་ལྔའི་འཆར་གཞི་བཅོ་ལྔ་པའི”འཕེལ་རྒྱས་ལ་སྲ་ཞིང་བརྟན་པའི་རྨང་གཞི་འདིང་དགོས།

ཚོགས་འདུ་ལས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཞོད་འགོག་གནོད་སྐྱོབ་ལས་དོན་ཐད་མཛུབ་སྟོན་གལ་ཆེན་གནང་བ་དེས། མི་དམངས་བླ་ན་མེད་པ་དང་ཚེ་སྲོག་བླ་ན་མེད་པའི་ཐུགས་བརྩེ་ཟབ་མོ་ཕུན་སུམ་ཚོགས་པར་མངོན་ཡོད། ཞོད་དུས་ལ་སླེབས་པ་ནས་བཟུང་། ཞིང་ཆེན་ཡོངས་ཀྱི་གནམ་གཤིས་ཐལ་ཆེ་བ་མངོན་སུམ་གྱི་ཇེ་མང་དུ་སོང་ཡོད་པས། ས་གནས་སོ་སོ་དང་སྡེ་ཁག་སོ་སོས“དུས་རྣམ་ཀུན་ཏུ་སེམས་མི་བདེ་བའི”འགན་འཁྲི་འདུ་ཤེས་ལ་བརྟེན་ནས། མཐའ་ཐུག་རིགས་ལམ་དང་མཐར་སོན་རིགས་ལམ་བརྟན་པོར་སྐྱེད་པ་དང་། ཕྱོགས་སོ་སོའི་ཐོན་ཁུངས་སྟོབས་ཤུགས་སྤྱི་འདོམས་བྱེད་པ་དང་ཏང་ཡོན་མང་ཚོགས་སྐུལ་སློང་བྱེད་པ། ཆར་ཚུལ་ཞོད་བབ་ཀྱི་འགྱུར་ལྡོག་ལ་དོ་སྣང་ཡག་པོ་བྱེད་པ། གྲུབ་ཆ་ཞན་ས་དང་གཙོ་གནད་ཀྱི་གནས་ལ་དམ་པོར་དམིགས་པ། “ཡ་ལན”དང“ཨ་ལན”ཡོད་པའི་ལམ་སྲོལ་དངོས་འབེབས་བྱེད་པ། ཞོད་འགོག་ཉེན་སྐྱོབ་གནོད་སྐྱོབ་ཀྱི་འཐབ་འཁྲུག་དཀའ་མོ་མཐའ་གཅིག་ཏུ་བརྒྱབ་སྟེ། མི་དམངས་མང་ཚོགས་ཀྱི་ཚེ་སྲོག་རྒྱུ་ནོར་བདེ་འཇགས་བསྲུང་དགོས།

ཚོགས་འདུ་ལས་ནན་གྱིས་བསྟན་དོན། ཞིང་ཆེན་ཡོངས་ཀྱི་རིམ་པ་སོ་སོས་ཏང་རྩ་འཛུགས་ཀྱིས་ཀྲུང་དབྱང་གི་ཏང་འཛུགས་སྐྱོང་ལས་དོན་མགོ་ཁྲིད་ཚན་ཆུང་གི་ཚོགས་འདུའི་དགོངས་དོན་སློབ་ལག་བསྟར་ནན་ཏན་བྱེད་པ་དང་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་སློབ་སྦྱོང་སློབ་གསོ་ཐད་ཀྱི་ཀྲུང་དབྱང་གི་མཛུབ་སྟོན་ཚན་ཆུང་དང་པོའི་ལས་དོན་བླང་བྱ་ལག་བསྟར་ཟབ་མོ་བྱེད་པ། ཆབ་སྲིད་འགན་འཁྲི་ངེས་པ་དོན་གྱིས་ཕྲག་ཏུ་བརྟན་པོར་ལེན་པ། སློབ་སྦྱོང་སློབ་གསོའི་རྗེས་མཐུད་ལས་དོན་དམ་འཛིན་ཞིབ་འཛིན་བྱེད་པ། ལས་དོན་དངོས་འབེབས་ཐོག་ཡང་བསྐྱར་ཞིབ་ཕྲར་གཏོང་བ། འཕེལ་འགྲོས་བཀོད་སྒྲིག་ཐོག་ཡང་བསྐྱར་དཔེ་བསྡུར་བྱེད་པ། གནད་དོན་གསལ་ཐོ་དང་གཅིག་སྡུད་བཅོས་སྐྱོང་རྩིས་ཐོ་རེ་རེ་བཞིན“ཚགས་བཤེར”བྱེད་པ། “སྔར་ལས་ཚད་ལ་སླེབ་པ་ལྔ”སྒྲུབ་ཐུབ་པར་བྱས་ཏེ། ཐོག་མཐར་འཁྱོལ་བའི་སྒོ་ནས་སློབ་སྦྱོང་སློབ་གསོ་ལེགས་པར་འཛིན་དགོས།

