མཚོ་བྱང་གི་བརྒྱ་ཆའི་བརྒྱད་ཅུ་ཡན་གྱི་འབྲུ་རིགས་མཛོད་དུ་བསྡུས།

རྩོམ་སྒྲིག་པ། ལྷ་ཆེན་རྡོ་རྗེ། ཡོང་ཁུངས། གངས་ལྗོངས་མེ་ལོང་།  བཤེར་འབེབས། ཚེ་བརྟན་བཀྲ་ཤིས། 

ཟླ10པའི་ཚེས16ཉིན་བར། མཚོ་བྱང་བོད་རིགས་རང་སྐྱོང་ཁུལ་གྱི་བརྒྱ་ཆའི་བརྒྱད་ཅུའི་ཡན་གྱི་འབྲུ་རིགས་མཛོད་དུ་བསྡུས་པ་དང་། ཁུལ་ཡོངས་སུ་ཞིང་ལས་ལོ་ཏོག་གི་ཐོན་འབབ་སྤྱི་ཆིང་ཁྲི་ལྔ་དང་བདུན་བརྒྱ་ལྔ་བཅུ་ཡོད་ལ། ཐོན་འབབ་ཚད་བརྒྱ་ཆའི་གྱ་བརྒྱད་དང་གྲངས་ཆུང་གཅིག་བཞི་ལ་སླེབས་ཤིང་། སྔོན་དཔག་བྱས་ན་ཟླ་བཅུ་པའི་ཟླ་སྨད་དུ་འབྲུ་རིགས་ཚང་མ་མཛོད་དུ་བསྡུ་ཚར་རྒྱུ་རེད།

སྟོན་བསྡུའི་སྐབས་སུ། མཚོ་བྱང་ཁུལ་གྱིས་ཁྱོན་བསྡོམས་འདྲུད་འཐེན་འཁོར་ལོ་དང་ཞིང་འབྲེག་འཕྲུལ་ཆས་ཁྲི་གཅིག་དང་སྟོང་བརྒྱད་དགུ་བརྒྱ་དོན་ལྔ་ནང་འདྲེན་བྱས་པ་དང་། བརྒྱུད་རིམ་ཧྲིལ་བོར་འཕྲུལ་ཆས་ཅན་གྱི་པའེ་ཏུའུ་ལམ་སྟོན་སུམ་ཅུ་བེད་སྤྱོད་བྱས་ཏེ། ཁུལ་ཡོངས་ཀྱི་ཞིང་ལས་ལོ་ཏོག་གཙོ་བོའི་ཐོན་འབབ་ཚད་བརྒྱ་ཆའི་གོ་བརྒྱད་ཡན་ལ་སླེབས་ཡོད། ལྷག་པར་དུ་འཇུ་ལག་ཧོས་རིགས་རང་སྐྱོང་རྫོང་གིས་ད་ལོར་སྲོལ་རྒྱུན་གྱི་ཞིང་ལས་བྱེད་ཐབས་རྣམ་པའི་བཀག་རྒྱ་གཏོར་ནས། རིམ་དབྱེའི་ཐོན་འབབ་ལས་ཀའི་རྣམ་པ་གསར་བར་ཧུར་ཐག་གིས་འཚོལ་ཞིབ་བྱས་པ་དང་། ནས་དེ་བརྒྱ་ཆའི་བརྒྱད་ཅུ་དགུ་ཅུ་ཙམ་སྨིན་ཡོད་དུས་བྲེགས་ནས་ཉི་མར་བསྐམས་ཤིང་། ཚང་མ་སྨིན་ཐག་ཆོད་རྗེས་སྙེ་འཐུ་བཏུས་ཏེ། སྟོན་དུས་ཀྱི་གནམ་གཤིས་མི་ལེགས་པའི་ཤུགས་རྐྱེན་ལ་ཁ་གཏད་འཇལ་བ་དང་འཕྲུལ་ཆས་ཀྱིས་ལོ་ཏོག་བསྡུ་བའི་ཟད་སྐྱོན་ཇེ་ཆུང་དུ་བཏང་བ་རེད།

