ཞི་ཅིན་ཕིང་གིས་ཨུ་རུ་སུ་རྒྱལ་ཁབ་ཀྱི་གྲོས་ཁང་འོག་མའི་ཀྲུའུ་ཞི་ཝུའོ་ལའོ་ཅིན་ལ་ཐུག་འཕྲད་གནང་བ།

རྩོམ་སྒྲིག་པ།ཚེ་གཟུངས་སྐྱིད། ཡོང་ཁུངས། ཀྲུང་གོ་བོད་ཀྱི་དྲ་བ། བཤེར་འབེབས། ཚེ་བརྟན་བཀྲ་ཤིས། 

ཟླ8པའི་ཚེས26ཉིན་གྱི་སྔ་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་པེ་ཅིན་མི་དམངས་ཚོགས་ཁང་ཆེན་མོ་རུ་ཨུ་རུ་སུ་རྒྱལ་ཁབ་ཀྱི་གྲོས་ཁང་འོག་མའི་ཀྲུའུ་ཞི་ཝུའོ་ལའོ་ཅིན་ལ་ཐུག་འཕྲད་གནང་།

ཞི་ཅིན་ཕིང་གིས་བསྟན་དོན། ཀྲུང་གོ་དང་ཨུ་རུ་སུའི་འབྲེལ་བ་ནི་ཟང་ཟིང་དང་འཕོ་འགྱུར་ཆེ་བའི་དེང་སྐབས་འཛམ་གླིང་ཐོག་ཆེས་བརྟན་ལྷིང་དང་ཆེས་འཐུས་ཚང་། འཐབ་ཇུས་ཀྱི་ནང་དོན་ཆེས་ཕུན་སུམ་ཚོགས་པ་བཅས་ཀྱི་རྒྱལ་ཁབ་ཆེན་པོའི་འབྲེལ་བ་ཞིག་ཡིན། ཀྲུང་གོ་དང་ཨུ་རུ་སུའི་འབྲེལ་བ་ཆུ་ཚད་མཐོ་བའི་འཕེལ་རྒྱས་ལ་རྒྱུན་འཁྱོངས་ལྷོད་མེད་ངང་སྐུལ་འདེད་གཏོང་རྒྱུ་དེ་རྒྱལ་ཁབ་གཉིས་ཀྱི་མི་དམངས་ཀྱི་རྩ་བའི་ཁེ་ཕན་དང་མཐུན་པ་མ་ཟད། འཛམ་གླིང་ཞི་བདེའི་བརྟན་ལྷིང་གི་འབྱུང་ཁུངས་ཀྱང་ཡིན། ད་ལོའི་ཟླ5པར་ངས་ཨུ་རུ་སུར་རྒྱལ་དོན་འཚམས་འདྲི་གནང་བ་མ་ཟད། སུའུ་ལེན་གྱི་རླབས་ཆེའི་རྒྱལ་སྲུང་དམག་འཁྲུག་ལ་རྒྱལ་ཁ་ཐོབ་ནས་ལོ་འཁོར80ལོན་པར་དྲན་གསོ་ཞུ་བའི་རྟེན་འབྲེལ་མཛད་སྒོར་ཞུགས་པ་དང་། གཟའ་འཁོར་རྗེས་མར་ཀྲུང་གོ་ཕྱོགས་ཀྱིས་ཀྱང་ཀྲུང་གོ་མི་དམངས་ཀྱི་འཇར་འགོག་དམག་འཁྲུག་དང་འཛམ་གླིང་གི་ཧྥ་ཤི་སིར་ངོ་རྒོལ་བྱེད་པའི་དམག་འཁྲུག་ལ་རྒྱལ་ཁ་ཐོབ་ནས་ལོ་འཁོར80ལོན་པར་དྲན་གསོ་ཞུ་བའི་བྱེད་སྒོ་གཟབ་རྒྱས་ངང་འཚོག་རྒྱུ་ཡིན། འཛམ་གླིང་འཁྲུག་ཆེན་གཉིས་པའི་ཨེ་ཤེ་ཡ་དང་ཡོ་རོབ་གླིང་གི་གཡུལ་ས་གཙོ་བོ་ཡིན་པའི་ཀྲུང་གོ་དང་སུའུ་ལེན་གྱིས་སོ་སོར་འཇར་པན་དམག་རྒྱལ་རིང་ལུགས་དང་འཇར་མན་ཧྥ་ཤི་སིའི་བཙན་འཛུལ་ལ་འགོག་རྒོལ་བྱ་ཆེད་མི་རིགས་ཀྱི་བློས་གཏོང་ཆེན་པོ་བྱས་པ་དང་། འཛམ་གླིང་འཁྲུག་ཆེན་གཉིས་པར་རྒྱལ་ཁ་ཐོབ་ཆེད་ལེགས་སྐྱེས་གལ་ཆེན་ཕུལ་ཡོད། ཕྱོགས་གཉིས་ཀྱིས་སྲོལ་རྒྱུན་གྱི་མཛའ་གྲོགས་རྒྱུན་མཐུད་དང་འཐབ་ཇུས་ཀྱི་ཕན་ཚུན་ཡིད་ཆེས་གཏིང་ཟབ་ཏུ་གཏོང་བ། ཁྱབ་ཁོངས་ཁག་གི་སྤེལ་རེས་མཉམ་ལས་ལ་ཤུགས་སྣོན་པ། ལག་གདང་སྦྲེལ་ནས་རྒྱལ་ཁབ་གཉིས་ཀྱི་བདེ་འཇགས་དང་འཕེལ་རྒྱས་ཁེ་ཕན་སྲུང་སྐྱོབ་བྱེད་པ། གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་ལ་མཐུན་སྒྲིལ་བྱེད་པ། ཕྱོགས་མང་རིང་ལུགས་ངོ་མ་མཐའ་འཁྱོངས་བྱེད་པ་བཅས་བྱས་ནས། རྒྱལ་སྤྱིའི་སྒྲིག་ལམ་སྔར་བས་དྲང་གཞག་ལུགས་མཐུན་གྱི་ཕྱོགས་སུ་འཕེལ་རྒྱས་འགྲོ་རྒྱུར་སྐུལ་འདེད་གཏོང་དགོས། 

