མཚོ་བྱང་གི་གཞོན་ནུ་ལོ་ཆུང་གི་རྐང་གྲུག་འགྲན་སྡུར་སྤེལ་མགོ་བརྩམས།
རྩོམ་སྒྲིག་པ། ལྷ་ཆེན་རྡོ་རྗེ། ཡོང་ཁུངས། མཚོ་བྱང་མདོ་ལ་བོད་ཡིག་ཚགས་པར། བཤེར་འབེབས། ཚེ་བརྟན་བཀྲ་ཤིས།
རྒྱུས་ལོན་པ་ལྟར་ན། ཐེངས་འདིའི་གཞོན་ནུ་ལོ་ཆུང་གི་རྐང་གྲུག་འགྲན་སྡུར་གྱི་དུས་ཡུན་ཉིན8ཡིན་པ་དང་། དེར་སློབ་ཆུང་ཚན་ཆུང་དང་དམའ་འབྲིང་ཚན་ཆུང་། མཐོ་འབྲིང་ཚན་ཆུང་བཅས་ཚན་ཆུང་གསུམ་དུ་བགོས་ཡོད་ཅིང་། ཁུལ་ཡོངས་ནས་སླེབས་པའི་རྐང་གྲུག་འཐུས་ཚབ་རུ་ཁག25ཡི་ལུས་རྩལ་པ518འགྲན་སྡུར་ལ་ཞུགས་ནས་རྒྱལ་ཕམ་ཐག་གཅོད་བྱ་རྒྱུ་རེད། ཐེངས་འདིའི་རྐང་གྲུག་འགྲན་སྡུར་སྤེལ་བ་ནི་ཞིང་ཆེན་ཡོངས་ཀྱི“ཞིང་ལས་དང་ལུས་རྩལ། རིག་གནས། ཡུལ་སྐོར། ཚོང་ལས”བཅས་ཀྱི་ཐོན་ལས་མཉམ་འདྲེས་འཕེལ་རྒྱས་བྱ་བའི་བཀོད་སྒྲིག་ལག་བསྟར་དོན་འཁྱོལ་བྱེད་པ་དང་། “རབ་མཛེས་མཚོ་སྔོན། མཐོ་སྒང་རྐང་གྲུག”ལྷག་རིམ་འགྲན་སྡུར་གྱི་དངོས་སྒྲུབ་བྱེད་ཐབས་དང་ལེན་བྱེད་པ་ཞིག་ཡིན་ལ། ཁུལ་ཡོངས་ཀྱི་རྒྱ་ཆེའི་རྐང་གྲུག་ལ་དགའ་བའི་གཞོན་ནུ་ལོ་ཆུང་རྣམས་ལ་རང་གི་རྩལ་ནུས་མངོན་པ་དང་ལག་རྩལ་སྦྱོང་བརྡར་བྱེད་པའི་གར་སྟེགས་གལ་ཆེན་ཞིག་འདོན་སྤྲོད་བྱས་པ་ཞིག་ཡིན་པར་མ་ཟད། ཁུལ་ཡོངས་ཀྱི་གཞོན་ནུ་ལོ་ཆུང་རྣམས་ལ་རྐང་གྲུག་ལུས་རྩལ་ཁྱབ་གདལ་དང་འཕེལ་རྒྱས་ལ་སྐུལ་འདེད་དང་། གཞོན་ནུ་ལོ་ཆུང་གི་གཟུགས་གཞི་ཇེ་སྟོབས་སུ་གཏོང་བ་དང་། མཐུན་སྒྲིལ་རོགས་ལས་ཀྱི་ཕུལ་བྱུང་སྤུས་ཀའི་ཞིབ་ཕྲའི་ལག་ལེན་གསོ་སྐྱོང་བཅས་བྱས་ཏེ་མཚོ་བྱང་གི་རྐང་གྲུག་ལུས་རྩལ་སྤུས་ཚད་མཐོ་བའི་འཕེལ་རྒྱས་ལ་རྗེས་གྲབས་འཇོན་མིའི་རྨང་གཞི་སྲ་བརྟན་དུ་གཏོང་རྒྱུ་དེ་རེད།
ཉེ་བའི་ལོ་ཤས་རིང་། མཚོ་བྱང་ཁུལ་གྱིས་གཞོན་ནུ་ལོ་ཆུང་གི་ལུས་རྩལ་བྱ་གཞག་ལ་ཚད་མཐོའི་མཐོང་ཆེན་བྱས་པ་དང་། གར་སྟེགས་བསྐྲུན་པ་དང་མ་དངུལ་མང་གཏོང་། སྒྲིག་བཀོད་འཐུས་ཚང་། འགྲན་སྡུར་སྤེལ་བ་སོགས་ཀྱི་བྱེད་ཐབས་སྤྱད་དེ་ཁྱབ་རྒྱ་ཆེ་ཞིང་རིམ་པ་གསལ་བའི་གཞོན་ནུ་ལོ་ཆུང་གི་ལུས་རྩལ་འགྲན་སྡུར་མ་ལག་རིམ་བཞིན་བཙུགས་པ་དང་། ཁུལ་ཡོངས་ཀྱི་གཞོན་ནུ་ལོ་ཆུང་གི་ལུས་རྩལ་དབྱར་མཚོ་རྒྱས་པ་ལྟར་འཕེལ་རྒྱས་ཕྱིན་ལ། སློབ་གྲྭ་ནི་གཡུལ་ས་གཙོ་བོར་འཛིན་པའི་གཞོན་ནུ་ལོ་ཆུང་གི་རྐང་གྲུག་རྗེས་གྲབས་འཇོན་མི་གསོ་སྐྱོང་བྱེད་པའི་ལམ་སྲོལ་ཉིན་བཞིན་འཐུས་ཚང་དུ་ཕྱིན་ཏེ་རྒྱ་ཆེའི་གཞོན་ནུ་ལོ་ཆུང་གི་གཟུགས་པོའི་བྱང་ཚད་དང་ཕྱོགས་བསྡུས་བྱང་ཚད་མངོན་གསལ་དོད་པོས་མཐོ་རུ་ཕྱིན་ཡོད།
མགོ་རྩོམ་མཛད་སྒོའི་ཐོག ཁུལ་མི་རིགས་གླུ་གར་ཚོགས་པས་ངོ་མཚར་བའི་རིག་རྩལ་འཁྲབ་སྟོན་བྱས་ཤིང་། མགོ་རྩོམ་མཛད་སྒོའི་རྗེས་སུ་འཇུ་ལག་རྫོང་དང་མདོ་ལ་རྫོང་གཉིས་ཀྱི་ཕུལ་བྱུང་ལུས་རྩལ་པས་གྲུབ་པའི་མདོ་ལ་རི་བོ་རྐང་གྲུག་རུ་ཁག་དང་། རྐང་ཚ་རྫོང་དང་མདའ་བཞི་རྫོང་གཉིས་ཀྱི་ཕུལ་བྱུང་ལུས་རྩལ་པས་གྲུབ་པའི་མཚོ་སྔོན་པོ་རྐང་གྲུག་རུ་ཁག་གཉིས་ཀྱིས་ཐོག་མའི་འགྲན་སྡུར་བྱས།