ཀྲུང་དབྱང་སློབ་གསོའི་ལས་དོན་མགོ་ཁྲིད་ཚན་ཆུང་གིས《མཐོ་རིམ་སློབ་གསོའི་རིག་ཚན་ཆེད་ལས་བཀོད་སྒྲིག་ལེགས་སྒྲིག་དང་ཇེ་ལེགས་སུ་གཏོང་བའི་འགུལ་སྐྱོད་ཇུས་གཞི（2025ལོ་ནས2027ལོའི་བར）》དཔར་འགྲེམ་བྱས་པ།
རྩོམ་སྒྲིག་པ། ཚེ་གཟུངས་སྐྱིད། ཡོང་ཁུངས། ཀྲུང་གོ་བོད་ཀྱི་དྲ་བ། བཤེར་འབེབས། ཚེ་བརྟན་བཀྲ་ཤིས།
ཉེ་ཆར་ཀྲུང་དབྱང་སློབ་གསོའི་ལས་དོན་མགོ་ཁྲིད་ཚན་ཆུང་གིས《མཐོ་རིམ་སློབ་གསོའི་རིག་ཚན་ཆེད་ལས་བཀོད་སྒྲིག་ལེགས་སྒྲིག་དང་ཇེ་ལེགས་སུ་གཏོང་བའི་འགུལ་སྐྱོད་ཇུས་གཞི（2025ལོ་ནས2027ལོའི་བར）》（གཤམ་དུ་བསྡུས་མིང་ལ《ཇུས་གཞི》ཟེར）དཔར་འགྲེམ་བྱས་ནས། རིག་ཚན་ཆེད་ལས་བཀོད་སྒྲིག་ལེགས་སྒྲིག་དང་ཇེ་ལེགས་སུ་གཏོང་བའི་ལས་དོན་ལ་སྐུལ་འདེད་གཏིང་ཟབ་གཏོང་བའི་ཐད་གོ་རིམ་ལྡན་པའི་བཀོད་སྒྲིག་བྱས།
《ཇུས་གཞི》ནང་ནན་གྱིས་བསྟན་དོན། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་འཛིན་རྒྱུ་རྒྱུན་འཁྱོངས་དང་། ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་གཉིས་པ་དང་གསུམ་པའི་དགོངས་དོན་ལག་བསྟར་གཏིང་ཟབ་བྱེད་པ། རྒྱལ་ཡོངས་སློབ་གསོའི་ཚོགས་ཆེན་གྱི་དགོངས་དོན་དང《སློབ་གསོའི་སྟོབས་ལྡན་རྒྱལ་ཁབ་འཛུགས་སྐྲུན་བྱེད་པའི་འཆར་འགོད་རྩ་གནད（2024ལོ་ནས2035ལོའི་བར）》ལག་བསྟར་དོན་འཁྱོལ་བྱས་ཏེ།“ཁ་ཕྱོགས་པ་བཞི”ལ་དམིགས་ནས། བརྟན་ཐོག་ཡར་བརྩོན་དང་སྔོན་འཛུགས་རྗེས་གཏོར་དང་། མཐུན་སྦྱོར་མཉམ་འགུལ་དང་ཚོད་ལྟ་སྔོན་བསྐྱོད་བྱེད་པ་དང་། ཚན་རྩལ་འཕེལ་རྒྱས་དང་རྒྱལ་ཁབ་འཐབ་ཇུས་དགོས་མཁོ་ཁྲིད་སྟོན་དུ་འཛིན་པའི་རིག་ཚན་དང་ཆེད་ལས་བཀོད་སྒྲིག་ལེགས་སྒྲིག་ལམ་སྲོལ་དང་ཤེས་ལྡན་མི་སྣ་གསོ་སྐྱོང་བྱེད་སྟངས་གསར་འཛུགས་དང་འཐུས་ཚང་དུ་བཏང་སྟེ། མཐོ་རིམ་སློབ་གསོའི་སྤུས་ཚད་མཐོ་བའི་འཕེལ་རྒྱས་ལ་རྒྱབ་སྐྱོར་བྱེད་པའི་ནུས་པ་དང་ལེགས་སྐྱེས་ནུས་པ་རྒྱུན་ཆད་མེད་པར་ཆེ་རུ་གཏོང་དགོས།
