མཚོ་བྱང་ཁུལ་མཉམ་འདྲེས་སྨྱན་སྦྱོར་ལྟེ་གནས་བཙུགས།
发布时间:2025年11月07日 消息来源:

རྩོམ་སྒྲིག་པ། ལྷ་ཆེན་རྡོ་རྗེ། ཡོང་ཁུངས། མཚོ་བྱང་མདོ་ལ་བོད་ཡིག་ཚགས་པར། བཤེར་འབེབས། ཚེ་བརྟན་བཀྲ་ཤིས།


图片

ཟླ11པའི་ཚེས6ཉིན། མཚོ་བྱང་ཁུལ་མཉམ་འདྲེས་སྨྱན་སྦྱོར་ལྟེ་གནས་ཀྱི་སྒོ་བྱང་གི་ཡོལ་རས་ཕྱེས་ནས་བཙུགས་པ་དང་། དེས་ཁུལ་ཡོངས་ཀྱི་གསར་འགྱུར་དྲིལ་སྒྲོག་བྱ་བ་དེ"མཉམ་འདྲེས་གཏིང་ཟབ་དང་སྨྱན་སྦྱོར་ཡོངས་ཁྱབ"ཀྱི་དུས་རབས་གསར་རྐྱང་ཞིག་ཏུ་སླེབས་པ་མཚོན་ཡོད། ཁུལ་ཨུའི་ཧྲུའུ་ཅི་ཤ་བོ་སྐྱབས་དང་། ཁུལ་ཨུའི་ཧྲུའུ་ཅི་གཞོན་པའམ་ཁུལ་དཔོན་ཀྲང་ཧྲིང་ཡོན་མཛད་སྒོར་ཕེབས་ནས་མཉམ་དུ་སྒོ་བྱང་གི་ཡོལ་རས་ཕྱེས། ཁུལ་ཨུའི་རྒྱུན་ཨུའམ་འཐབ་ཕྱོགས་གཅིག་གྱུར་པུའུ་ཡི་པུའུ་ཀྲང་སངས་རྒྱས་དང་། ཁུལ་ཨུའི་རྒྱུན་ཨུའམ་དྲུང་ཡིག་ཆེན་མོ་ཚོ་ཅི་ཆང་གིས་འབྲེལ་ཡོད་སྡེ་ཁག་ལ<<མཚོ་བྱང་ཁུལ་གྱི་བསམ་བློ་ཆབ་སྲིད་སློབ་ཚན་གྱི་བརྩམས་ཆོས་པོད།>>གནང་བ་དང་། ཁུལ་ཨུའི་རྒྱུན་ཨུའམ་དྲིལ་སྒྲོག་པུའུ་ཡི་པུའུ་ཀྲང་ཀྲང་ཐའོ་ཡིས་གསུང་བཤད་གནང་ལ། ཁུལ་དཔོན་གཞོན་པ་མ་རུའུ་ཞང་གིས་གཙོ་སྐྱོང་གནང་། ཁུལ་དུ་བསྡད་ཡོད་པའི་ཁུལ་རིམ་པའི་མགོ་ཁྲིད་ལས་བྱེད་པ་ཞུགས།

