མཚོ་སྔོན་ཞིང་ཆེན་གྱི་ལུས་རྩལ་འགྲན་ཚོགས་སྐབས་བཅུ་དགུ་པ་དང་དབང་པོ་སྐྱོན་ཅན་གྱི་ལུས་རྩལ་འགྲན་ཚོགས་སྐབས་བདུན་པ་བདེ་བླག་ངང་མཇུག་སྒྲིལ།

རྩོམ་སྒྲིག ལྷ་ཆེན་རྡོ་རྗེ། ཡོང་ཁུངས། ཀྲུང་གོ་བོད་ཀྱི་དྲ་བ། བཤེར་འབེབས། ཚེ་བརྟན་བཀྲ་ཤིས། 

  ཟླ8པའི་ཚེས18ཉིན།　མཚོ་སྔོན་ཞིང་ཆེན་གྱི་ལུས་རྩལ་འགྲན་ཚོགས་སྐབས་བཅུ་དགུ་པ་དང་དབང་པོ་སྐྱོན་ཅན་གྱི་ལུས་རྩལ་འགྲན་ཚོགས་སྐབས་བདུན་པ་མཚོ་ནུབ་སོག་རིགས་བོད་རིགས་རང་སྐྱོང་ཁུལ་དུ་བདེ་བླག་ངང་མཇུག་སྒྲིལ།

  ཐེངས་འདིའི་ཞིང་ཆེན་ལུས་རྩལ་འགྲན་ཚོགས་ལ་འཐུས་ཚབ་ཚོགས་པ37གྱི་ལུས་རྩལ་པ6052འགྲན་སྡུར་ནང་ཞུགས་པ་དང་།　ཤན་འབྱེད་པ436བདམས་ཐོན་བྱུང་ཞིང་།　བྱ་དགའི་རྟགས་མ1237བཀོད་སྒྲིག་བྱས་ཡོད་ལ།　དེའི་ནང་གསེར་གྱི་རྟགས་མ442དང་དངུལ་གྱི་རྟགས་མ376།　ཟངས་ཀྱི་རྟགས་མ419བཅས་ཡོད།　མི570ལ་ཕུལ་བྱུང་ལུས་རྩལ་པའི་མཚན་སྙན་དང་།　མི201ལ་ཕུལ་བྱུང་ཤན་འབྱེད་པའི་མཚན་སྙན་བཅས་ཐོབ་པ་མ་ཟད།　འཐུས་ཚབ་ཚོགས་པ37ལ＂ཀུན་སྤྱོད་དར་སྲོལ་བྱ་དགའ་ཐོབ་པ་དང་།＂གྲོང་ཁྱེར་དང་རྫོང10ལ＂འགྲན་ཁུལ་ཕུལ་བྱུང"དུ་བདམས་པ།　＂ལས་ཁུངས20ལ＂འགྲན་སྡུར་རྩ་འཛུགས་ཕུལ་བྱུང་ཅན་གྱི་བྱ་དགའ"ཐོབ་པ་དང་།　　མཆོང་རྒྱུག་འཕེན་གསུམ་གྱི་རྣམ་གྲངས་ལས་ལུས་རྩལ་པ12ཀྱིས་མཚོ་སྔོན་ཞིང་ཆེན་གྱི་ཟིན་ཐོ་ལྔ་ལས་བརྒལ།　

  ཐེངས་འདིའི་དབང་སྐྱོན་ལུས་རྩལ་འགྲན་ཚོགས་སྟེང་བསྡོམས་པས་འཐུས་ཚབ་རུ་ཁག10ཡི་ལུས་རྩལ་པ331དང་རྩལ་ཁྲིད་པ39འགྲན་སྡུར་ཁྲོད་ཞུགས་པ་དང་།　དབང་བོ་སྐྱོན་ཅན་ལ་རོགས་འདེགས་ཞུ་བའི་དང་བླངས་པ120འགྲན་སྡུར་ཞབས་ཞུ་ཁྲོད་ཞུགས།　བྱ་དགའི་རྟགས་མ242བྱུང་བ་དང་དེའི་ནང་གསེར་གྱི་རྟགས་མ84།　དངུལ་གྱི་རྟགས་མ83།　ཟངས་ཀྱི་རྟགས་མ75བཅས་བཀོད་སྒྲིག་བྱས་ཡོད་ལ།　འཐུས་ཚབ་རུ་ཁག10ལ＂ཀུན་སྤྱོད་དར་སྲོལ་བྱ་དགའ＂ཐོབ།