ཞི་ཅིན་ཕིང་གིས་ནན་གྱིས་བསྟན་དོན། ཁྲིམས་འཛུགས་སྒྲིག་གཞིའི་མཉམ་ལས་ནི་ཀྲུང་གོ་དང་ཨུ་རུ་སུའི་དུས་རབས་གསར་པའི་ཁྱོན་ཡོངས་ཀྱི་འཐབ་ཇུས་མཉམ་ལས་རོགས་ཟླའི་འབྲེལ་བའི་མེད་དུ་མི་རུང་བའི་གྲུབ་ཆ་ཞིག་ཡིན། ཕྱོགས་གཉིས་ཀྱིས་རྒྱལ་སྐྱོང་སྲིད་གཉེར་དང་ཁྲིམས་འཛུགས་ཉམས་མྱོང་སྤེལ་རེས་ཧུར་ཐག་བྱས་ཏེ། དུས་བབ་གསར་པའི་འོག་ཀྲུང་གོ་དང་ཨུ་རུ་སུའི་འཐབ་ཇུས་མཉམ་ལས་དང་ཁྱབ་ཁོངས་ཁག་གི་མཉམ་ལས་ལ་སྔར་ལས་སྲ་བརྟན་གྱི་ཁྲིམས་འཛུགས་འགན་སྲུང་མཁོ་འདོན་བྱ་རྒྱུའི་རེ་བ་ཡོད།

ཝུའོ་ལའོ་ཅིན་གྱིས་སྲིད་འཛིན་ཕུའུ་ཅིན་གྱིས་ཀྲུའུ་ཞི་ཞི་ཅིན་ཕིང་ལ་བྱམས་བརྩེའི་འཚམས་འདྲི་དང་སྨོན་འདུན་བཟང་པོ་ཞུས་པ་བརྒྱུད་སྒྲོག་གནང་། ཝུའོ་ལའོ་ཅིན་གྱིས་གསུང་དོན། རྒྱལ་ཁབ་གཉིས་ཀྱི་གཙོ་བདག་གི་འཐབ་ཇུས་སྣེ་ཁྲིད་འོག ཨུ་རུ་སུ་དང་ཀྲུང་གོའི་འབྲེལ་བ་འཕེལ་རྒྱས་གཏིང་ཟབ་ཕྱིན་ནས་ཕན་འབྲས་ཆེན་པོ་ཐོབ་ཡོད། ཨུ་རུ་སུ་རྒྱལ་ཁབ་ཀྱི་གྲོས་ཁང་འོག་མས་རྒྱལ་ཁབ་གཉིས་ཀྱི་གཙོ་བདག་གི་ཐུན་མོང་ངོས་འཛིན་གལ་ཆེན་དངོས་འབེབས་བྱེད་པར་གཞོལ་ནས། ཨུ་རུ་སུ་དང་ཀྲུང་གོའི་ཁྲིམས་འཛུགས་ལས་ཁུངས་ཀྱི་བརྗེ་རེས་མཉམ་ལས་ལ་ཤུགས་སྣོན་དང་། ནུས་ཤུགས་ཡོད་རྒུས་རྒྱལ་ཁབ་གཉིས་ཀྱི་འབྲེལ་བར་སྐུལ་འདེད་བཏང་ནས་སྔར་ལས་མང་བའི་གྲུབ་འབྲས་བསྐྲུན་རྒྱུ་ཡིན། ལོ་ངོ80སྔོན་ལ། སུའུ་ལེན་དང་ཀྲུང་གོ་མི་དམངས་ཀྱིས་ཧྥ་ཤི་སི་ལས་རྣམ་པར་རྒྱལ་ཆེད་བྱས་རྗེས་གལ་ཆེན་བཞག་ཡོད། ཨུ་རུ་སུས་ཀྲུང་གོ་དང་མཉམ་དུ་ཐོབ་དཀའ་བའི་རྒྱལ་ཁ་འདིར་རྟེན་འབྲེལ་ཞུས་ནས། སྔོན་གཤེགས་དཔའ་བོར་རྗེས་དྲན་ཞུ་བ་དང་། ལག་གདང་སྦྲེལ་ནས་མཛེས་སྡུག་གི་མ་འོངས་པ་གསར་སྐྲུན་བྱེད་འདོད་ཡོད།

ཝང་དབྱི་དང་ཕིན་ཆིན་ཧྭ་ཐུག་འཕྲད་ལ་ཞུགས། །