图片

图片

图片

ཀྲང་ཐའོ་ཡིས་མཚོ་བྱང་ཁུལ་མཉམ་འདྲེས་སྨྱན་སྦྱོར་ལྟེ་གནས་བཙུགས་པར་བཀྲ་ཤིས་རྟེན་འབྲེལ་ཞུས་པ་དང་། གསར་འགྱུར་དྲིལ་སྒྲོག་གི་འཐབ་ས་དང་པོར་འབད་འཐབ་བྱེད་མཁན་གྱི་ཁུལ་ཡོངས་ཀྱི་གསར་འགྱུར་ལས་སྒྲུབ་པར་དུས་ཆེན་གྱི་འཚམས་འདྲི་ཞུས་ཤིང་། འདས་ཟིན་པའི་ལོ་གཅིག་རིང་གི་མཚོ་བྱང་ཁུལ་གྱི་གསར་འགྱུར་ལས་དོན་ལ་ཁས་ལེན་གང་ལེགས་གནང་ལ། ཁུལ་མཉམ་འདྲེས་སྨྱན་སྦྱོར་ལྟེ་གནས་དང་ཁུལ་ཡོངས་ཀྱི་གསར་འགྱུར་ལས་སྒྲུབ་པས་ཐོག་མཐའ་བར་གསུམ་དུ་ཏང་གི་མགོ་ཁྲིད་ནི་བྱ་བའི་བརྒྱུད་རིམ་ཧྲིལ་པོར་ཁྱབ་པར་བྱས་ཏེ་ཁུལ་ཨུ་དང་ཁུལ་སྲིད་གཞུང་གི་ལྟེ་བའི་ལས་དོན་ལ་དམ་པོར་དམིགས་པ་དང་། ཏང་གི་སྲིད་ཇུས་དང་སྤྱི་ཁྱབ་ཧྲུའུ་ཅིའི་ཐུགས་ཁུར་དེ་རོང་འབྲོག་མང་ཚོགས་ཀྱིས་ཉན་ན་གོ་ཐུབ་པའི"ཡུལ་སྐད"དང་བལྟས་ན་རིག་ཐུབ་པའི"ཉེ་འགྲམ་གྱི་དོན་དག"ལ་འགྱུར་བར་བྱས་ནས་བརྗོད་དོན་མཆོག་ཏུ་འཛིན་པ་དང་དྲང་ནུས་བརྒྱུད་སྒྲོག་བྱེད་དགོས། བརྙན་མིག་ལ་བརྟེན་ནས་མཚོ་བྱང་གི་འགྱུར་ལྡོག་གསར་པ་འཚོལ་བ་དང་སྨྱུག་རྩེ་ལ་བརྟེན་ནས་མང་ཚོགས་ཀྱི་བདེ་སྣང་ཟིན་ཐོར་བཀོད་དེ་མཚོ་བྱང་གི་ཁྱད་ཆོས་ལྡན་ཞིང་བརྩེ་སེམས་ཀྱིས་ཕྱུག་པ། དུས་རབས་ཀྱི་ཉམས་འགྱུར་ལྡན་པའི་བརྩམས་ཆོས་སྤུས་དག་སྔར་ལས་མང་བ་བརྩམ་དགོས། "གསར་འགྱུར+སྲིད་དོན+ཚོང་དོན+ཞབས་ཞུ"བཅས་ཀྱི་མཉམ་འདྲེས་སྨྱན་སྦྱོར་འཕེལ་རྒྱས་གཏོང་སྟངས་འཚོལ་ཞིབ་ཧུར་ཐག་བྱས་ཏེ་མཚོ་བྱང་གི་སྐྱེ་ཁམས་མཛེས་ལྗོངས་དང་དམངས་སྲོལ་རིག་གནས། ཁྱད་ལྡན་དངོས་རྫས་བཅས་ལས་སྟེགས་གསར་པ་བརྒྱུད"ཕྱིར་གཏོང"ཐུབ་པར་བྱས་ནས་མཉམ་འདྲེས་སྨྱན་སྦྱོར་ལྟེ་གནས་དེ་མཚོ་བྱང་འགྲེམས་སྟོན་བྱེད་པའི"སྐར་ཁུང་གསར་པ"ཞིག་ཏུ་འགྱུར་བར་བྱེད་དགོས། མང་ཚོགས་ཀྱི་བྲེལ་དཀའ་སྡུག་སྨོན་ལ་དམིགས་ནས་གསར་འགྱུར་འཕྲིན་སྤེལ་དང་སྨྱན་སྦྱོར་ལྟ་སྐུལ་ལ་བརྟེན་ཏེ་གནད་དོན་ཐག་གཅོད་བྱ་རྒྱུར་སྐུལ་འདེད་གཏོང་བ་དང་ལས་སྟེགས་ལ་བརྟེན་ནས་དམངས་ཕན་ཞབས་ཞུ་མཁོ་འདོན་བྱས་ཏེ་སྨྱན་སྦྱོར་ལྟེ་གནས་དེ་རིགས་སོ་སོའི་མང་ཚོགས་ཀྱིས་ཡིད་རྟོན་རུང་བ་དང་བློས་འགེལ་ཆོག་པའི"ཉེ་འགྲམ་གྱི་སྨྱན་སྦྱོར"ཞིག་ཏུ་འགྱུར་བར་བྱེད་དགོས་པའི་རེ་བ་བཏོན།