  རང་ཞིང་གི་གཞི་ཁྱོན་ཆེས་ཆེ་བ་དང་ཚད་གཞི་ཆེ་མཐོ་བ།　ཤུགས་རྐྱེན་ཆེས་རྒྱ་ཆེ་བའི་ཕྱོགས་བསྡུས་རང་བཞིན་གྱི་ལུས་རྩལ་དུས་ཆེན་ཞིག་ཡིན་པའི་ཆ་ནས།　འགྲན་ཚོགས་གྲ་སྒྲིག་ནས་མགོ་བརྩམས་པའི་བར་དང་།　འགྲན་ར་འཛུགས་སྐྲུན་ནས་ཞབས་འདེགས་འགན་སྲུང་བར།　ངོ་མཚར་བའི་རྒྱབ་ལྗོངས་རེ་རེ་རྒྱབ་ཕྱོགས་ནས།　མི་མང་པོས་རྔུལ་ཆུ་དང་འགན་འཁྲི་གྲངས་མེད་མཚོན་ཡོད་ལ།　ཐེངས་འདིའི་འགྲན་སྡུར་ལས་ཚད་གཞི་མཐོ་བ་དང་ཆུ་ཚད་མཐོ་བ།　སྤུས་ཚད་ལེགས་པ་བཅས་རྒྱུན་འཁྱོངས་བྱས་ཡོད་པ་དང་།　རྩ་འཛུགས་ནན་མོ་དང་གོ་རིམ་ལྡན་པ།　ཞབས་ཞུ་ཞིབ་ཚགས་དང་ཆ་ཚང་བས་འཁོར་སྐྱོད་ནོར་འཁྲུལ་མེད་པ་དང་དོན་རྐྱེན་གང་ཡང་མ་བྱུང་བར།＂སྟབས་བདེ་དང་བདེ་འཇགས།　ངོ་མཚར་བའི＂མཐོ་སྒང་འགྲན་སྡུར་སྤེལ་བའི་གྲུབ་འབྲས་བཟང་པོ་ཞིག་ཕུལ་ཡོད།　སྒོ་འབྱེད་མཛད་སྒོའི་སྟེང་ཁུ་ནུ་རིག་གནས་དང་གཙང་གསུམ་གྱི་སྣང་ཉམས།　མི་རིགས་ཡུལ་སྲོལ་དང་དུས་རབས་ཀྱི་ཁྱད་ཆོས་སོགས་མཉམ་འདྲེས་བྱས་ཏེ།　མཚོ་སྔོན་གྱི་སྐྱེ་ཁམས་མཛེས་པ་དང་།　མི་ཆོས་ཉམས་འགྱུར།　འཕེལ་རྒྱས་ཡར་ཐོན་བཅས་མངོན་པར་མཚོན་ཡོད།　འགྲན་རྩོད་ཐང་དུ་རྒྱལ་ཁ་ཐོབ་པ་དང་ཟིན་ཐོ་གསར་བ་སྐྲུན་པའི་གཏམ་བཟང་ཡང་ཡང་འབྱོར་བ་དང་།　ལུས་རྩལ་རྗེས་གྲབས་མི་སྣ་སྐོར་ཞིག་འབུར་དུ་ཐོན་ཏེ་འགྲན་རྩོད་ལུས་རྩལ་ཐད་གསོན་ཤུགས་རྒྱས་པས།　ལས་རིགས་ཡོངས་ཀྱིས་གདེང་འཇོག་ཆེན་པོ་ཐོབ་སྟེ།　ཐུན་མོང་མ་ཡིན་པའི་མཐོ་སྒང་གི་འགྲན་སྡུར་གྱི་དཔེ་མཚོན་ཡག་པོ་ཞིག་བསྐྲུན།

  མཇུག་སྒྲིལ་མཛད་སྒོའི་སྟེང་མཚོ་ནུབ་ཁུལ་གྱིས་ཞིང་ཆེན་ལུས་རྩལ་འགྲན་ཚོགས་ཀྱི་དར་ཆ་དེ་དུས་འཁོར་རྗེས་མ་སྟེ་མཚོ་བྱང་བོད་རིགས་རང་སྐྱོང་ཁུལ་ལ་རྩིས་སྤྲོད་གནང་བ་དང་།　ལོ4ཡི་རྗེས་སུ་ང་ཚོ་མཚོ་བྱང་ཁུལ་དུ་མཇལ་ཡོང་།　　།