ཚོགས་འདུ་ལས་བསྟན་དོན། རང་ཞིང་གི་འབག་བཙོག་འགོག་བཅོས་འགག་སྒྲོལ་འཐབ་འཁྲུག་ལ་ཐོབ་པའི་གྲུབ་འབྲས་ལས་སླ་མོས་བྱུང་བ་མིན་པས། དཔྱད་ཞིབ་གནད་དོན་ལ་སྡུར་གསེད་ནན་ཏན་བྱེད་པ། ལས་དོན་བཀོད་གཏོང་ལྟ་ཁྲིད་ལ་ཤུགས་བསྣན་ཏེ། གཅིག་ཤེས་ཀུན་གྲོལ་གྱིས་བཅོས་སྐྱོང་ལེགས་པོ་བྱེད་དགོས། “ལོ་ལྔའི་འཆར་གཞི་བཅོ་ལྔ་པའི”འཆར་འགོད་བཟོ་པ་དང་མཐུད་སྦྲེལ་བྱེད་པར་འབད་པ། དཔྱད་ཞིབ་དམིགས་འབེན་མ་ལག་ཆ་ཚང་བར་འཛུགས་པ། སྐྱེ་ཁམས་ཁོར་ཡུག་གཞི་གྲངས་རིག་ནུས་ཅན་དུ་ཚུལ་སྒྱུར་བྱེད་པར་མྱུར་ཏུ་སྐུལ་འདེད་བཏང་སྟེ། རབ་མཛེས་མཚོ་སྔོན་འཛུགས་སྐྲུན་ལ་སྟོབས་དང་ལྡན་པའི་འདེགས་སྐྱོར་འདོན་སྤྲོད་བྱེད་དགོས།

ཚོགས་འདུ་ལས་ནན་གྱིས་བསྟན་དོན། ཀྲུང་དབྱང་སྒྲིག་ཁྲིམས་ཨུ་ལྷན་རྒྱལ་ཁབ་ལྟ་རྟོག་ཨུ་ལྷན་གྱི“སྒྲིག་ཁྲིམས་ཞིབ་བཤེར་ལས་དོན་ཚད་གཞི་ཅན་དང་ཁྲིམས་སྐྱོང་ཅན་དང་ཚད་ལྡན་ཅན་འཛུགས་སྐྲུན་ལོའི”འགུལ་སྐྱོད་ལས་དོན་སྐུལ་འདེད་ཚོགས་འདུའི་དགོངས་དོན་སློབ་སྦྱོང་ལག་བསྟར་བྱེད་པ་དང་། “ཅན་གསུམ”འཛུགས་སྐྲུན་ལོའི་འགུལ་སྐྱོད་དེ་སློབ་སྦྱོང་སློབ་གསོ་དང་ཀྲུང་དབྱང་སྐོར་ཞིབ་ཚན་ཆུང་བཅུ་གཅིག་པའི་སྐོར་ཞིབ་དང་ཟུང་འབྲེལ་བྱེད་པ། བློ་མཐུན་མཉམ་བརྩོན་དང་ཕྱོགས་མཐུན་ཤུགས་འདོན་བྱེད་པ། གནད་དོན་འབུར་ཐོན་སྐོར་གཅིག་ཐག་བཅད་དེ། དངོས་གཉེར་གྱི་བྱེད་ཐབས་སྤྱད་ནས“ཅན་གསུམ”འཛུགས་སྐྲུན་ལོའི་འགུལ་སྐྱོད་ལ་སྔར་ལས་ཆེ་བའི་དངོས་ཕན་གྱི་གྲུབ་འབྲས་ལེན་པར་ཁག་ཐེག་བྱེད་དགོས། 

ཚོགས་འདུའི་སྟེང་ལོ་སྟོད་ཀྱི་བདེ་འཇགས་མཚོ་སྔོན་འཛུགས་སྐྲུན་ལས་དོན་གནས་ཚུལ་དང་ཞིང་ཆེན་ཡོངས་ཀྱི་ས་གནས་དངུལ་བུན་ཉེན་ཁ་འགོག་ཟོན་ཐག་གཅོད་བྱེད་པའི་ལས་དོན་གནས་ཚུལ་ལ་མཉན། ཞིང་ཆེན་ཏང་ཨུ་དང་ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་། ཞིང་ཆེན་སྲིད་གཞུང་། ཞིང་ཆེན་སྲིད་གྲོས། ཞིང་ཆེན་སྒྲིག་ཨུ་ལྟ་ཨུ། ཞིང་ཆེན་ཁྲིམས་ཁང་། ཞིང་ཆེན་ཞིབ་དཔྱོད་ཁང་བཅས་ཀྱི་མགོ་ཁྲིད་ཚན་ཁག་གི་སློབ་སྦྱོང་སློབ་གསོའི་གནད་དོན་འཚོལ་བཤེར་ཨང་སུབ་གནས་ཚུལ་ལ་གྲོས་ཞིབ་བྱས།

ཚོགས་ཐོག་ནས་ད་དུང་དོན་དག་གཞན་ལའང་ཞིབ་འཇུག་བྱས། །