ཤེས་རྟོགས་བྱུང་བ་ལྟར་ན། མཚོ་བྱང་ཁུལ་མཉམ་འདྲེས་སྨྱན་སྦྱོར་ལྟེ་གནས་ནི་ཁུལ་ཨུའི་ཐད་གཏོགས་ཁྲུའུ་རིམ་པ་དངོས་ཀྱི་ལས་དོན་སྡེ་ཁག་ཅིག་ཡིན་པ་དང་ཁུལ་ཨུའི་དྲིལ་སྒྲོག་པུའི་དོ་དམ་གྱི་ཁོངས་སུ་གཏོགས། ལྟེ་གནས་ཀྱིས་སྨྱན་སྦྱོར་ཡོངས་ཀྱི་རྩ་འཛུགས་སྒྲོམ་གཞི་དང་བྱ་བའི་ལམ་སྲོལ་འཐུས་ཚང་དུ་གཏོང་བ་དང་། མཚོ་བྱང་མདོ་ལ་ཚགས་པར་ཁང་དང་ཁུལ་རྒྱང་སྒྲོག་བརྙན་འཕྲིན་ཁང་གི་གསར་འགྱུར་སྨྱན་སྦྱོར་ཐོན་ཁུངས་བསྡུ་སྒྲིལ་བྱས་ཏེ་སྨྱན་སྦྱོར་ཡོངས་ཀྱི་ཁྱབ་སྤེལ་མ་ལག་འཛུགས་པ་དང་གཙོ་རྒྱུག་སྨྱན་སྦྱོར་གསར་པ་ནུས་ཤུགས་ཡོད་རྒུས་གཏོད་པ། ནང་དོན་དང་ལག་རྩལ། འཇོན་མི་སོགས་ཐོན་ཁུངས་མཉམ་སྤྱོད་དང་མཉམ་འདྲེས་མངོན་འགྱུར་བྱས་ཏེ་གསར་འགྱུར་བརྡ་འཕྲིན“ཐེངས་གཅིག་འཚོལ་བསྡུ་དང་སྣ་མང་སྒྲིག་བཟོ། སྨྱན་སྦྱོར་ཡོངས་སྤེལབཅས་བྱེད་པར་སྐུལ་འདེད་བཏང་སྟེ་ཁུལ་རིམ་པའི་སྨྱན་སྦྱོར“རྡེའུ་གཞོང་གཅིག”བཞིན་མཉམ་འདྲེས་རྣམ་པ་གསར་འཛུགས་དང་ཁྱབ་སྤེལ་སྔར་ལས་ཇེ་ལེགས། བརྩམས་ཆོས་སྔར་ལས་སྤུས་ལེགས། དཔུང་ཁག་སྔར་ལས་སྟོབས་ལྡན་བཅས་ལ་བརྟེན་ནས་ཀྲུང་གོའི་རྣམ་པའི་དེང་རབས་ཅན་གྱི་མཚོ་བྱང་ལག་ལེན་ལ་སྐུལ་འདེད་ཤུགས་ཆེན་གཏོང་ཆེད་སྨྱན་སྦྱོར་གྱི་ནུས་པ་འདོན་སྤེལ་བྱ་རྒྱུ་རེད།