ད་ལོར། མཚོ་བྱང་ཁུལ་གྱིས་འབྲུ་རིགས་ཀྱི་ཐོན་འབབ་གཏན་འཇགས་དང་ལོག་དཀར་ཐོན་ཚད་ཇེ་མང་། སྔོ་ཚལ་འདེབས་རྒྱ་ཇེ་ཆེར་གཏོང་བ་བཅས་ཀྱི་འདེབས་འཛུགས་སྒྲིག་གཞིའི་རྩ་དོན་རྒྱུན་འཁྱོངས་བྱས་ཤིང་། ནས་འདེབས་པའི་རྒྱ་ཁྱོན་སྤྱི་ཆིང་ཁྲི་གཉིས་དང་དྲུག་བརྒྱ་བདུན་ཅུ་དང་། ལོག་དཀར་འདེབས་པའི་རྒྱ་ཁྱོན་སྤྱི་ཆིང་ཁྲི་གཉིས་དང་སྟོང་བརྒྱད་དྲུག་བརྒྱ་བདུན་ཅུ་བཅས་གཏན་འཇགས་ཡོང་བར་བྱས་ནས། སོ་སོས་ཞིང་ཆེན་ཡོངས་ཀྱི་འདེབས་འཛུགས་རྒྱ་ཁྱོན་གྱི་བརྒྱ་ཆའི་བཅོ་བརྒྱད་དང་བརྒྱ་ཆའི་ཉེར་གཉིས་ཟིན་ཡོད་པས། ཞིང་ཆེན་ཡོངས་ཀྱི་འབྲུ་སྣུམ་མཛོད་ཁང་གི་ཁུལ་གནས་ཀྱི་དགེ་མཚན་མངོན་གསལ་ལྡན། ཞིང་ལས་འབྲུ་རིགས་ལས་གཞི་འཛུགས་སྐྲུན་བྱེད་ཚད་ཇེ་ཆེར་བཏང་སྟེ། ནས་དང་ལོག་དཀར་སྤུས་ལེགས་འདེབས་འཛུགས་ཀྱི་ལྟེ་བའི་སྐྱེ་འཚར་རྟེན་གཞི་སྤྱི་ཆིང་སྟོང་གསུམ་དང་སུམ་བརྒྱ་སོ་གསུམ་དང་གྲངས་ཆུང་གསུམ་གསུམ་དང་། སྤུས་ལེགས་སྐྱེ་འཚར་རྟེན་གཞི་ཞེ་དགུ་འཛུགས་སྐྲུན་ལེགས་འགྲུབ་བྱུང་ནས། ས་བོན་ཐོན་སྐྱེད་ཁེ་ལས་ཉི་ཤུའི་ཡན་ལ་རྒྱབ་སྐྱོར་བྱས་པ་དང་། འབྲུ་སྣུམ་རིགས་སྣ་གསར་པ་དང་ལག་རྩལ་གསར་པ་སྤྱི་ཆིང་ཁྲི་གསུམ་དང་སྟོང་བརྒྱད་དྲུག་བརྒྱ་བདུན་ཅུ་ཁྱབ་གདལ་བཏང་ནས། ནས་དང་ལོག་དཀར་འདེབས་འཛུགས་ལས་རིགས་སྐྱེ་འཚར་ཁྱབ་གདལ་བཅས་གཞི་གཅིག་ཅན་གྱི་མ་ལག་བཙུགས་པ་དང་། དཔེ་སྟོན་རྟེན་གཞིའི་མུའུ་རེའི་ཐོན་ཚད་རྒྱ་མ་སྟོང་ལས་བརྒལ་བས། མཚོ་འཕག་སྨི་སྟོང་གསུམ་ཡན་གྱི་ས་ཁུལ་གྱི་རིགས་རྐྱང་བའི་ཐོན་ཚད་མངོན་གསལ་གྱིས་ཇེ་མང་དུ་སོང་སྟེ། ལོ་ཧྲིལ་བོའི་འབྲུ་རིགས་བདེ་འཇགས་ཐོན་སྐྱེད་དམིགས་འབེན་ལས་འགན་ཡོངས་འགྲུབ་བྱེད་པར་འགན་སྲུང་འདོན་སྤྲོད་བྱས།