《ཇུས་གཞི》ནང་བསྟན་དོན། གཅིག་འདོམས་འཆར་འགོད་མཐུན་སྦྱོར་ལམ་སྲོལ་འཛུགས་རྒྱུ་དང་། ཀྲུང་དབྱང་སློབ་གསོའི་ལས་དོན་མགོ་ཁྲིད་ཚན་ཆུང་གིས་རིག་ཚན་ཆེད་ལས་ལེགས་སྒྲིག་ལེགས་བཅོས་ལས་དོན་ལ་གཅིག་གྱུར་འཆར་འགོད་མགོ་ཁྲིད་བྱ་རྒྱུ་དང་། རྒྱལ་སྲིད་སྤྱི་ཁྱབ་ཁང་གི་སློབ་གནས་ཨུ་ཡོན་ལྷན་ཁང་གིས་འབྲེལ་ཡོད་སྡེ་ཚན་ཞུགས་པའི་ལས་དོན་ཚན་ཆུང་འཛུགས་པ། མཁོ་སྤྲོད་སྦྲེལ་མཐུད་ལམ་སྲོལ་འཐུས་ཚང་དུ་བཏང་ནས་རྒྱལ་ཁབ་ཀྱི་ཤེས་ལྡན་མི་སྣའི་མཁོ་སྤྲོད་སྦྲེལ་མཐུད་གཞི་གྲངས་ཆེན་པོའི་སྟེགས་བུ་འཛུགས་པ། དཀར་ཆག་དོ་དམ་ལམ་སྲོལ་གསར་གཏོད་བྱས་ནས། ལེགས་སྒྲིག་གི་དུས་ཡུན་ཐུང་དུ་བཏང་སྟེ། ཞིབ་འཇུག་སློབ་མ་དང་དངོས་གཞིའི་ཚན་ཁག མཐོ་རིམ་ལས་རིགས་བཅས་རིག་ཚན་གསུམ་གྱི་ཆེད་ལས་དཀར་ཆག་མཐུན་སྦྱོར་མཉམ་འགུལ་ལ་ཤུགས་སྣོན་རྒྱག་པ། རིགས་དབྱེ་ནས་འཕེལ་རྒྱས་གཏོང་བའི་ལམ་སྲོལ་འཐུས་ཚང་དུ་བཏང་ནས་རྨང་གཞིའི་རིགས་དང་ཉེར་སྤྱོད་རིགས། འཐབ་ཇུས་རིགས་བཅས་ཀྱི་རིག་ཚན་ཆེད་ལས་བཀོད་སྒྲིག་འཛུགས་སྐྱོང་ལ་ཁྱད་པར་ལྡན་པའི་སྒོ་ནས་སྐུལ་འདེད་གཏོང་བ། གདེང་འཇོག་དཔྱད་ཞིབ་ལམ་སྲོལ་སྒྱུར་བཅོས་བྱས་ནས་ཤེས་ལྡན་མི་སྣ་གསོ་སྐྱོང་ལྟེ་གནས་ཀྱི་གོ་གནས་ཆེ་རུ་གཏོང་བ། རིག་ཚན་དང་ཆེད་ལས་ཀྱི་ཁྱད་ཆོས་འཕེལ་རྒྱས་ལ་སྐུལ་འདེད་གཏོང་བའི་སྣ་མང་གདེང་འཇོག་མ་ལག་འཐུས་ཚང་དུ་གཏོང་བ། སྐུལ་སློང་དང་ཁྲིད་སྟོན་ལམ་སྲོལ་ལེགས་སུ་གཏོང་བ་དང་། སློབ་བསྡུའི་འཆར་གཞི་དང་ཡུན་རིང་གི་དམིགས་བསལ་རྒྱལ་བུན་སོགས་ཀྱི་སྲིད་ཇུས་གཅིག་གྱུར་འཆར་འགོད་བྱས་ཏེ། རིག་ཚན་དང་ཆེད་ལས་གྲུབ་ཚུལ་མུ་མཐུད་དུ་ཇེ་ལེགས་སུ་གཏོང་དགོས།
《ཇུས་གཞི》ནང་། ཀྲུང་དབྱང་སློབ་གསོའི་ལས་དོན་མགོ་ཁྲིད་ཚན་ཆུང་གི་ཁོངས་མིའི་སྡེ་ཚན་དང་དེ་བཞིན་འབྲེལ་ཡོད་སྡེ་ཚན་གྱིས་འདེགས་སྐྱོར་འགན་ལེན་བྱེད་ཤུགས་ཆེ་རུ་གཏོང་བ་དང་། ཞིང་ཆེན་ཁག་དང་མཐོ་སློབ་ཁག་གིས་གཙོ་གཞིའི་འགན་འཁྲི་དོན་འཁྱོལ་བྱས་ཏེ། རིག་ཚན་དང་ཆེད་ལས་བཀོད་སྒྲིག་ལེགས་སྒྲིག་དང་ཇེ་ལེགས་སུ་གཏོང་བའི་ལས་དོན་ལ་བརྟན་རླིང་ངང་སྐུལ་འདེད་གཏོང་དགོས་པའི་བླང་བྱ་བཏོན་ཡོད། །